¹ Inaha, ongida ijie ohibwon angida ongida lobo nihote obu ongotihi nahisiahita niho nangata na itiringa nihiruhunere nolowiriasere ho Najyok. ² Ahibwon ijie ho natianya nangejuk noho nawiri ho Najyok na iramahini nihojie toho lo fa obwoniterete isarayil, nyuo hati ine hiram obu itingidar ehule ti itiyiri ngete obu hati iruhi niho ngete. ³ Ijie, hula ohiruk---ijie hadi lohitum ohiruhi nilowiriasere, toho ojimitere, "Toho etungere ne nihilongojita ho ne, obu hadi sing otum iruhini nilowiriasere ho ne." Ojo ngete anya, dobu atuhohini nahigemita ho ngete tolochifot ho fok. ⁴ Ateny ngete tebwo namaji to noholong ho metaharik, "Owiriaya Najyok niholong ho metaharik tegemita ho ngete fad." ⁵ Hari ojo ngete, "Obu hadi sing iruhini nilo wiriasere ho ne." ⁶ Inaha, to ho otunahini nolowiriasere ho Najyok niho hilihe nihiruyojere, toho olwaji lati ho Isarayil hula itiyiri nahiram nangejuk na ongida to nolowiriasere ho ngete obu sing iruhini tanabiangan hosing iruk, ⁷ ehuhumahi Najyok hari ibwo noholong, ongele "Baya." Ihwanahi ngete anya holong lo fa nateny ngete hara niho Davide, lo fa oteny niholongi huja olwaji toho ojimiterete fa berien, "Baya netiyire ji nimurut ho ngete, hetogoloto natajio hote." ⁸ Hara isiarahi fa Yosua nihosing nawiri, habu dwo Najyok otianya tebwo noholong. ⁹ Inaha hobwon noholong ho lowiriasere na oterehini niho lati ho Najyok. ¹⁰ Niho ngete la iruhi nilowiriasere ho Njyok ngete to nakwan ho ngete awiriaya tegemita hongete, to ho ihwanari Najyok niho noho ngete. ¹¹ Inaha abwanata ho nawahan nihiruhiso niho ene wiri, ongida lobo obu ohuya niho nabiangan bayangi na ihoni sing. ¹² Isu natianya ho Najyok cebu otutur ,iram ilany nanyaliru na orahi nangadiefo harik.orem ngete many ohoro nataji to nolohayilong ,iteriamahi to hoyi.Otum ngete igegel nahigigilita ho taji ho nawahita. ¹³ Obe ibwo nasinge na obieni idimaru nihatemeni ho Najyok. Ati, nareji fad olwe cebu obwoni niloleng nihonyehite ho latwani la ongida ijie ohisiarahi namanyita. ¹⁴ Nibwonitere apadir lobolo alo hara nihide, Yesu iha Najyok, aniafata nahiruk hojie tingting. ¹⁵ Obu jie ohibwonitere lapadir lobolo la obu otum isiarahi namehino nihiramita hojie, nyuo hati niho latwani atemi isusu nihoiha fad to ho ohibwonitere jie,mayak nijiman obe ngete henepal. ¹⁶ Ongida ijie ohifwonu to nahiruk niho nolohitwengere ho ngidari, na ba ohihorihi jie to namehino cebu to nahorihiso nangidari nilwahari niholong ho wahan.