1 Ajo ne ojo hora latwani lahalunyoni ahito, obe ngete obwon hama niho lahegiamani, adobu ora ngete amonye ho reji fad. 2 nyuo hati otum, obwon ngete lahatialak ho lahenefitok hongete ngete many niholong na iramahinere monye hongete. 3 Cebu ijie, lofa ho hira ijie emusak, ohira fa jie ahatwarak niho nareji ho nifok. 4 Nyuo hati lofa nalotu noholong na otarihe, Najyok ho nasulahiso Iha langete, la oyisini niho nangorite, la oyisini niho nechihit. 5 Ojo ongida ngete italahu ehule fa obwoni niho nechihit, ojo ongida ijie hadi ohijien narahitere emusak . 6 Nyuo hati irahatate emusak, osulu Najyok nolohailong hehala ngete nitajio hojie, Lolohailong Heha langete nitojio hojie,la ongeleso ''Baba, Monye.'' 7 Tanya tianya abu ji ira ahegiamani nyuo hati ahito,nere ji ahito , ira cebu ji a ahalunyoni to Najyok. 8 Nyuo hati berien, lofa hobu te ijianata Najyok, irahata fa te ahegiamak niho ehule obu orahi ajok. 9 Nyuo hati tahanya ejianatate Najyok, kuya hobe, tahanya ahijien ite Najyok, nanyuo te iyititati hari nihalu nihigemita huja orohoji? Iwahatate rahan ahegiamak fad hari? 10 Ijifitete angida noholongi huja onyilaji, nangejuho hoyafaji, furat ho nahameu, ho nangaji. 11 Abayang ne tote. Abayang ne ojo angida kai negiama ne nihote na abe ahorihi ibwo nangidari. 12 Ahitanito ne ite, hilasira, ifwosu toho abwonitere ne, toho alotu ne bwanan toho ite. Obu fa te ihwanata ibwo nasinge noroho niho ne, 13 nyuo hati ijianata fa te ojo ora fa to naniama ho kwan ojo eramahiso fa ne nefanjelio nihote berien. 14 Ani tiama fa nihote nikwan ho ne na itahajasete kuya idayasi te nyuo hati ifwotusute ne to ho anjilo ho Najyok, toho fa hefwotusute Yesu Kristo. 15 Aji hati, ngete tahanya nakwama hote? Toho ahitetelehinere ne ite ojo,neyimahi, hewuwudutusu dwo te nohonyiehite hote ho nahisiarahiso sing niho ne. 16 Nyuo hati tahanya, alotu ne rahan amereni hote tona hiramahiso ho ne nihote natarihe? 17 Ohitahite ite sing to na ogolon,nyuo hati ibwo nangidari obe. Owahi sing piahan ite niho ne ojo ongida te ijifariti sing. 18 Ongida nibwanan ho nahiramita huja ongidari,tihitik obu ce lomo nabwon ne hote. 20 Lemusak ho ne, aniama ne nahiboriasu ho lotomoni hote hari many hadi nehuhumahini Kristo nihote. 19 Awak ne bwanan da hote tahanya cebu ebiel natianya ho ne, tananyuo ogol fa nahiram ho ne tote. 21 Iramahisi ne, ite hula iwahata kwama to nabwanan niho nechihit, obu te itiyirata ojo nanyuo nechihit otianya? 22 Toho igierehini ojo Abramo fa lobwinitere ho lemusak harik, abito to nahigiamani hongorite cebu abito to nangorite na isabita. 23 Nyuo hati ele oyisini niho nangorite nahigiamani,oyisini fa to nakwan,nyuo hati ele noho nangorite na isabita fa oyisini to nangatahiso. 24 Hunya reji hatum ititimahini tanakialare. Okialate hunya ngorwo toho neyomita harik, abito todenge ho Sinai na oyisu lahatwarak,ngete Hagar. 25 Tahanya ora Hagar adenge ho Sinai niho Arabia, itwongo akialare ho Yerusalem, toho obwon ngete nilotwarari ho lemusak hongete. 26 Nyuo hati Yerusalem na obwon nihide isabita, ngete na, iyang hojie. 27 Igierehini, ''Tokwame bebe, iji nahikolifeni hongorite, iji na ibe itomon; Kwo niger ho nahilulwo to nakwama, iji na obu ijien natomoni ho hito. Olwaji lemusak hokolifok, ilanyi noho inejie obwon ho habi '' 29 Tahanya ite, hilasira, toho Isako, sing lemusak hula ongatahini. 28 nyuo hati ora fa ngete la yoisini to nakwan itegemi lo fa ele oyisini to Noholohailong, ora cebu tohoja tahanya. 30 Nanyuo newaraga otianya? Torohosi niger nahegiamani hongorite ho lonyi. Obu ba lahito ho nehegiamani hongorite ohori nareji ho lahito ho ngorite na oyomini .'' 31 Inaha, hilasira, obu jie ohira emusak hongorite na otwara,nyuo hati noho nangorite na oyemini.