¹ Tanya, ne Paulo, arane ahatwarani ho Yesu Kristo to te paganoji. ² Egigilo ne ojo hatum ite itiyirata nahigiama ho mehino ho Najyok na isiarahi ne to te. ³ Egiero ne to nahitetelehita huja iramahini niho ne. Egierehi natarihe nihebwo newaraga. ⁴ Nomo nekianatate, itumatate ijianata natianya ho ne nihanya tarihe to Yesu.b ⁵ Nihohilihe lati, obwo fa iramahini anya tarihe. Nyuo hati tahanya eramahini to Nolohailong na onyila niho lahetejianak hongete cebu niho laheramahitak ho hiramita. ⁶ Anya tarihe idimaru anya orahi paganoji ahaletok hojie lahahwarak cebu alati ho kwan. Orahi sing ahaletok hojie lahahwarak niho nitinita niho Yesu Kristo to Efanjelio. ⁷ Ngete anya larahiterene ahegiamani to neyalita ho mehino ho Najyok na isieri niho ne to nahigiama ho golon hongete. ⁸ Isiarahi Najyok anya iyalita niho ne, dobu amuta ne bebe niho lati hula onyumuni to Najyok, nihiramahinere niho paganoji nefanjelio he barita huja obu otahite no ho Kristo ⁹ cebu ne nihiramahiso lati fad to nanyuo Najyok owak ihwana. Ngete natianya nofa idimahi Najyok niho nengaji ho berien, Najyok la obieu nareji fad. ¹⁰ Ora fa anya ojo ongida to nakelesia, lahabolorok cebu lahatialak to hide ofwoni jianan nalofero ho Najyok. ¹¹ Olotu anya bwanan to nawahan ho Najyok na atuhohi ngete niho Yesu Kristo Lohobu hojie. ¹² Ohibwon ijie ho nahingereji niho Kristo cebu nehoi to nahiruk to nahireuk hojie niho ngete. ¹³ Inaha, elelia ne nihote ojo ongida ite ibe ilongojitati to nahitegiama ho ne to te. Orahi hunya akwatan hote. ¹⁴ Tanya, arugung ne to nahungita ho ne niho Lamonye, ¹⁵ la itanyahini nahaji na obwon nihide ho nifok to nafure hongete. ¹⁶ Amojo ne ojo ongida ngete isiarahi ite to nebariti ho kwatan hongete, ongida ohitogoli ite to nagolon ho Lohailong, na obwon nihote. ¹⁷ Amojo ne ojo ongida Kristo omanya nitajio hote to nahiruk. Amojo ne ojo ongida ite ihwanahisi namori hote nikwama hongete. ¹⁸ Tobuanata nikwama ho ngete ongida ite ijianata, ho laheruhok fad,nasuhon, cebu ho nahadori ho kwama ho Yesu Kristo. ¹⁹ Amojo ne ojo ongida ite ijianata nabolori ho kwama ho Kristo na ilanya nagianyan. Hatumatate igiama anya ongida ite ifutata ho nahifututa ho Najyok. ²⁰ Tahanya niho ngete la otum ihon nareji fad, ilanya nareji huja ohifuasu ijie kuya ohigigilo, to nagolon hongete na igiama niho jie, ²¹ ikie nakwatan obuon niho ngete nikelesia cebu niho Yesu Kristo ho niho lati fad jik ho jik. Amen.