¹ Nara tiye fa ngete Najyok lohitedetu ite ho Kristo, totahitete nareji tohide , namaji netwongere Kristo niteten hehene hojyok. ² Igigilete tonahiram horeji ohonihide, obu nareji honifok. ³ Toho niho ite eyeyiata fete, ho nahisu hote idimahino ho Kristo niho Najyok. ⁴ Naleyo Kristo, ngete la ora ahisu hote, hati tiye eleyojioto hadi cebu ite hongete niho nakwatan. ⁵ Ihwanahini niyeyi, tiye, nelulung hula obwoni nifok-nahiramita hosomon, nabiangan honyilaji, nahitegiama, nawahan ho reji huja orohoji, ho nahihahwara, ngete na okialare toho nomojo hebwanak. ⁶ Ora ngete tohunya nareji huja obwonitere nahilongojitari ho Najyok na olotiniso limusak hula obu obayangi. ⁷ Ora ngete niho hunya sang ojo ite cebu ibwo noholong abito idahati niho lomo nebwanatate niho sing. ⁸ Nyuo hati tahanya ongida ite ihorihisi nafotir hohunya reji-nahigworita, nahilongojita, nahihwana nareji huja iboti, nepacita, cebu natianya naiteliangara tohutuhe hote. ⁹ Hegesemoto niho lati abito abito, toho niho ite eyartite laragangi ho twani honehoiha hegiama hongete. ¹⁰ Ehwanahisi te niho langejuk ho twani, lofa ale itelengejuhi nilofero ho nabwanan ho lohailong hongete ele fa obieu ngete. ¹¹ Niho anya lofero, obe latuani ho Grik honoho Yahud, nanguto ho kwan hona biangan honguto hoburuti hohuani, nafajari hohang, lamanyiak ho scitian, nahitenyianga homiji, latwani lesabita, hati hatum fa cebu Kristo nareji fad cebu niho nareji fad. ¹² Ihumahi, inaha, toho ngete abito la onyumu Najyok, lahanyilajani hoce bu la okwame, la obwonitere namonyi nohomehino, nahariajani, nahigolo, nariajan holohailong hojyok, hoce bu nahitilasu. ¹³ Todiha niho latuani holobo. Obwona ahariajani niho lati abito abito. Nara lobo lobwon honahituobo tolobo latuani hama, ibalahisi nihene hoi ojo tohona hohobu fa ohibalahinere ite. ¹⁴ Nitodo hohunya reji fad, obwoni hona kwama, ngete netutufahi napitan homanyia. ¹⁵ Ikie nayomo Krsito iniafahino natajio hote. Ora fa to anya nayomo ngete fa na lohingeleseretete nikwan abito. Cebu tojimata awua. ¹⁶ Ikie natianaya noho Kristo obwon nihote fad. Ho nagianyan fad natejianriti cebu itogolohiso lati abito nafure na onyila ho na nafureto hinihe fad huja itomojieretete Najyok. Iruhete tona jiman awa nitajio hote niho Najyok. ¹⁷ Cebu nasinge na ihuanatite, to natianya kuya to na higiama, igiamariti fad nifure ho Hobu Yesu. Isiarahisi najiman awa niho Najyok Lamonye tongete. ¹⁸ Nangorwo, tobayangata naliawa hote, toho otirahinere ngete niho hobu. ¹⁹ Laliawa, tokamati nangorwo hote, cebu hebiangata ingengerejito nihosing. ²⁰ Lemusak, tobayangata monyie hobeyiang hote niho nareji fad, toho ngete anya na ongida niho Hohobu. ²¹ Bo monyie, hebiangata hitabayanga lemusak hote, ojo onigda sing obu idayari. ²² Lati hula itenyiangari, to bayangata lahetegiamak hote toho nakwanite huja obwoni nireji fad, obu tona bayangi to nahiriria ho lati hula ohitegiame ite, hati tona tarihe ho taji. Tobayangata Lohobu. ²³ Niho nasinge na igiamatite, igiamariti tolohailong cebu niho Lhobu ce bu obu toho niho miji. ²⁴ Ijianatate ojo ifwotusu hadi ite niho hobu nasinge na igiamritite. Ngete Lohobu Kristo la ilwahati ite. ²⁵ Toho niho nget lobo la ihwana nareji huja obu opiti omoju hadi nahitegiama noho nabiangatan hopitan homanya na ihon fa ngete, ce bu obe nahisiso.