¹ Toho niho ne iwak ne jianan tatali nabolori hotiama na abwonitere fane niho ite, niho ehule to Laodisea, cebu toho nalwajan nolwajariti hula hobe bu oteli nohomom hone akwan hotwani. ² Egiama ne ojo ongida nataji hosing ogoli nihiyienere harabito nikwama hoce bu niho labarak fad hula ifut natarihe hogigilo, many nilofero huja itunute natarihe hojyok, ngete, Kristo. ³ Niho ngete lahatunutok nohogianyan honolofero fa edimare. ⁴ Ateny ne anya ojo ongida lobo obe bu ohitonong ite to namidihina hotianya. ⁵ Cebu abedobu ne abwon hote akwan hotwani, nyuo hati abwon ne niho ite alohailong. Akwama ne nahituongo hote hoce bu nagolon nohiruk niho Kristo. ⁶ To ho ifwotineretete fa Kristo Hobu, todahati niho ngete. ⁷ Tobwanata gurohino ting ting niho ngete, tobiehinete niho ngete, ihuhumahinete nihiruk hote toho fa ohitejianariti ite, cebu tojimata bebe awua niho Najyok. ⁸ Totialati ojo ongida obe lobo mo ohiyirinita iji tona higigilo ho twani hoce bu nahitubunyariso hohiramita huja obwoni tonolohangete ho liawa, tonemanyita honifok, cebu obu to Kristo. ⁹ Niho ngete omanyari fad nakodi hokwan ho Najyok. ¹⁰ Ce bu ifutahinete niho ngete. Ngete lohouti noho nihifirang hono hinefito hohigiama. ¹¹ Niho ngete ohinguti fa ite tona nguto hohwani na obu fa ihoni tolati nihiduhajiere naburuti tokwan, nyuo hati ninguto ho Kristo. ¹² Ihinuhahini fa ite hongete nibatisimo. Ce bu niho ngete idetine fete nihide tona hiruk nohifirang ho Najyok, ngete lofa itedetu ngete toyeyi harabito. ¹³ Lofa neyeyiatate nihipalita hote cebu nibwangan honguto hokwanite hote, isiarahi fangete ite nahisu harabito hongete cebu ibalahi ijie tonepalita hojie. ¹⁴ Ifufusoyo fangete nareji huja igierehini ho nahisingata cebu necihita huja ihipapale ijie. Iduhaya ngete sing fad hona gurohiso fa ngete nihite na ikwala. ¹⁵ Iduduhaya fa ngete ni ahifirangita hona hinefito hohigemita. Otujohi ngete sing nihiji ho lati ho nahiyaru sing nigolon ilanyino tanahiram ho hite hongete na ikwala. ¹⁶ Ikie lobo obu ongot nahiramita hote to nanyiasu kuya nimata, kuya nihiram ho holong ho kwama kuya nangejuk hoyiafa, kuya cebu noholongi howiri. ¹⁷ Sing hunya nerifiho horeji huja ofonise, hati nalibajie ngete Kristo. ¹⁸ Ikie obe oruji lobo tona wahan horeji homiji cebu to namojo ho anjeloji. Ele twani iruhi niho nareji huja atel ngete cebu ho na hutaru to nahigigilo ho kwan hongete. ¹⁹ Obu ngete iniafahino tohou. Ora ngete tohou naja obwonitere nakwan fad idihite ho nangur nasarahi cebu itutufahino harabito; ibolo ngete tona bolori na isiarahi Najyok. ²⁰ Neye ji harabito ho Kristo niho nareji ho nifok, nanyuo ji imanya tonasur nifok: ²¹ ''Henef, kuya imang, kuya itir''? ²² Hunya reji fad obwoni nahigiamari hehoi nohoholiso, toho nahituwutahiso hona hitejiana holaliawa. ²³ Hunya chihita obwoniterete ho na gianyan na ihuhumuno fa to nahiruk ho kelesia ho latwani cebu noho narohojiariso ho kwan. Hati obengi sing hebwo nabwana hetorohojia hogolon hoburuti.