¹ Nyuo hati Saulo, hotianya nahiramita ho tianya noho hifadariso lolohejehi ho Loho bu Yesu, ho naloten niho lapadir lo obolo ² ho nahi fiasu newaraga noho nolomojereji niho Damaska, ongida lomo nahori ngete lobo la ora niho ene hoi, laliawa kuya nangorwo ikie ngete iyeno Yerusalem. ³ Lo fa nadaha ngete, no fa onyiha ngete Damaska, nangan ho nafarangi niho ngete fad tohide ⁴ ; ngete ho nahuyariso nifok ho nahitiyir namurut otianya niho ngete, "Saulo, Saulo,nanyuo ji itegiama ne?" ⁵ Saulo ho najiman, "Ngai ji, Lohobu?" Lohobu ho najiman, "Ne Yesu la itegiama iji; ⁶ nyuo hati todete, iruhi nihang ho Damaska,iramahini ba nihoji nanyuo otum iji ihon." ⁷ Lati hulo fa odahe ho Saulo ho nabotia nolohininge, itiyire namurut, nyuo hati obu oteli lobo latwani. ⁸ Saulo ho nadetino tofok, lo fa nanga ngete noho nyehite ho ngete, obu ngete otel ibwo nasinge; sing ho narihoro ngete ho nahiyeno ngete niho Damaska. ⁹ Itwong ngete noholongi hutik na obu otiala, cebu onya kuya omat. ¹⁰ Tahanya obwon fa lobo lolohejek Damaska nafure Anania; Lohobu ho natianya niho ngete nimininga, Anania. ''Ngete ho najiman, "Totiale, Abwon ne inyini, Lohobu." ¹¹ Lohobu ho na jiman niho ngete, "Todete, ilo nihoi na ongele nopit, nihaji ho Yuda ifia latwani loho Tarsus nafure Saulo; omojo ngete; ¹² otel ngete nimininga latwani la onya nafure Anania olotiniso irwehiso nehehes ho ngete nihongete, ongida ngete otiala." ¹³ Nyuo hati Anania ho na hitarangahiso, "Lohobu, etiyir ne niho lati olwaji to nahiram hale twani, baya lati hula orieji hula itegem ngete niho Yerusalem. ¹⁴ Obwonitere ngete ho nagolon niho Loho bu ho lolohitwaha ho padiri nihifitahinerere lati hula longelese nafure hoji." ¹⁵ Nyuo hati Lo lohobu ho na jiman niho ngete, "Ilo, niho ngete anyumu ne ngete ahegiamani ho ne, ongida oti ngito nafure ho ne niho paganoji, lohobwok cebu niho lemusak ho Isarayil; ¹⁶ Etelehi ba ne ngete baya ngete olo hipadata tafure hone." ¹⁷ Tahanya Anania ho na loten , ho nahiruhiso nihaji. Ho narwehesio nehes ho ngete niho ngete, ho najiman, "Hilasi Saulo, Lohobu Yesu,la oleyo niho ji nihoi lofa ne lotu ji, lohisulu ne ojo ongida iji ikeny cebu ifut ho Nolohai long Na-Onyila." ¹⁸ Tiyeje ibwo nasinge nahafore ho nadoniso toho nyek ho Saulo, ngete ho nakianyan; ngete ho nadeto ho nahijuk ngete; ¹⁹ ho na nyasu ngete ho nagolon. Omanya ngete ho lolohejehi y da Damaska niho noholongi olwaji. ²⁰ Tiye ngete ho nahitokwata Yesu niho nolomojereji, ojo ora ngete ahito ho Eha Najyok. ²¹ Hulo fa fad itiyiri ngete, ihiahe fa sing ho najiman, "Obu ora ale twani aleje lo fa ipalaya lati ho Yerusalem lo fa ongeleso niho anya fure? Cebu alotu ngete inyi ongida eyeno sing niho lolohitwahaji ho padiri. " ²² Nyuo hati esieri fa Saulo nagolon nihitotosere cebu itangayang lati ho Yahud hula omanye Damaska nihisiarahi nere ojo Yesu ngete Kristo. ²³ Nihalu ho holongi olwe, lati ho Yahud hana hi tiyi rahino harabito ongida ohi fadaya ngete. ²⁴ Nyuo hati ene wahan ho sing ajien Saulo. Otiali sing nikati ho bwata to naharie ojo ongida sing ohiyaru ngete. ²⁵ Nyuo hati lolohejehi hongete ho nahiwaru ngete toho niwor ituruhuni ngete niburuso. ²⁶ Lo fa nalotu ngete Yerusalem, ngete ho na tiaman iruhiso niho lolohejehe, nyuo hati obayangi fa sing ngete fad, obu iruhi ojo ora ngete alohejek. ²⁷ Nyuo hati Barnaba ho nahiyaru ngete ho nahiyaru ngete niho lahejifitok. Ngete ho nahiramahiso sing tatali Saulo otel Lohobu tehoi cebu ojo atianya Lohobu niho ngete, cebu tatali fa Saulo itotoso niho Damaska tana fure ho Yesu. ²⁸ Eriamahine ngete ho sing lo fa nafwonise sing cebu odahe niger to Yerusalem. Ngete ho natianya ta nafure ho Lohobu Yesu ²⁹ ho narisaru ho Yuda; nyuo hati atemi sing nihifadajiere ngete. ³⁰ Lofa najieni hilasirak anya, sing ho nahiyeno ngete niwor to ho Saesarea ho nasulariso ngete toho Tarsus. ³¹ Tinga, nakelesiaji fad ho Yudeya, Galileya, cebu Samaria abwoni ho nayomo ho cebu efahi nihide; nadaha to nabayangi Lohobu cebu nihitatanga ho Nolohailong No-Onyila, nakelesia ho nafu nahino. ³² Alotu fa bwanan, lo fa nalo Petur nihangite fad, ngete ho nalotiniso niwor cebu nho laheruhok hula omanye nihang ho Lidda. ³³ Ngete ho nahorihiso lobo latwani la onya Aenea, lo fa obwon nigetit ho ngete ne ngaji meto hutik, ongura fa ngete. ³⁴ Petur ho najiman niho ngete, "Aanae, ahitingidar iji Yesu Kristo.Todete nihide ihuhumahi negetit hoji."Ngete ho nadeto nihide. ³⁵ Tinya lati hula omanye Lidda ho cebu Saron ateli ngete sing ho nahi bielino niho Lohobu. ³⁶ Obwon fa ibwo nolohejek Joppa nafure hongete Tabitha, na ibieli ojo "Dorka." Anya ngorite obwonitere fa ngete ho nahigiama na ongida ho nahigemita huja ongidari. ³⁷ Alotu fa ngete niho ehwe holongi idiaha ho nayeyi; lo fa nelalari ngete, ho nahitegete hiso nihaji no bwon nihide. ³⁸ To nanyahaji ho Lidda niger ho Joppa, cebu lohejehi itiyiri ojo obwon Petur da, sing hanasulariso lati harik niho ngete, otane ngete, "Kwo niho jie kerem." ³⁹ Petur ho nadeto ho naloten ho sing. Lo fa nesiak ngete, sing ho nahiyieno ngete niho nahaji na obwon nihide. Nangorwo haferok ho nabotia niger ho ngete ahuja oyiye, itelehite nihongete nabongoji huja ihuhumu Dorka hulo fa ngete hobwoni hosing ⁴⁰ Petur ho narohoriso sing fad niger to haji, ho na rugungi nifok,ho namojo; tinya, ho nahibielo toho nikwan, hana jiman, ''Tabita hana hi buhu niso.''Ngete ho nangan noho nyehite ho ngete, lo fa natelu ngete Petur, ngete ho nahitwongo. ⁴¹ Petur tiye ho nahisiarahiso ngete nehes hongete ho nahitedetiniso ngete nihide; lofa nangeleu ngete laheruhok cebu na ngorwo ho laheferok, ngete hanahitetelehiso niho sing na isu. ⁴² Alotu anya hiram isarahiso nihotwa ho hang ho Joppa,lati hula olwaji ho nahiruk niho Lohobu. ⁴³ Abwon fa niho Petur nihitwengere Joppa noholongi olwaji ho latwani la onya Simone bieleni.