1 Iruk fa Saulo niyeyi ho ngete.Tinya nahitegiama ho kelesia ho nahichak nihe ne holong nahitegiama nakelesia lofa obwon Yerusalem; naheruhok fad ho nahisarahiso nimasik fad ho Yudea h cebu Samaria, mayak lahejifitok. 2 Lati hula obayangi Najyok ho nanuhahiso Stefano ho na yoo ngete. 3 Nyuo hati Saulo ho nahitegiama nakelesia bebe ; odaha to nahayi ipihinita laliawa ho nangorwo niger, ihwanahita sing nilo twarari. 4 Nyuo hati lati laheruhok niho Najyok hulo fa isarahini ho nahitiringa itotoso natianya ho Najyok. 5 Filipo ho nahijuru to ho nifok nihang ho Samaria ho nahitokwata Kristo niho sing. 6 Lo fa neyiri nalohoi ho lati cebu oteli nahiteleyihita huja ihon Filipo, sing ho nangahiso najohe hosing nitenyita ho ngete. 7 Niho lati hula olwaji hula obwoni terete sing, nolo hailong nebot hana lotiniso niger hanayo bebe niger; olwahi fa lahariatak ho lahangurak hula itingidari 8 Obwon fa nakwama nihene hang bebe. 9 Nyuo hati obwon fa lobo latwani niho ibwo nahang nafure Simone, lo fa igiama berien narahan ebwoni; igiamari fa ngete niho lati ho Samaria, oroso hati ojo ngete latwani la angida. 10 Lati ho Samaria fad, niho lolohichungi many niho lahabolorok, itiyire niho ngete; ojimi sing, "Ale twani ngete nagolon ho Najyok la ongelese ojo Lahaboloroni bebe." 11 Itiyire sing niho ngete, ta nanyuo etolongoj ngete sing noholongi olwaji to nahiram hebwoni. 12 Nyuo hati lo fa neruhi sing nanyuo Filipo otianya to nahiramita ho efanjelio to nahang ho Najyok cebu tanafure ho Yesu Kristo, ejuhi fa sing, naliawa ho nangorwo. 13 Simone cebu to nakwan ho ngete iruk: lo fa nejuhi ngete, ngete ha nahitiringa bwanan ho Filipo; lo fa natel ngete nahiteleyehita ho nahigemita huja ogoli igemi, ikiraya fa ngete. 14 Tahanya lo fa netiyiri lahejifitok ho Yesu to Yerusalem ojo Samaria ahorihi nahiram ho Najyok, sing ho na sulariso Petur ho Yuwana. 15 Lofa najuruni sing nifok, sing ha namojo niho sing, ojo kuya hahorihini sing Nolohai long Na- Onyila. 16 Many niho ene holong, obu Nolohai long Na-Onyila olotu niho lobo niho sing; ijuhi fa sing ta nafure ho Lohobu Yesu. 17 Tinga Petur ho Yuwana ha narwehiso nehes hosing niho sing, sing ha nahorihiso Nolo hailong Na- Onyila. 18 Tahanya lo fa natel Simone ojo esiarahini Nolohailong Na-Onyila to narwehiso ho lahejifitok ho Yesu nehes hosing, ngete ho nahisiarahiso sing narobia. 19 Ho najiman, "Isiarahisi ne anya golon, cebu, onigdalatwani la arwehi ne nehes ho ne niho ngete ongida ohorihi Nolohailong Na-Onyila." 20 Nyuo hati Petur ho najiman niho ngete, "Ikie huja robia hoji iyeyata hoji, ta na nyuo iwak ji horihiso nalwaha ho Najyok ta narobia. 21 Obu ji ibwon ho namaji kuya nalwaha niho anya hiram, tana nyuo obu nataji hoji ongida niho Najyok. 22 Naha iwahaye huja irohojita hoji, imojo niho Lohobu, ongida ba ngete ipalahi nareji huja iwak ji. 23 Toho atel ne ojo ibwon ji nikiani na odwar cebu niho natwara hepalita." 24 Simone ho nahitarangahiso ojo, "Tomoje niho Lohobu to ne, ongida ibwo niho nareji huja iteny obu ofoni ba niho ne." 25 Lofa natel Petur ho Yuwana cebu otianye nahiram ho Lohobu, sing ha nayiteriso toho Yerusalem; to nehoi, ho nahitokwata nefanjelio niho nahangite huja olwaji noho ho Samariya. 26 Tahanya Nolohailong Na-Onyila ho natianya niho Filipo ojo, "Todete, ilo toho di niwor niho nehoi na odaha toho niwor to Yerusalem toho Gasa.'' (Anya hihoi obwon ngete nimaji noyo hojoyo). 27 Ngete ho nadeto ho na loten. Obwon fa lobo latwani loho Itopia, Latamot la ogol bebe nihene ho Kandak, no hobu ho ngorwo noho Itopia. Otiala fa ngete narobia ho ngete fad. Olotu fa ngete Yerusalem nimojo. 28 Lofa nayitita ngete itwongo fa ngete nitoromile, ngete hati ikiana nahiramita ho laheramahitani ho hiramita ho Najyok Isaya. 29 Nolohailong ho natianya niho Filipo, ''Ilo nihide inyamare anya toromile.'' 30 Tinga Filipo ho nahinam niho ngete, ho nahitiyir ngete ikiana Ayisaya laheramahitani ho hiramita ho Najyok, ho na jiman, "Ijien ji nanyuo ji ikiana?'' 31 Ele twani ho Itopia ho na jiman, ''Tatali ne, mayak nahitejien ne lobo latwani?'' Ngete ho nahilelia niho Filipo ongida odwahahi nitoromile itwong ho ngete. 32 Tahanya niho nahiram ho Najyok lo fa ikiana ele twani ho Itopia anyani, ''Iyare fa toho nehoriang nofwe ingoto; toho lamore he horiang niha temeni ho lahejwahani iningo, obu onga nahutuk ho ngete: 33 Niho nariri ho ngete eduhari fa nangoto ho ngete niger: Ngai ba lotum iramahi lati ho ngete? iduhari fa nahisu ho ngete tofok.'' 34 Latamot ho nahifiasu Filipo, ojo, ''Elelia ne niho ji, tongai laheramahitani ho hiramita ho Najyok otianya?To nakwan hongete, kuya to latwani lobo?'' 35 Filipo ho nahichak itianya; ngete ho na hichak to anya ho buk ho Isaya nihiramahinere nahiram ho Yesu niho ngete. 36 Lo fa nafwe sing nihoi, sing ho nafwoniso niho ibwo nahari; latamot ho twani ho najiman, ''Totiale, obwon nahari inyini; nanyuo lohitik ne ojo ongida ohijuhi? 37 Ele twani ho Itopia ho nahiramahiso nasingera obotia. 38 Sing ho nafoten nihotwa ho hari, Filipo ho latamot,Filipo ho nahijuk ngete. 39 Lo fa nafoni sing tohari niger, Nolohailong ho Lohobu ho nahiyaru Filipo niger; latamot biangan tialan ngete hari, ngete ho naloten to ne hoi ho ngete to nakwama. 40 Nyuo hati Filipo ho naleyeji niho Asotu. Olo ngete hara niho ene hang ho nahitejiana nahiram ho efanjelio niha ngite fad, many olotu ngete Saesarea.