¹ Lolohitwahaji ho padiri najiman, "Otirahini hunya reji?" ² Stefano ho najiman, "Hilasirak ho monyie hojie, iti yirati niho ne: Najyok ho kwatan ho naleyo niho monye hojie Abramo lo fa hobwon ngete Mesopotamia, hobe ngete idahi Haran; ³ ngete ho najiman niho ngete, 'Idahisi nafok hote ho lati hote, ifwasi nihe nifok na alone isiarahiso ite.' ⁴ Ngete ho nahidahiso nafok ho Chaldeans ho namanya Haran; tiye, lofa naye monye hongete, Najyok ho na hiyieno ngete niho anya fok, na imanyaritite tahanya. ⁵ Obu ngete isiarahi ibwo ojo ongida olunyohini niho ngete, obu, obu otum nahi hwanahiso nehe niho ngete. Nyuo hati ongat ngete-----adobu obu fa Abramo obwon ho lahito----nyuo hati esiarahi ba ngete nafok niho ngete anoho ngete cebu niho lemusak hula ofwoni niho ngete. ⁶ Otianya fa Najyok niho ngete to hoja, ojo omanye ba lemusak hongete soni nifok helihe lati, nyuo hati lati hene hang, itarahi hadi sing ahe giamak cebu itegiame hadi sing noroho many niho ne ngaji namiya namiya ongon. ⁷ Angot hadi nahang na orahiterete sing ahegiamak; Najyok ,' nihalu ofwoni hadi sing niger ho nahitokwata ne niho anya maji.' ⁸ Ngete ho nahisiarahiso Abramo nahiruk ho nguto, Tinga alotu Abramo rahan amonye ho Isako ho ho na nguton ngete niho longi meto hutik; Isako ho na lotiniso yisiniso Yacobo, cebu Yakobo alotu yisiniso lemusak tomon ho harik hula ofwoni yisiniso nemaniti ho Isarayil tomon ho harik. ⁹ Obwoni fa lemusak ho Yakobo ho nahayini na orohojaya niho Yosefo ho nahitenyangariso ngete niho Ijip, obwon fa Najyok ho ngete, ¹⁰ ho nalwahiniso ngete niho nahipadita fad, ho nahi isiarahiso niho ngete nangidari ho nolofero nihatemeni ho Faro,lohobu ho Ijip. Faro ho nahihwanahiso ngete inefito Ijip ho lati fad to haji hongete. ¹¹ Abwon fa nahure nifok ho Ijip fad cebu Kanaan, cebu nahipadata nobolo: obu fa monyie hojie ohorihini na ngirang. ¹² Nyuo hati lofa netiyir Yacobo ojo obwon na ngirang niho Ijip, ngete ho na sulariso fafairok hojie berien. ¹³ Niholong harik noho Yosefo ngete ho nahitetetehiso nakwan hongete niho hilasirak; cebu nekat ho Yosefo afwoni jianan niho niho Faro. ¹⁴ Yosefo ho nasulariso hilasirak nihalu ongida ira mahini monye hosing Yakobo ongida olotu Ijip, ho lati ho ngete fad, nehejiek metaharik ho miyet lati fad. ¹⁵ Tinya Yakobo ho naloten nifok niho Ijip; ho nayeyi, to nakwan ho ngete cebu fafairok hojie. ¹⁶ Otingere fa sing Shechem ho nanuhahiso nilume lofa inyangu Abramo to nagiling giling niho lemusak ho Hamor lobwon Shechem. ¹⁷ Lo fa nanyiha noholong hongata lo fa ongat Najyok niho Abramo, lati ho nafunahino niho nahang ho Ijip, ¹⁸ Many fa olotu lobo lohobu ho Ijip, lohobu lo fa obu ojien Yosefo. ¹⁹ Ale hobu litonong lati hojie ho nahitegiama fafairok hojie na orohojaya, sing ho nahipireriso lemusak ho nemusak hosing ongida sing isuji. ²⁰ Nihene holong Muse oyisinise; ongida fa ngete bebe nihatemeni ho Najyok itanahe fa ngete nahaji ho monye hongete nafaji hutik. ²¹ Lo fa nepireri ngete niger, ngara Faro ho nahiyaru ngete ho nahitoboloriniso ngete ehalengete. ²² Iken fa Muse niho nahikenita ho Ijip fad; ogol fa ngete natianyita cebu nihigemita. ²³ Nyuo hati lo fa nara ngete nengaji nehejek ongon , alotu nitaji ho ngete ojo ongida ngete alo iwaja hilasirak hongete, lemusak ho Isarayil. ²⁴ Nitialan latwani ho Isarayil itegiame, Muse ho nahisisio hongete ho nahilieniniso ile itegiame to namehon latwani ho Ijip: ²⁵ igigilo ngete ojo kuya ojieni ba hilasirak hongete ojo Najyok to nehene ho ngete itohoriniso fa sing, nyuo hati obu sing iti yiri. ²⁶ Niho ibwo noholong alotu ngete niho hilihe ho Isarayil hula igworite; ngete ojo fa ngete ongida ataf sing fad; ngete ho najiman, 'Lolohitwaha, irahatate ahilasirak; nanyuo te ingalasete nikwanite hote?' ²⁷ Nyuo hati ele ihon na orohojaya niho morite hongete ho nasulariso ngete niger, ho najiman, 'Ngai lohihwanahi iji ahenefiteni hojie? ²⁸ Iwak ji ifadariso ne, toho ifadajiere ji latwani ho Ijip ngole?' ²⁹ Muse ho nahinam niger lo fa nitiyir ngete; ngete ho naloten rahan ahatomononi nifok ho Midian, nahang na oyisinere ngete lemusak harik. ³⁰ Lo fa natuhohine ngaji ne hejiek ongon, anjiloji ho naleyeji niho ngete to timere ho denge ho Sinai, to nafuro ho hima nimiyang. ³¹ Lofa natel Muse nahima, ngete ho nahihiaha nihene maji; lo fa nadahahino ngete nitialari ene maji, namurut ho Hobu ho nalotiniso, ojo, ³² Ne ale Najyok ho monyie hote, Najyok ho Abramo, cebu Najyok ho Isako, cebu lo ho Yakobo.' Muse ho nahihihira ho nabayangi nilojiere tialari. ³³ Lohobu ho najiman niho ngete, 'Iduheye nahamuk hoji, namaji ibotiariji onyila. ³⁴ Atel ne nahipadata ho lati ho ne hula obwoni Ijip; etiyir ne nayiyo ho sing, alotu ne nifok ongida etohorinere sing; tahanya ifwosu, ahisulaya ba iji toho Ijip.' ³⁵ Muse lofa idayari sing, lofa najimi sing, 'Ngai lohi hwanahi iji ahinefiteni cebu angotoni?'--- ngete fa laja lo fa osulu Najyok ongida ora ahi nefiteni cebu ahetelahani. Osulu Najyok ngete to nehene anjilo lofa ihuhumahi niho Muse to miyang. ³⁶ Muse ho nahiyaru sing niger to Ijip, lofa negem ngete nedwarita cebu nahiteteleyehita niho Ijip cebu nihari ho Reed, cebu nitimere niho l noholongi nehejiek ongon. ³⁷ Ngete la Muse la ojo niho lati ho Isarayil, 'Itedetu ba Najyok laheramahitani ho hiramita nihote to hiji ho hilasirak hote, laheramahitani to ho ne.' ³⁸ Ngete ale latwani lo fa obwon nilohifurosere ho lati nitimere ho anjilo lo fa otianya niho ngete to Denge ho Sinai. Ngete aleje ale twani lo fa obwon ho monyie hojie; ngete ale, ale twani omoju netianyita huja isuji ongida isiarahi niho jie. ³⁹ Ngete aleje ale twani lo fa obu monyie hojie obayangi; osulari fa ngete niger nihosing, cebu nitajio hosing ebielere sing nihalu to ho Ijip. ⁴⁰ Nihene holong ojimi sing niho Aarona, 'Ihuhumu niho jie najiohi huja ba otumi ohinefi ijie. Toho niho ale Muse, la ohinyamino ijie tofok ho Ijip, obu jie ohijien na nyuo lobwon niho ngete.' ⁴² Nyuo hati Najyok ho na hibiel ho nahisiarahiso sing omoje nahanger ho nihide, to ho igierehinerete nibuk ho laheramahitak ho hiramita ho Najyok, 'Esiarahisi fa te niho ne neyalita ho tiangi huja orohoji ho nahiyalita niho nengaji nehejek ongon nitimere,nahaji ho Isarayil? ⁴⁴ Obwoniterete fa fafairok hojie ho nahaji noho nahitetelehita nitimere, toho iramahinere Najyok lo fa natianya ngete niho muse, ojo ongida ngete ihuhum toho nehoi na otel . ⁴⁵ Ngete anya nahaji lo iyene fafairok hojie ho Josua nifok. Olotu fa anya idwong no fa nenefi sing nareji ho hangite hu nofa arohoyo Najyok niger berien hobengi fafairok hojie. Ora fa to ho anya many niholong ho Davide, ⁴⁶ lo fa ohorihi nangidari niho Najyok; ngete ho nahifiasu namaji nolomanyari ho Najyok ho Yakobo. ⁴⁷ Nyuo hati salamone ho nahifahahiso Najyok nahaji ho Jyok. ⁴⁸ Nyuo hati, Lahaloroni bebe obu omanya nihayi na ifahi to nehes; toho otianyari loheramahitani ho hiramita ho Najyok, ⁴⁹ ' Ora nahide aseger ho ne, cebu nafok ora alobotiari hehejiaha ho ne. Ani haji ba te hetumata ifahahi si niho ne? Ojo Lohobu: kuya aji namaji holo wirasere ho ne? ⁵⁰ Obe lora nehene ho ne lohuhum hunya reji fad?' ⁵¹ Ite hule ti oture namuruto cebu hula obu ongute nitajio ho najohe, idayaritete Nolohailong Na-Onyila tihitik; igiamatite toho bo fafairok hote. ⁵² Ngai niho laheramahitak ho hiramita ho Najyok la obu fafairok hote itegemi? Ifadari sing lahetamahitak ho hiramita ho Najyok hulo fa oleyeji niha temeni holotiniso noho Lahangidarani; efwosute tahanya rahan ahetenyangak cebu ahifadak ho ngete, ⁵³ Ite lati hula ihorihisi necihit lo fa ihwanahi anjilo, nyuo hati obu iniafata ngete." ⁵⁴ Tahanya lo fa neyiri nalohoi ho lohitwaha hunya reji, anguti fa sing nitajio, ho ho nahwanya nahala ho sing niho Stefano. ⁵⁵ Nyuo hati ngete, la ifut ho Nolohailong No-Onyila, ho natiale toho nihide na ogol ho nateliniso nafangan ho Najyok; ngete ho nateliniso Yesu obotia niteten hehene ho Najyok. ⁵⁶ Stefano ho na jiman, "Totiale, atel ne nahide ongasu, cebu Iha Najyok obotia niteten hehene ho Najyok." ⁵⁷ Nyuo hati nalohoi ho lati ho nahichak igworita to namurut na okwat, ho ho nahi tobwoj najohe ho sing, ho nahi to hororo niho ngete harabito; ⁵⁸ Sing ho nahipireriso ngete niger ho hang ho nahi fad ngete: lahapiahak hulo fa obwoni da ho nahipirehiso na bongoji ho sing nahejiaha ho lahilahaji la onya nafure Saulo. ⁵⁹ Lo fa sing hefade Stefano, itiringa ngete ingeleso nafure ho Lohobu ojo, "Loho bu Yesu, to moju nolohailong ho ne. ⁶⁰ "Ngete ho narugungi nifok ho nangialan to na murut na okwat bebe, "Lohobu, heniafahi anya ipal niho sing." Lo fa nateny ngete anya, ngete ho nagetoro.