¹ Tahanya petur ho Yuwana ho nadahe toho netempulo niholong homojo, niho ho metongon. ² Lobo latwani, longura many hoyisini, oti ngitite fa ngete aholongi cebu itegetehite ngete nikat ho tempulo na ongele Na onyila,ojo ongida ngete omo mojito nelwahita niho lati hula ofwe nitempulo. ³ Lofa natel ngete Petur ho Yuwana nawahi idaha nitempulo, ngete ho nahifiasu nalwaha. ⁴ Petur, hanatiala niho ho ngete, sing ho Yuwana, hana jiman, "Totiale niho jie." ⁵ Lahangurani hanatiala niho sing, nihorihinere ibwo nasinge niho sing. ⁶ Nyuo hati Petur hanajiman, "Nabilet cebu namorwo na omimil abu ne abwonitere, nyuo hati nasinge na abwonitere ne, esiarahi ba ne nihoji. To na fure ho Yesu Kristo loho Nazaret, todaha." ⁷ Petur hanahiyaru ngete to niteten hehene, ho natingehiso ngete nihide: tiye nehejiaha ho ngete cebu natutunyoti ho nabiehino ogol. ⁸ Ho nahifiri nihide, ho nabotia ho nahichak idaha; ngete ho nahiruhiso ho Petur ojo Yuwana nitempulo,ho nadaha, ifirita, ho nahitokwata Najyok. ⁹ Oteli lati fad ngete odaha cebu itokwata Najyok. ¹⁰ Sing ho najianan ojo lomo twani bu aleje itwongito nikat ho tempulo omojo hati nalwahahita nilokoli Na onyila; sing ho nahihiaha bebe cebu to nakwama tananyuo to lofa singe idwong nihongete. ¹¹ Lo fa ngete inefito Petur ho Yuwana, lati fad ho nahina mahiso nihosing harabito niho nagoga na ongele ojo nagoga ho Salamone na obayangi lati fad. ¹² Lofa natel Petur anyani, ngete ho nahitarangahiso niho lati, "Ite lati ho Isarayil, nanyuo te itialati nihojie to ho ohisiarahi jie ngete odaha to nagolon hojie? ¹³ Najyok ho Abramo, cebu noho Ayisak, cebu noho Yakobo, Najyok ho monyie hojie, etokwat lahegiamani ho ngete Yesu. Ngete laja lofa isiarahisite cebu idayasi niha temeni ho homom ho Pilato, lofa najo ngete alahahihiso ngete. ¹⁴ Adayasite La- Onyila cebu La-otirahi,ite ho nahifiasu lahefadaritani ojo ongida olahahini nihote. ¹⁵ Ifadasitee Lohobu ho hisu, la itedetu Najyok toyeyi---- cebu ohira ijie ahapiahak niho anya hiram. ¹⁶ Tahanya, to nahiruk to nafure ho ngete, ale twani itia latate cebu ijianata, ihonahini fa ngete la ogol. Nahiruk niho Yesu esiarahi nihongete na ngidari ho kwan, nihatemeni hote fad. ¹⁷ Tahanya, hilasirak, ajien ne ojo ehwanatate to nabiangan jianan to ho igiamariti lolohitwaha hote. ¹⁸ Nyuo hati nareji huja iramahi Najyok to nahutuhe ho laheramahitak ho hiramita fad, ojo ongida Kristo ipadata. ¹⁹ Iwahasi,inaha,cebu ibielinete, , ongida nepalita hote iduhari niger, ongida ba olotu raha noholongi ho wiriarita nihatemeni ho Hobu; ²⁰ cebu ongida ngete osulaya Kristo lofa owutuni nihote, Yesu. ²¹ Ngete Laja la ongida nahide ifwotu many niholong ho hinyahiniso ho reji fad, ho huja oteny Najyok many fa berien to nahutuk ho laheramahita, ho hiramita la onyila. ²² Muse tarihe ojo, ' Itedetu hadi Lohobu Najyok laheramahitani ho hiramita to ho ne tohiji ho hilasirak hote. Ongida ite itiyirati niho nareji huja otianya ngete nihote. ²³ Olotu ba nahiram niho lati hula obu itiyire niho laheramahitani ho hiramita ongida iduhari ngete to hiji ho lati.' ²⁴ Ee, cebu laheramahitak ho hiramita many niho Samuele cebu ehule ofoni nihalu ho ngete, otianye sing niger cebu iwowangahini hunya holongi. ²⁵ Irahatate emusak ho laheramahitak ho hiramita cebu noho nayomo lofa ihon Najyok ho fafaiyirok hote, toho ojimitere ngete niho Abramo, 'To hinyemoti hoji, nekati fad ohorihini ba sing najwaha.' ²⁶ Lo fa netedetu Najyok lahegiamani ho ngete, osulahi fa ngete nihote berien, ongida ohijok ite nihitebielinere lati fad nihote niho nemanyita hote huja orohoji."