¹ "Hilasirak ho monyie, itiyirati nitianya ho ne na alo ne itianya tahanya." ² Lofa netiyiri lati Paulo otianya nihosing to natianya ho Hiburu sing ho nahiningo. Ngete ho najiman, ³ "Ne loho Yahud, ohiyise ne Tarsis noho Cilicia, nyuo hati ohitejiani ne fa nihanya hang nihijiaha ho Gamaliel. Ohitete lehini fa ne nehoiha hechihita ho fafairok hojie. Ahayin ne to Najyok, toho irahiteretete fad baya. ⁴ Etegem ne tanya Hoi many niyeyi; ator ne fad laliawa ho nangorwo epirehi sing nihaji ho lotwarari. ⁵ Cebu lolohitwaha ho padir hulo ho lolohitwaha fad otum ohiramahini ite ojo amojinita ne waragaji nihosing niho hilasirak to Damaska, nihone nilojiere da. Ongida ne alo itorino lati hula ijifite anya Hoi Yerusalem ongida obehi. ⁶ Lofa nadaha ne cebu na nyiha ne Damaska, to nakil ho farani, turuhunyak nafarangi tohide ho nawulori ohilur ne. ⁷ Ne ho nahuyari nifok ho c ho nahitiyiriniso namurut ojo nihone, 'Saulo, Saulo, nanyuo ji itegiama ne?' ⁸ Ne ho na hitarangahiso, 'Ngai ji,Lohobu?' Ngete ho najiman niho ne, 'Ne Yesu loho Nazaret, la iloji itegiama.' ⁹ Hulo fa obwoni ho ne ateli nafangan, nyuo hati obu sing itiyiri namurut ho ngete la otianya niho ne. ¹⁰ Ajo ne, 'Nanyuo ne hatum ehon, Lohobu?' Lohobu ho najiman niho ne, 'Todete, ilo toho Damaska; ilo igiama nareji fad huja ba ohiramhini iji ojo ongida iji ihon. ¹¹ 'Abu ne atum atiala tananyuo to nafarangi, ne ho naloten toho Damaska la ohirihere arihoro inefite tene hes ho lati hulo fa ohidaha ho ne. ¹² Alo ne ihorihiso lobo latwani la onya nafure ho ngete Anania, latwani la ijifito nahiramita ho Najyok cebu lati ho Yahud fad otianya ngete na ongida. ¹³ Ngete ho na lotiniso niho ne, ho nabotia niger ho ne, ho najiman, 'Hilasi Saulo, tomoju nohonyehite hoji.'Nehene holong ne ho natialan ngete. ¹⁴ Tiye ngete ho najiman, 'Najyok ho monyie hojie ahi nyumu iji ongida ijien nawahan ho ngete, nitialari Lahangidarini, cebu nahitiyirari namurut na olotu to hutuk ho ngete. ¹⁵ Ira hadi ji ahapiahani niho ngete niho lati fad niho nareji huja etial ji cebu itiyir. ¹⁶ Tahanya nanyuo ji itilasu? Todetete, ongida ohijuhi iji, ongida ji ilalaya niger nahi palita ji, ingeleso to nafure ho ngete.' ¹⁷ Lofa nayitu ne to Yerusalem, ne amojo nihaji ho lomojere, namininga ho Najyok ho naleyeji niho ne. ¹⁸ Ne ho natialan ngete ojo niho ne, 'Toringite, idahi Yerusalem kerem, tananyuo obu ba iruhi natianya hoji to ne.' ¹⁹ Ne ho najiman, 'Lohobu, sing to nakwanite hosing ojieni ojo atwarahi ne cebu abek lati hula iruhi niho ji nikelesiaji fad. ²⁰ Lofa nejuhuno nohoto ho Stefano lahapiahani hoji, abotia fa ne engati cebu eruk, etieso fa ne nabongoji ho lati hulo fa ifadari ngete.' ²¹ Nyuo hati ngete ho najiman niho ne, 'Idahi, to nanyuo ahisulahi ba ne iji toho niho paganoji.''' ²² Lati ho nahisiarahiso ngete ongida otianya niho anya hiram. Nyuo hati tianya sing ho nahigworita ho na jiman, "Iduhasi la twani to fok: obu osiriu ngete isu." ²³ Lo fa sing hegogworite , ipirehite nabongoji hosing cebu ipirehite nafur nilobwangi, ²⁴ lolohitwahaji ho segere ho na hiramahiso ojo ongida iyere Paulo nilotwarari ho segere. Ho najiman ojo ongida ifi ngete, to nakaroti, ongida ngete to nakwan ho ngete ojien nanyuo sing igworite na orohojaya niho ngete toho naja. ²⁵ Lofa natori ngete to nahofito, Paulo ho najiman niho lolohitwahajik ho segere lo fa obotia niger ho ngete, "Osiriu nihote nibehere latwani la ora loho Roma obu ipalaya?'' ²⁶ Lofa netiyir lolohitwa hajik ho segere ngete anya,ngete ho naloten niho lolohitwahaji ho segere la inefito lasegere ho najiman niho ngete, ojo, ''Nanyuo iji iwak ihon? Ora ale twani loho Roma.'' ²⁷ Lolohitwahaji ho segere ho nalotiniso ho najiman niho ngete, "Iramahi ne, ireji loho Roma?" Paulo ho najiman, "Ee." ²⁸ Lolohitwahaji ho segere ho nahitarangahiso, "Ora ngole ta narobia huja olwaji ahorinere ne narahitere loho Roma. "Nyuo hati Paulo ho najiman, Ohiyisini fa ne aloho Roma." ²⁹ Tiye ehule ti hulo fa ofwr hifiasu ngete ho nahidahiso ngete. Abayang fa lolohitwahaji ho segere, lo fa najien ngete ojo ora Paulo lo ho Roma, tananyuo ator ngete Paulo.