¹ Paulo hanatiala niho lolohitwaha ho najiman, "Hilasirak, etwong ne nehatemeni ho Najyok nihigigilita fad huja ongidari many niholong ho baya." ² Lolohitwahaji ho padir Anania ho nahiramahiso ehule obotie niger ho ngete ojo tobehoto ngete nihutuk. ³ Paulo ho najiman niho ngete, "ohibek ba iji Najyok, iji ale ihon nakwan ahanyilajani ibot hati to hotwa. Itwongoji ningotere nolokiho ho ne ojo ongida ohibehi ne, no be tolokiho?'' ⁴ Ehule obotie niger ho ngete ho najiman, "Nehoi naja na imorereji lolohitwahaji ho padir lobolo ho Najyok?'' ⁵ Paulo ho najiman, "Abune ajien, hilasirak, ojo ara ngete apadir lobolo.Igierehini, "Obu be ji itianya na orohojaya to latwani la inefito lati." ⁶ Lofa natel Paulo ojo nilohifurere obwoni hilihe ora lo Sadducee cebu hilihe orahi loho Farise, ngete ho natianya bebe niho lolohitwaha ho lokiho, "Hilasirak, ara ne loho Farise, lahito ho Farise. Tana nyuo eruk tarihe nahi buhuniso ho lahayeyak ngete anya longoterete ne." ⁷ Lofa nateny nget, narisa ho nadeto nihiji ho lati hula obwoni nilohifurere, lahangotok ho hiramita ho nahwara. ⁸ Lati ho Saddusi ojimi obe nahibuhuniso to yeyi,obengi anjiloji, cebu obengi nolohailongi, lati ho Farise ojimi huja reji fad obwoni. ⁹ Nahigogworita nobolo ho nahidwong, hilihe lahegierok hula orahi aloho Farise ho na deto ihide ho narisa, ojo, "Obu jie ohihorihi ibwo nasinge noro niho ale twani. Kuya nara nolohailong kuya anjelo lotianya niho ngete?" ¹⁰ Lofa nabwon narisa nobolo, lolohitwahaj ho segere ho nabayangi ojo ichichiri ba sing Paulo apinyi pinyi, ngete ho nahiramahiso lasegere iyare Paulo to nagolon nifok to hiji ho lati lahangotok ho hiramita, ongida iyare ngete nilotwarari ho segere. ¹² Lofa nalotu nafarani, hilihe lati ho Yahud ho nahitini: ojo ba sing ohinya ibwo nasinge kuya ohimat many nahifadeye jie Paulo. ¹³ Orahi fa lati ilanyi nehejiek ongon hula ihoni anya singe. ¹⁴ Sing ho nafoten niho lapadir hula obolori cebu niho lolohitwaha ho najiman, "Ahi hwanahi jie nakwanite hojie nihitini na obolo bebe, nibiangan nyesere many nahifadaya jie Paulo. ¹⁵ Tahanya, inaha, ikie lolohitwa ho lokiho iramahini lolohitwahaji ho segere ongida iyieno ngete nihote, hejobu hegigilotote nahiram ho ngete angida. Toho niho jie, ahihuhumahino jie nihifadajiere ngete hobe ngete olotu inyini." ¹⁶ Nyuo hati iha hinasi ho Paulo ho nahitiriniso itiminingase fa sing nihitilasere Paulo,ngete ho naloten ho nahiruyoriso nilotwarari ho segere ho nahiramahiso Paulo. ¹⁷ Paulo ho na ngeleniso lahatialani ho lotwarari ho najiman, "Iyare ale hito niho lolohitwahaji ho segere, obwon hebwo nahiram nihiramahinere ngete." ¹⁸ Ele hitialani ho lotwarari ho nahiyaru ilehito ho nayaru ngete niho lolohitwahaji ho segere ho najiman, "Paulo lahatwarani lohingeleu ne niho ngete, ho nahiramahiso ne ojo ongida ne eyieno alehito nihoji. Obwon ngete hebwo nahiram nihiramahinere iji." ¹⁹ Lolohitwahaji ho narihoro ngete niho ibwo namaji ho na obengi lati to da ho nahifi ngete, "Nanyuo naja liwak iji iramahiso ne?" ²⁰ Ele hilahaji ho najiman, "Atianyahine lati ho Yahud nihi fiasere iji ojo ongida ji iyaru Paulo hubanyi niho lahangotok ho hiramita, toho nomo ofwe ba sing hifiasu angida niho anya hiram. ²¹ Nyuo hati hesiarahi niho sing, tananyuo obwoni lati hula otumi ilanyi nehejiek ongon hula orase ngete. Etini sing nibiangan nyesere kuya nimatari many hati nefadari sing j ngete. Adobu tahanya ehuhumahine sing, itelase nahiruk ho ji." ²² Lolohitwahaji ho segere ho nahidahiso ele hito olo, lofa neramahi ngete, "Heramahi ha niho lobo latwani ojo eramahi ji hunya tenyita niho ne." ²³ Ngete ho nangeleniso lahejifitok ho ngete harik ho najiman, "Iduhusu lasegere namiya harik hula ihuhumahine nafoten many Saesarea, ho lati nehejek metaharik hula oyire nakoni koniji cebu, harik loho feria. Ongida odete to na harie." ²⁴ Ngete cebu ho na hiramahiso sing ongida isiarahini natiyiangi huja oyiro ba Paulo, ongida iyare ngete angida niho Felix lahenefiteni. ²⁵ Tiye ngete ho na higierehiso newaraga toho anya: ²⁶ Kalaudio Lisia niho lahi nefiteni Felix, nihihata. ²⁷ Inefi fa lati ho Yahud ale twani ata sing efadari ngete, lo fa nalotu ne nihosing ho lasegere nilwahinere ngete, lo fa netiyir ojo ngete loho Roma . ²⁸ Awak ne jianan nanyuo sing itwobi ngete, ne ho na hiyaru ngete niho lahangotok ho hiramita. ²⁹ Etiyir ne ojo itwobi ngete to nahifiasu he manyita hosing, nyuo hati obe ibwo nahiram na orohojaya nihongete na otum ongotohini nihongete nayeyi. ³⁰ Iramahini niho ne ojo obwon namomongito noho hifadariso ngete, asulahi ne ngete nihoji, cebu eramahi lahetwobok ho ngete ongida iyiene nareji huja ongotohini sing niho ngete nihatemeni hoji. Awaa. ³² Lofa ta nahubanyi, lasegere ho nahidahiso lati koni koni ofie ho ngete sing tanakwanite hosing ho na yitiniso nilotwarari ho segere. ³³ Lofa nesiahi lati ho koni koni Saesarea ho na hisiarahiso newaraga niho lahi nefiteni, sing cebu ho nahitete lehiso Paulo niho ngete. ³⁴ Lofa neken lagalani newaraga, ngete ho nahifi niho ani hang Paulo olotu; lo fa najien ngete ojo ora fa Paulo lo ho Silisia, ³⁵ ngete ho na jiman, "Ahitiyiri ba ne iji angida lomo nafoni lahetwobok hoji inyini. "Tiye ngete ho nahiramahiso ojo ongida ihwanahini Paul nihang ho Herode.