¹ Lofa nechung nahi gworita, Paulo ho nasulariso lolohejehi ho nahitogol sing.Tiye ho najiman awa niho sing ho naloten toho Makedonia. ² Lofa nalo ngete niho ehwe hangite fad itotos laheruhok bebe,ngete ho naloten toho Gris. ³ Lofa netwong ngete nayafaji hutik da, lati ho Yahud ho namwanga ngete lofa nawak ngete langan toho Siria, ngete hanayiteriso hara Masedonia. ⁴ Lati hula inyiamare ngete many Asia orahi fa Sopata iha Pyrrus to Berea; Aristarchus ho Sekundus, sing fad to kristianoji ho Tesolonika; Gaia to Derbe; Timateo; ojo Taichiku ho Tromfimu to Asia. ⁵ Nyuo hati afwe hule ti to nahatemeni hojie ho nahitilasu ijie Troya. ⁶ Ohilangu jie to Filippi lofa natuhohino noholongi hebune na obengi nabula, cebu niholongi miyet ijie hanafoniso niho sing Troya. Ihitwong jie da noholongi metaharik. ⁷ Niholong noho abito noho metaharik, lofa nahifurohino ijie harabito nibunyere nebune, Paulo ho natianya niho lahiruhok. Owak fa ngete loten to nahubanyi, ngete ho nahitiringa itianya many ora ahihiji ho harie. ⁸ Olweji fa nahimaji niho nahaji na ohibwonitere jie harabito. ⁹ Itwongo fa lobo lahilahaji nilotulet la onya Eutika, la ogetoro. Paulo hetahadoro natianya hongete, ale hilahaji ho geto, ho nahuyuno nifok to hide ho haji na ogetere ikuruni ngete la ye. ¹⁰ Nyuo hati Paulo ho naloten nifok, ho nahipirehiso nakwan ho ngete niho ngete, ho nahimot ngete. Ho najiman, "Hemujutati hari, isu ngete." ¹² Sing ho nahinyahino hari ele hito la isuu, okwame sing bebe. ¹³ Ijie to nakwanite hojie lohifwo to nahatemeni ho Paulo tanatigol ho nalangan toho Assos,namaji na ohiwak ijie iyajiere Paulo. Ngete anya nasinge na owak ngete ihon to nakwan ho ngete, tananyuo owak ngete loten tanafok. ¹⁴ Lofa nahiriamahino hojie Assos, ijie hanahiyaru ngete nitigol ho nafwoten toho Mitylene. ¹⁵ Ijie ho nafwoniso toda ho nahihisiak to nahubanyi hongete ningati ho Khio. Ta nahubanyi hongete ijie ho nahisiahita Samos, lomoholongi hongete ijie ho nafwoniso nihiji ho hang ho Mileta. ¹⁶ Ohirihi Paulo nehuhumahino nalangan hara Epesus, ojo ongida ngete obu iyaru ibwo noholong Asia; niho ngete oruharu toho Yerusalem niholong no fa ongirinere Nolo hailong Na- Onyila, kuya hatum fa niho ngete nihe giamari. ¹⁷ To Mileta ngete ho na suluriso lati toho Epesus ofwe ngeleno niho ngete lolo hitwaha ho kelesiaji. ¹⁸ Lofa nafwoni sing niho ngete, ngete najiman niho sing, "Ite tanakwanite ijianatate,many to lochifit ho holong na atirehinere ne neheju ho ne Asia, nahitwongo ho ne hote tihitik. ¹⁹ Etiringa ne igiama niho Lohobu to nariajan ho cebu tanahiyok, cebu to nahipadata lofa idwong niho ne to namwanga ho Yahud. ²⁰ Ijianatate tatali Ne abu amon nahiramahiso ite ibwo nasinge na ongida, ho tatali ne ahite jien ite nihiji ho lati cebu adaha to nahayi. ²¹ Ijianatate natiringa ho hiramahita lati ho Yahud cebu lati ho Grik to nahiwaha niho Najyok ho nahiruk niho Lohobu hojie Yesu. ²² Tahanya, totialati, alo ne ho Nolohailong Na-Onyila toho Yerusalem, abu hati ojien nareji ba huja otum idwongi niho ne da, ²³ mayak ojo Nolohailong Na-Onyila lora ahapiahani niho ne nihangite fad ho najiman ene nyororo ho nahipadata ohitilasu ne. ²⁴ Nyuo hati abu ne ihwanahi ojo nahisu ho ne ongida bebe nikwan ho ne, ojo ongida ne atuhohi nahinamita ho ne cebu nahigiama na ahorihine niho Lohohobu Yesu, narahitere ahapiahani niho nefanjelio ho ngidari ho Najyok. ²⁵ Cebu tahanya, totialati, ajien ne ojo ite fad, niho hula alojierenere ne itejianari nahang ho Najyok, obu ba te itialata nohomom ho ne hari. ²⁶ Inaha, ahiramahi ne nihote niho anya holong, ojo obe nehene ho ne obwon hebwo nohoto ho lobo latwani. ²⁷ Abu ne atum amon nihiramahiso nihote nawahan ho Najyok. ²⁹ Ajien ne ojo nihalu ho loten ho ne,iruhuni hadi nolowohoji nihiji hote,ho nabiangan hidahiso napore. ³⁰ Ajien ne ojo dobu tehiji ho kwanite hote hilihe lati ofwoni hadi ho nahohwalaru nareji, nihiyajiere lolohejehi to ho nihosing. ³¹ Tobwanata ahetiak. Ihuyasu ojo niho nengaji hutik abu ne otoboj nahiramahita nihote nihote tanahiyok to naharie ho nafarani. ³² Tahanya ahihwanahi ne ite nihes ho Najyok, cebu nihiramita ho ongidari hongete, na ohitoboloru ite nihide cebu isiarahi nihote nalunyohita niho ehule fad hula isiarahini nakwanite hosing niho Najyok. ³⁵ Abu ne awak nabilet ho lobo latwani, kuya nabongoji. ³³ Ite tanakwanite hote ijianatate ojo hunya hes ligemini nawahita ho ne cebu nawahita ho hulo fa obwoni ho ne. ³⁴ Niho nareji fad ahisiarahi ne ite nahitetelehiso ojo tatali te hetumata lwahati la haniamak to nahigiama, cebu tatali te hetumata ituhuyasu nahiramita ho Lohobu Yesu, nahiramita huja ojo ngete to nakwan ho ngete: "Ongoda na hisiarahita bebe ilany namojiniso." ³⁶ Lofa nateny ngete to ho ja, ngete ho narugungi nifok ho namojo ho sing fad. ³⁷ Sing fad ho nayo bebe ho na huyari nimurut ho Paulo ho na juran ngete. ³⁸ Ilongite fa sing fad to na nyuo to natianya na otenyu ngete,ojo obu hadi sing oteli nohomom ho ne hari. Sing ho nahinyiamaru ngete nitigol.