¹ Lo fa hobwon Apollo Korint, Paulo olo to denge ho hang ho nalotiniso nihang ho ho Epesu, ho nahorihiso hilihe lolohejek da. ² Paulo ho na jiman nihosing, "Ehorihisi te Nolohailong Na- Onyila lofa ne ruhotote?" Sing ho najiman niho ngete, "Obu, obu jie ohi tiyir Nolohailong Na- Onyila." ³ Paulo ho najiman, "Ohijuhi fa ite to nanyuo?" Sing ho najiman, To nabatisimo ho Yuwana." ⁴ Paulo ho nahi tarangahiso, "Ijuho fa Yuwana ta nabatisimo ho hiwaha. Ngete hanahiramahiso lati ojo ongida sing iruhi nihelejie olotiniso ba nihalu ho ngete, niho Yesu." ⁵ Lofa netiyiri lati anyani, ejuhi fa sing tanafure ho Lohobu Yesu Kristo. ⁶ Lofa narwehi Paulo nehesbhongete niho hosing, Nolohailong Na-Onyila hanalotiniso nihosing sing hanatianya hama hama to netenyita nahiramita. ⁷ Orahi fa sing fad tomon ho harik. ⁸ Paulo ho naloten nimaji holomojere hanatianya bebe niho namaji niyafaji hutik. Ilany fa ngete nitianyari cebu otananita lati niho nareji ho hang ho Najyok. ⁹ Nyuo hati lofa nagoli ilihe lati ho Yahud cebu obu obayangi, sing ho hanahichak itianya nareji huja orohoji niho nehoi ho Kristo nihatemeni ho lati. Paulo ho na hidahiso sing ho nahiyaru kristianoji niger tiye hosing. Ngete ho nahichak itianya noholongi fad nilohitejianari ho Tiranna. ¹⁰ Etiringa anya niho nengaji harik, ojo ongida hula fad omanye Asia itiyiri nahiram ho Lohobu, niho Yahud cebu Grik. ¹¹ Igiama fa Najyok nahigemita huja ogoli to nehes ho Paulo, ¹² Ongida dobu lahadiahak adwanyi, nolohailong na ibot olotu niger nihosing no fa niduhuni sing nahifufusita ho hohomomite cebu to nabongo to kwan ho Paulo. ¹³ Nyuo hati obwoni fa hilihe lati ho Yahud hula idu harite nalohailong na ibot odahe hara ene maji hula iyare nafure ho Yesu niho nahi giamari hosing. Sing ho natianye niho ehule obwoni ho nolohailong ne bot; Ojo, "Ahiramahi ne ite to Yesu lobo otianyito Paulo ojo ifwata." ¹⁴ Ehule fa ihoni anya,orahi fa sing lemusakbmetaharik ho lohitwahaji ho padiri ho Yahud , Sceva. ¹⁵ Nolohailong na ibot ho nahitarangahiso nihosing, "Yesu ajien ne, cebu Paulo aajien ne; nyuo hati bo ngai te?" ¹⁶ Nolohailong nebot niho ele twani ho nahifirihiso niho ehule ti metaharik ho nahilanyi niso sing ho nalumon sing. Sing ho nahinam niger hene haji nolongature ho nangarangan. ¹⁷ Afwoni lati ho Yahud cebu lati ho Grik fad jianan, hula omanye Epesus. Sing ho nabayangi bebe, nafure ho Lohobu Yesu ho nahitokwata. ¹⁸ Cebu, ofwoni kristianoji olwaji ho nahiwaha cebu iruhi nareji ho ihoni sing huja orohoji. ¹⁹ Lati ho kiana ho nahiyeno nahi nabuhi hosing ho naswahariso nihatemeni ho lati fad. Lofa nekeni nangidari hosing, orahi fa nalif nehejiek miyet na biliata horobia. ²⁰ Tinya nahiram ho Lohobu ho nahisarahisk bebe to nehoi yiha huja ogoli. ²¹ Tahanya lofa natuhohi Paulo nahigiama ho ngete to Epesus, Nolohailonh ho nahiramahiso ngete ojo ongia olo hara Makedonia cebu hara Acaia nihoi ho ngete toho Yerusalem; ngete ho najiman, "Lofa la bwon ne da, awak cebu ne atel Roma. " ²² Paulo ho nasulariso lohejehi ho ngete harik toho Makedonia, Timateo ho Erasta, hulo fa olwahi ngete. Nyuo hati ngete tanakwan ho ngete itwongo Asia niho hinihe noholongi. ²³ Abwon nahiyeyala na obolo bebe nihang ho Epesus nihiram ho Hihoi. ²⁴ Lobo lahedwongoni ho biliata la onya nafure Demetria, la ihuhum nolomojere to nakialare ho Diana, ho nahi iyeno nareji olwaji nohohi tenyanga niho lati hula idwonge. ²⁵ Ngete ho nahi furohiso sing harabito lati hula igiame hosing nihene higiama ho najiman, "Lolohitwaha, ijienatate ojo niho anya ite nyianga ohihorihita jie narobia olwaji. ²⁶ Itialatate cebu itiyirata ojo, obu Epesus hama, nyuo hati nahangite ho Asia fad, ale Paulo etugulihi cebu isiarahi lati ibiele. Ojo ngete obengi na jiohi huja ihuhumuni tenehes. ²⁷ Obu nahipalariso hohitenyanga ho jie hama, nyuo hati namaji holomojere ho najiohi nobolo be Diana otum ba itaraha na orohojaya. Kira ba ngete itilitaya nakwatan ho ngete, ngete na omoje lati ho Asia cebu nafok fad." ²⁸ Lofa netiyiri sing anya, ifuti fa sing ho nahilongojita ho nayo, ojo, "Nahaboloroni Diana noho Epesian." ²⁹ Obolo fa nangungunuta nihotwa ho hang fad, lati fad ho nahinam nilotubari. Sing ho nahinef lati hula ilihite ho Paulo, Gaias ojo cebu Aristarchus, hula ofoni to Makedonia. ³⁰ Owak Paulo iruhiso ni hiji ho lati, nyuo hati lolohejehi ho nahitihiniso ngete. ³¹ Cebu, hilihe lahigiamak ho hang ho Asia hulo fa orahi amorite ho ngete ho nasula hiso niho ngete natianya na ogol ojo ongida ngete obu iruhi nihaji ho lotubari. ³² Hlihe lati igworite niho na singe abito, ilihe niho ibwo,obwoni fa lati fad ho na ngungunuta. Obu lati ojieni na nyuo fa sing ofwoni harabito. ³³ Iyene Yahud Alexanda niger to ho hiji ho lohoi lati ho nahitotwongohiso ngete niha temeni ho lati. Alexanda ho natianya nihosing tenehene hongete nihiramahinere niho lati. ³⁴ Nyuo hati lofa nagilini sing ojo loho Yahud, sing fad ho nayo niger tanamurut abito manyi nitialita ho holong harik, "Nahaboloroni Diana noho Epesian." ³⁵ Lofa netining lahegiereni ho hang nalohoi ho lati, ngete ho najiman, "Ite lati ho Epesus, ali twani lobwon la obu ojien ojo nahang ho Epesus itwongo alotunari ho lomojere ho naha boloroni Diyana ho nakialare na odwou to hide? ³⁶ Netel ji ojo obu hunya orisine, ongida ite iningete cebu obu igiamati ibwo nasinge na orohojaya. ³⁷ Eyenetete hule ati niho anya lokiho hula orahi kuya aharujutok ho maji ho lomojere kuya otianye nahi ramita huja obu ongidari noho na ngorite ho jiok. ³⁸ Inaha,nabwon Demetria ho lahehuhumak hekialarita hulo fa obwoni ho ngete hebwo nahitwomo niho lobo, ongase nolokiho cebu obwoni lahinefitok. Ikie sing itotwobite nakwanite hosing. ³⁹ Nyuo hati netahitete ibwo nasinge nahiramita hinihe, ihuhumi ba tolotubari nomo hotihitik. ⁴⁰ Tarihe ahitwobi ijie norohojaya tanahigogworita hunya holong ho ngalasu. Obe ibwo nahiram neyeno anya ngalasu, obu bejie ohitum ohirahi ngete." ⁴¹ Lofa nateny ngete anya, ngete ho nahitasarahiso lati to lotubari.