¹ Nihalu ho hunya reji Paulo ho nahidahiso Aten ho naloten toho Korint. ² Ngete ho nahorihiso lobo latwani loho Yahud nafure Akwila, latwani loho Pontio; ho nyiha nalo tiniso ho ngete to Itali ho nguru na ngete Priskilla, tana nyuo eramahi Kalaudio ojo niho lati ho Yahud fad ongida idahini Roma; Paulo hanalotiniso hosing; ³ Paulo hanamanya cebu hanahi giama hosing tananyuo okialare fa nahigiama hosing. Orahi fa sing ahehuhumak ho hayi. ⁴ Otenyito fa Paulo nilo mojere noholongi ho meta harik tihitik. Ngete nataniniso lati ho Yahud ho lati ho Grik. ⁵ Nyuo hati lofa nafoni bo Sila ho Timateo n to Makedonia, Nolohailong ho nahitugulihiso Paulo ongida iramahi niho lati ho Yahud ojo ora fa Yesu Kristo. ⁶ Lofa narise Yahud cebu more ngete, Paulo hana hiruru nabongo ho ngete niho sing ho najiman nihosing, "Ikie nohoto hote obwon nihosi hote; Alunya ne. Niho tahanyani, Alo ba ne niho paganoji." ⁷ Ngete ho naloten toda ho naloten nihaji ho Tito Justo, latwani lobayang Najyok. Onyiha fa ho nahaji ho ngete nilomojere. ⁸ Krispa, lahi nefiteni ho lomojere ho lati ho haji ho ngete fad eruhi Lohobu. Lati ho Korinto hula olwaji hulo fa itiyire Paulo ho nahiruk cebu ijuhi. ⁹ Lohobu ho najiman niho Paulo to naharie nimininga, "Hebayang, nyuo hati to tianye heningo. ¹⁰ Abwon ne hoji, obe ba lobo latwani ohiriafu iji, abwon ne ho lati olwaji bebe ni hanya hang." ¹¹ Paulo ho namanya da nenga ho nayafaji ile, itejiana nahiram ho Najyok niho sing. ¹² Nyuo hati lo fa nalotu Gallio rahan ahenefiteni ho Akaia, Yahud ho natianya na orohojaya niho Paulo ho nahi yeno ngete nilokiho; ¹³ sing ho najiman, "Otuguliasu ale twani lati ojo ongida obayangi Najyok na obwon hama niho nicihit." ¹⁴ Tiye lofa nawak Paulo tianya, Gallio ho najiman niho Yahud, "Ite Yahud, kuya nara tarihe ojo ora ahiram hepali, osiriu ba nihitegiamari ngete. ¹⁵ Nyuo hati toho ora hunya ahi fisita to nahiramita ho na fureto cebu necihita hote, ihu humata te tanakwanite hote. Abu ne awak ongida ora ahangotohini ho hunya hiramita." ¹⁶ Gallio ho nahiramahiso sing idahini nahitwongi ho lokiho. ¹⁷ Sing fad ho nahi nef Sostene, lahinefiteni ho lomojere ho Najyok ho na lumon ngete nihatemeni ho lokiho.Nyuo hati obu Gallio ipara nasinge na ihoni sing. ¹⁸ Lo fa netwong Paulo da n noholongi olwaji, ho nahi dahiso hilasirak ho naloten hara nihari toho Siria ho Priskilla ojo Akwila. Hobe olo to maji nobotiariti natogoli, sebu sensreae, isiatahi fa ngete ongiti nafofi hongete to nanyuo itin fa ngete to nahitina ho Nasirt. ¹⁹ Lofa nafoni sing toho Epesus, Paulo hanahidahiso Priskilla ojo Akwila da, nyuo hati ngete to nakwan ho ngete ho naloten nimaji na omojerete nitianyari ho lati ho Yahud. ²⁰ Lofa nefi sing Paulo ojo ongida itwongo noholongi olwaji, ngete ho nahidayariso. ²¹ Nyuo hati ngete ho na jiman, "Ayitu bane hari nihote nara awahan ho Najyok. "Ngete tiye ho nadwahahiso natigol to Epesus. ²² Lofa nangirehi Paulo Saesarea, ngete ho nadwahan adwahan nihihatari nakelesia ho Yerusalem cebu ho nahijuru to Antiok . ²³ Lofa natuk ngete noholongi hinihe da, Paulo ho naloten hara nifok ho Galatia cebu nifok ho Frigia ho nahitogol lolohejehi. ²⁴ Lobo latwani loho Yahud la onya Apollo, la oyise Alesanda, ho nalotiniso Epesus. Oguny fa ngete nitianya bebe cebu ogol nihiram ho buhi. ²⁵ Etete lehini fa Apollo nihitejianari ho Lohobu. Ogol fa nataji to no lohailong, ngete hanatianya cebu itejiana nareji niho Lohobu, nyuo hati ojien ngete nahijuho ho Yuwani hama. ²⁶ Apollo ho nahichak itianya bebe nimaji ho lomojere. Nyuo hati lofa neti yir Priskilla ho Akwila ngete, sing ho nahitomorit ngete ho nahiramahiso niho ngete nehoi ho Najyok bebe no tirahi. ²⁷ Lofa nawak ngete daha toho Acaia, hilasirak ho nahi togolohiso ngete ho nahigie rehiso niho lolohejehe hula obwoni Acaia ongida itani ngete. Lofa nesiak ngete, ngete ho nalwahan ehule iruhi to nangidari. ²⁸ Apollo ho nahitejien lati ho Yahud tanagolon ho ngete cebu nolofero, itetelehita tana higiero ojo Yesu ngete Kristo.