¹ Lofa nafwe sing hara nihiji ho hangite ho Amfipoli cebu hara Apolonia, ho nafwoniso nihang ho hang ho Tessalonika, namaji nabwonitere nolomojere ho Yahud. ² Paulo, toho nimanyita hongete, hanaloten nihosing, ho niho noholongiji metaharik hutik otianya ngete hosing niho nahiram Najyok. ³ Ongasu fa ngete nabuk iramahita ojo osiriu fa niho Kristo nahipadata cebu bihibuhuniso hari toyeyi.Ngete hanajiman, "Ale Yesu la eramahiso ne niho te ora Akristo." ⁴ Ilihe lati ho Yahud atanini fa ho nahitilahino niho Paulo ho Sila, ho cebu lati ho Grik laheruhok niho Najyok, nangorwo huja okwati ho nalohoi ho lati. ⁵ Nyuo hati lati ho Yahud hula obu iruhi, ohula obwoni ho hayini, hanahiyaru lobo latwani to maji ho lohitenyia ngari, hanahifurohiso lati hara bito,ho nahitahahayata nohotwa ho hang. Hanahitik nahaji ho Yason, owahi sing ipihiniso Paulo ho Sila niger niho lati. ⁶ Nyuo hati lofa na bu sing ohorihini sing,sing ho narihiniso Yason ho hilasirak nihatemeni ho lahigiamak ho hang, oye, "Hulati hula ibieli nihide nifok afoni idia cebu. ⁷ Hulati hula omoju Yason igemi na orohojaya niho nahigiama ho Saesar; ojim ojo obwon lobo lohobu---Yesu." ⁸ Lofa netiyiri lati ho lahigiamak ho hang hunya reji, ilongojite fa. ⁹ Lofa neduhari sing narobia niho Yason ho lati hilihe, hanahidahiso sing ofwe. ¹⁰ Niho ene harie hilasirak hanasulariso Paulo ho Sila toho Berea. Lofa nesiahi sing da, hanafoten nimaji holo mojere ho Yahud. ¹¹ Tahanya hulati obwoni fa ogunyi fa sing ilanyi ehule to Tessalonika,ifwotini sing natianya tanahihuhumahino, ongase nabuhi ho Na jyok tihitik nihorihinire kuya otirahini hunya reji. ¹² Tinga olwaji fa lati hula iruhi, ho hinihe nangorwo ho Grik ho huja okwati ho laliawa hula olwaji. ¹³ Nyuo hati lofa najieni Yahud ho Tessalonika ojo itejiana cebu Paulo nahiram ho Najyok niho Berea, hana foten da nihisuswari nalohoi ho lati. ¹⁴ Tiye, hilasirak hanasulariso Paulo ongida olo toho niger ho hari, nyuo hati Sila ho Timateyo obwoni da. ¹⁵ Hulo fa odahe ho ngete ho nahiyaru ngete many nihang ho Aten. Lo fa nedahini sing Paulo da, Sila ho Timateo nahiramahiso sing ojo ongida ofwe niho ngete kerem. ¹⁶ Tahanya nyuo hati Paulo itilasu sing niho Aten, no lo hai long fa ho ngete atem toho ohorihi ngete lati nihe ne oba yanagi na singe ne huhumi. ¹⁷ Ngete ho nahigigilo hosing nimaji holomojere ho lati ho Yahud cebu hohula omoje Na jyok cebu hehule iriamahiti hongete noholongi fad nimaji holohitenyiangari. ¹⁹ Sing hanahiyaru Paulo ho nahiyeno ngete nidenge ho Areopaga, ho najiman, "Owaki ijie jianan anya hetejiana nangejuk lo fa itianye ji? ²⁰ Iyeno ji hinihe nahitejienita huja obwoni hama nijohe hojie. Ojo tinga, ohi waki jie na nyu sing ojimi." ²¹ (Tahanya lati ho Aten fad cebu lahatomonok hula omanye da ipapale no holong ho sing nyuo hati kuya itetelehite kuya itiyire inihe nareji huja horahi angejuho.) ²² Paulo ho nabotia nihiji ho denge ho Areopaga hana jiman, "Ite lati ho Aten, Atel ne itebojo irahatate ahejifitok ho mojo nihoi fad. ²³ To ho alotinere ne atel dee nasinge na imojete, ahorihi ne namaji holomojere obwon hunya higierita, NIHo NAJYOK NA OBu OJIENI.Nasinge na imojetete na ilunyati,ngete anya leramahiso ne nihote. ²⁴ Najyok lobieu nafok ho nareji fad niho ngete, toho ora ngete Lohobu ho hide ho nafok, obu omanya nihaji nefahi tenehes. ²⁵ obu otum igiama niho ngete tene hes, toho ohiterengete nareji, ngete tanakwan hongete isiarahita lati nahisu cebu no lofune ho hanareji fad. ²⁶ Niho latwani abito ihuhumu ngete nahangite fad ho lati hula omanye nitodo ho fok, lofa najieni sing noho hoholongi ho cebu nekoriji ho lomanyari hosing. ²⁷ Inaha, ongida sing otahite Najyok kuya hatum sing isiahi niger niho ngete ho nahorihiso ngete, tarihe, obu ngete olama niho lobo nihojie fad. ²⁸ Niho ngete ohimanya jie cebu ohidaha cebu ohibwon ho nahisu, toho ojimitere lobo niho te, Ohira cebu jie lemusak hongete.' ²⁹ Ojo inaha, toho ohira jie lemusak ho Najyok, ongida ijie obu ohigigilo ojo okialare nemanyita ho Najyok toho na bilet huja na omimil kuya toho namori,nahite natiang kuya nahite na ihuhumi atwani ta latwani. ³⁰ Inaha, idaya Najyok noholongi noho ho lunya, nyuo hati tahanya iramahi ngete niho lati fad hula obwoni niho namasik fad ongida iwahe. ³¹ Tananyuo ehwanahi ngete noholong nahadi ongotere ngete nahiramita ho fok to natarihe to latwani la onyumu ngete.Eramahi Najyok ta le twani niho lati fad ta nahitubuhuniso ngete to yeyi." ³² Tahanya lofa netiyiri lati ho Aten nahibuhuniso ho lahayeyak, hilihe hanakenitere Paulo; nyuo hati hilihe hana jiman, "Ohitiyira bejie niho ji hari to anya hiram." ³³ Nituhohiso hosing, Paulo ho nahidahiso sing. ³⁴ Nyuo hati hilihe lati ho najifaru ngete ho nahiruk, niho sing bo Dionisiu noho nidenge ho Areopaga, nangorite na onya nafure Damari, ho hinihe niho sing.