¹ To Ikonium fa Paulo ho Barnaba iruhini harabito nilo mojere ho Yahud ho najiman tanyahoi niho ene hoi ofoni nerete lati olwaji loho Yahud ho loho Grik hula iruhi. ² Nyuo hati Yahud hulo fa obu obayangi ho nahisusu nohosi ho Paganoji ho nahihwanahiso sing na orohojaya niho hilasirak. ³ Sing ho nahitwongo da niho hinihe noholongi olwaji, ho natianya to nagolon ho Lohobu, ngete ho nahisiarahiso nahitelehita to nahiram ho ongidari ho Lohobu. Ihon ngete anya to nahisiarahiso nahiteleyehita cebu nahigiemita huja odwari huja ihoni tenehes ho Paulo ojo Barnaba. ⁴ Nyuo hati nangatio ho hang ihohwara:Hilihe obwoni ho Yahud, ilihe ho lahejifitok. ⁵ Lofa natemi paganoji ho Yahud itugulihiso lolohitwaha hosing ongida ifadi Paulo ho Barnaba , ⁶ sing ho najianan, ho nahinam toho nihangite ho Likaonia, Listra ho Derbe, ho niho hangite huja ojihaji, ⁷ sing ho nahitejiana nefanjelio da. ⁸ Itwongo fa lobo latwani da Listra, la oniame nehejiaha ho ngete, la oriata many tohotwa hohotenge lohobu otem nadaha. ⁹ Etiyir ale twani Paulo otianya. Paulo ho nahiriria nihongete ho nateliniso ojo obwon ngete ho nahiruk nihitingidarari ngete. ¹⁰ Ngete ho najiman tana murut no okwat, "Tobotie nihide tenehejiaha hoji.'' Ele twani ho nahifiri nihide ho nahiluluruta. ¹¹ Lofa nateli nalohoi na nyuo Paulo ihon, sing ho na tingon na muruto ho sing ojimi natianya ho Likaonia, "Lotu najyok niho jie idia nifok lora atwani." ¹² Sing hanagialan Barnaba "Seus,'' cebu Paulo, "Herme,'' tananyuo ora fa ngete ahatianyani bebe. ¹³ Lapadir ho Seu, lofa obwon na kelesia ho ngete niger ho hang, hanahiyeno laharemok ho husuk ho natwarahiso niger ho ikat; ngete ho nalohoi owahi neyalita. ¹⁴ Nyuo hati lofa netiyiri lahejifitok, Barnaba ho Paulo,sing ho nachiran nabongoji hosing, ho nafoten kerem niger niho nalohoi ho lati,oyose ¹⁵ ojimi ojo, "Liawa, nanyuo te ihwanati hunya reji? ohira cebu jie alati ho nahigigilita huja okialare toho nohote. Ohiyeno jie ni hote natianya na ongida, ojo ongida ite ibielinete niho nareji huja orohoji toho niho Najyok la isu, la ihuhum nahide, nafok ho nahari ho nareji fad huja obwoni niho sing. ¹⁶ Nilo nangaji huja oringari, isiarahi ngete nahangite fad odaha to nehoiha ho sing. ¹⁷ Nyuo hati obu ngete idahi nakwan hongete obe lahapiahani,ihon ngetena ongida ho nahisiarahiso ite na huju to hide ho noholongi huja ongidari, itufut natajio hote tanangirang cebu to na kwama." ¹⁸ Dobu to hunya tenyita, Paulo ho Barnaba nahitik tu nalohoi ho lati nihiyalahinere niho sing. ¹⁹ Nyuo hati hilihe lati ho Yahud to Antiok cebu Ikonium ho nafwoniso ho nahituguliaru nalohoi ho lati. Sing ho nahi fad Paulo ho hanarohoro ngete niger to hang, igigile fa sing ojo aye. ²⁰ Ati lohejehi ho botie niger ho ngete,ngete ho nadetino nihide ho nahi ruhiso nihang. To nahubanyi, ngete ho na loten toho Derbe ho Barnaba. ²¹ Lofa netejieni sing nefanjelio nihene hang ho nangeleniso lolohejehi olwaji, sing ho nayiteriso toho Listra, toho Ikonium,cebu toho Antiok. ²² Sing ho nahitiringa itogol sing itotosohi sing ojo ongida iti ringe bwanan nihiruk hosing. Iramahini sing ojo to nahipaditita ojo ongida jie ohiruhi nihaji ho Najyok. ²³ Lofa nanyumuni niho sing lolohitwaha niho lolohitwaha niho nolohifurere ho laheruhok, ho namojo cebu obu onyase, isieri sing niho Lohobu la iruhi sing. ²⁴ Sing ha nafoten hara Pisidia hanafoniso toho Pamfilia. ²⁵ Lofa natianye sing nahiram niho Perga, hana foten toho Attalia. ²⁶ Toda hanafoten tana hari toho Antiok, nimaji na ihwan terete sing hana lwaha Nijyok niho nahi giama noho taha nya natuho hini sing. ²⁷ Lofa nesiahi sing Antiok hanahifurohiso lati harabito, sing hanahiramahiso nareji huja ihon Najyok hosing, cebu tatali ngete onga nekat ho hiruk niho paganoji. ²⁸ Etwo nge sing noholongi bebe ho lolohijehi.