¹ Tahanya nimaji ho lotubari niho Antiok, obwoni fa hilihe laheramahitak ho hiramita ho Najyok ho lahetejianak. Orahi fa sing Barnaba,Simeon(lofa onya nafure Niger), Lusius noho Sirene, Manaen(morite ho Herode ), cebu Saulo. ² Lo fa sing homoje niho Lohobu cebu itwenge na obu onyese, Nolohailong Na- Onyila ho najiman, "Igelusu niho ne Barnaba ojo Saulo, ongida igiame nahigiama na angelenere ne sing." ³ Lofa natuhohini lati nahitwongo nebe ngirang, omojohini, ho narwehiso nehes hosing niho hula ti, ho nasulariso sing ofwe. ⁴ Barnaba ho Saulo ho na bayangi Nolohailong Na-Onyila ho nafoten nifok ho Seleusia; toda ho nafoten tana hari ho Sipras. ⁵ Lofa na bwoni sing nihang ho Salamis, sing ho nahitokwata nahiram ho Najyok nimaji holo mojere ho Yahud. Obwoni fa sing Yuwana Marko lahalwahani ho sing. ⁶ Lofa na ringari sing fad hara nidenge lalokude na obwon nihari to ho Pafos, sing hanahorihiso lobo latwani la ora ebwoni, laheramahitani ho logesemi, la onya nafure Bar Yesu. ⁷ Ilihite fa ale ibwoni lolohitwahaji ho gala, Sergio Paulas, la ora ahagunyani ho twani.Ale twani ho nangeleniso Barnaba ho Paulo, tananyuo owak ngete itiyiriniso nahiram ho Najyok. ⁸ Nyuo hati Elymas "lebwoni"( ibieli nafure ho ngete to ho ja) ho nahitirisa sing; honawahan itebieleriso lolohitwahaji ho gala niger to hiruk. ⁹ Nyuo hati Saulo, lofa cebu ongelese ojo Paulo, obwon fa ho Nolohailong Na- Onyila; ngete ¹⁰ hanahiriria niho ngete toktok hanajiman , "Iji iha lahesuswani, ibwonitere ji nareji hogesemi ho noho rohoji. Ireji amereni ho lati fad hula ongidari. Obu beji ituchung nahitukudo nahoiha ho Lohobu huja opiti,hetum ji? ¹¹ Tahanya totiale, nehene ho Lohobu obwon niho ji, ilotu beji ingodo. Obu beji itel noho long niho ibwo noholong." Tiyeje nohonyehite ho Elima​s ho nahahariji ho tianya ho nahirwahajariso; ngete ho na hichak iluruta ififiasu lati ongida orihi ngete tenehene. ¹² Lofa natel lolohitwahaji ho gala na idwong, ngete hana hiruk, tananyuo ihiaha fa ngete nahitejiana noho Lohobu. ¹³ Tahanya Paulo ho morit ho ngete ho nadaha to Pafos hanafwoniso Perga niho Pamfilia. Nyuo hati Yuwana ho nahidahiso sing ho nayiteriso toho Yerusalem. ¹⁴ Paulo ho morit ho ngete ho nafoten to Perga toho Antiok noho Pisidia. toda sing ho nafoten nimaji no mojere te Yahud niholong ho hetaleji ho nahitwongo nifok. ¹⁵ Lo fa natuhohi ngete nechihita cebu laheramahitak ho hiramita ho Najyok, lolohitwaha ho kelesia ho na sulariso nahiram niho sing ojo, "Hilasirak, nebwanatate he bwo nahiram noho itogolo niho lati inyini, totianyati." ¹⁶ Paulo ho nadeto nihide ho natianya to nehene ho ngete; ho najiman, "Laliawa ho Isarayil cebu ite hula ibaya ngata Najyok, itiyirati. ¹⁷ Najyok ho hule ti Isarayil anyumu fafairok hojie cebu ihuhumu lati olwaji lofa omanyariti sing nifok ho Ijip, to nehene ho nahinyamaru sing niger. ¹⁸ Niho nengaji nehejiek ongon omanye ngete ho sing nitimere. ¹⁹ Lofa nepalaya ngete niho nahangite metaharik nifok ho Kanaan, ngete hanahisiarahiso lati hojie nafok ho sing noholunyohiso. ²⁰ Hunya higemita fad iyare nengaji namiya ongon ho nehejiek miyet.Nihalu ho hunya reji fad, Najyok ho nahisiarahiso niho sing laha ngotok many Samuele laheramahitani ho hiramita ho Najyok . ²¹ Nihalu hanya, lati ho lawahan lohobu, Najyok ho na hisiarahiso sing Saulo iha Kish, latwani loho nimanit ho Benjamin, niho lofa nengaji nehejek ongon. ²² Lofa neduhaya Najyok ngete nirahitere ahobu, ngete ho na hihwanahiso Davide ora ahobu ho sing. ora fa to Davide lofa otianyari Najyok, 'Ahorihi ne Davide lha ho Jesse ongida ora atwani hotaji hone; Ihon ba ngete nareji fad huja awak ne.' ²³ Niho lemusak hale twani iyeno Najyok niho Isarayil lahetalahani, Yesu, toho ongatari fa ngete nihihwanari. ²⁴ Ichak fa anyani lotiniso lofa, berien many hobe Yesu olotu, ichak Yuwana ilolwo ngohiso nahijuho ho lati fad ho Isarayil. ²⁵ Nituhohiso ho Yuwana nahigiama ho ngete, ngete ho najiman, 'Igigiletete ojo ne ngai? Obu ne elaje. Nyuo hati itiyirati, olotiniso lobo nihalu ho ne, la obu ne atum ipuchu.' ²⁶ Hilasirak, lemusak ho Abramo, cebu hula obwoni nihiji hote hula omoje Najyok, osuluni natianya ho hitalahino tojie. ²⁷ Niho sing hula omanye Yerusalem, ho lahenefitok ho sing, obu ojieni tarihe ngete, kuya ojieni sing namuruto ho laheramahitak ho hiramita ho Najyok hunya ikenite niho long ho ho metaharik; itufuti sing laheramahitak ho netenyita ho Najyok sing Yesu ongida ifadari. ²⁸ Adobu obu sing ohorihini ibwo natianya na ongida ongotohini niho ngete nayeyi, sing ho nahifi Pilato ongida ifadari ngete. ²⁹ Lofa natuhohini nareji fad hulo fa igierehini to ngete,sing ho nahitingiriniso ngete to kiani ho nahitengetehiso ngete nilume. ³⁰ Nyuo hati etubu Najyok ngete to yeyi. ³¹ Ateli fa ngete niholongi huja olwaji to hula ofwoni ho ngete to Galileya toho Yerusalem. Orahi hulati tahanya ahapiahak ho ngete niho hule ati. ³² Ohiyeno jie nihote natianya na ongida niho nangatita huja ihuhumahini niho fafairok hojie: ³³ Atun Najyok hunya ngatita niho jie, le musak hosing, niho naja itubuhu ngete Yesu to yeyi. Ngete cebu anyan lofa igierehini nibuk ho Salum noho harik: 'Iji iha ne, baya alotu ne rahan Amonye hoji.' ³⁴ Cebu na ora natarihe ojo itubuhu ngete to yeyi ojo ongida nakwan ho ngete obu omudang,otianya ngete toho ja: 'Ahi siarahi ba ne iji nanyilaji ho najwaha na ora tarihe noho Davide.' ³⁵ Ngete anya lojo cebu ngete niho ibwo nabuk ho Salum 'Obu beji isiarahi Lahanyilajani hoji otel namudangi.' ³⁶ Lofa negem Davide newahita ho Najyok niho nengaji ho ngete, ngete ho nangetoro, itegetehini ho monyie ngete, ho natial na mudangi, ³⁷ nyuo hati ngete la itubuhu Najyok nihide obu otel namudangi. ³⁸ Ikie ite ijianata, hilasirak, ojo tale twani, iramahini nihote nahibalahiso hepalita. ³⁹ To ngete niho lati hula iruhi italahine niho nareji fad huja obu nechihita ho Muse italahu. ⁴⁰ Tobwanata angida niho nasinge na otianyi laheramahitak ho hiramita ho Najyok nobu idwong nihote: ⁴¹ 'Totialati, ite hule iroho jata, cebu ihiahati cebu iyeyata; Egiama ne nahigiama niho longi hote, Nahigiama na obu ba te iruhoto, dobu ilolongohi lobo latwani nihote.''' ⁴³ lofa nechung nahifurasu namaji holo mojere, Yahud hula olwaji cebu lati hula obu orahi Ayahud ho nahijifaru Paulo ho Barnaba, hulo fa otianye niho sing cebu itogoli sing ojo ongida itiringe ito kwata Najyok. ⁴⁴ Niholong ho metaharik hari, nahang fad ho natuba harabito nihitiyirari nahiram ho Lohobu. ⁴⁵ Lo fa nateli Yahud nalohoi ho lati, sing ho nahifut ho nahayini ho natianya huja orohojari niho nareji huja otianye Paulo ho na moron ngete. ⁴⁶ Paulo ho Barnaba ho na tianya to nahigereji ho na jiman, "Hasiriu fa nahichak itianya nahiram ho Najyok nihote. Nitialari ite isulasi nahiram ho Najyok niger to kwanite hote ho nahihwana hiso nakwanite hote ahula obu ingidarata niho nahisu na osio, totialati, ohibielo bejie niho paganoji. ⁴⁷ Eramahi Najyok niho jie, ojo, 'Ehwanahi ne ite afangan ho paganoji, ongida ite iyenete nahitalahino niho namasik fad to fok.''' ⁴⁸ Lo fa netiyiri paganoji, okwame fa ho nahitokwata natianya ho Lohobu.Olwaji fa hula onyumuni niho nahisu no osio. ⁴⁹ Nahiram ho Lohobu ho nanisarahiso nihangite fad. ⁵⁰ Nyuo hati ilelie Yahud niho naheruhok cebu nangorwo huja ongidari, ho cebu naliawa hula inefite na hang. Anya tianya ho nahiyeno nahitegiama niho Paulo ho Barnaba ho narohoriso sing niger olahini nikori ho hang ho sing. ⁵¹ Nyuo hati Paulo ho Barnaba ho nahitutuhiso nafur tehejiaha ho sing na orohojaya niho sing. Sing ho nafoten to ho nihang ho Ikonium. ⁵² Lolohejehi ho nahifut ho nakwama cebu Nolohailong Na-Onyila.