¹ Ohiwak ijie iji ite ijianata, hilasira ce bu hinasira, namehino ho Najyok na isiarahini nikelesia ho Makedonia. ² Niholohong ho n-tiama ho miajan bebe, nakwama ho hosing na obolo ce bu naparita hosing eyeno nabara hongidari. ³ Ara ne ahapiahani ojo isieri fa sing to ho otum sing isieri ce bu ilang. Cebu nawahan hosing naharus ⁴ to namojo nobo bolo bebe elelie sing nihojie bebe nabwanari ho nangati nihigiamari anya higiama niho laheruhok. ⁵ Obu anya olotu idwong noho ohiwahitere jie. Nyuo hati, ichahi sing isiarahiso nakwanite hosing niho ho Lohobu. Tinya to nawahan ho Najyok afwoni sing isiarahiso nakwanite hosing . ⁶ Ohilelia ijie niho Tito, la echak anya higiama, ongida iyeno anya higiama ho himorit ningati hote. ⁷ Nyuo hati,ongida ite ijifitete nireji fad -nihiruk,nitianya, nijianan, nimanyita fad, ce bu niho nakwama hote nihojie. To jiana ojo ijifitete anya higiama hohimorit. ⁸ Atianya ne anya obu tanaroso. Nyuo atianya ne anya netamari nagolon ho kwama hote nihitekialarahinere nawahan ho lati hilihe. ⁹ Ijianatate namehino ho Hobu hojie Yesu Kristo. hoji bebe ho miji inihe. Dobu fa osam ngete, alotu fa ngete rahan ahaparitani to te, ojo ongida to naparite hongete ite ifwosu saman. ¹⁰ Nihanya hiram esiarahi ne nihote nahisingita huja ba olwahi ite. Niho ibwo nenga fa obu te ijiahata igiama ibwo nasinge, nyuo hati te iwahata igiama ngete. ¹¹ Tahanya totuhohisi. Toho obwonitere fa nahigieria cebu nawahan nihigiamari ngete, owak iji igem many ituhohi, toho nigolon hoji. ¹² Nomo negeriatite nahigiama anya higiama, ongida ce bu nasinge na iruhi. Ikie anya ora niho nasinge na obwonitere latwani, ikie obu lora to nasinge na obe latwani. ¹³ Niho anya higiama obu ojo ongida hilihe okwame ce bu ite iwanata ho nahirosiji hotajio. Nyuo hati ikie nangidari obwon. ¹⁴ Isiarahi ba nareji huja obwoni nihote sing nareji huja owahi sing. Ce bu nareji huja obwoni nihosing isieri ite nareji huja iwahatate, ojo ongida nakialarahino obwon. ¹⁵ Egierehini ojo, "Latwani la obwon ho nareji huja olwaji, obe ibwo nasinge na otong, cebu latwani la obwon ho nareji kai obe ibwo singe ilanyu." ¹⁶ Ajo ne awa niho niho Najyok, la ihwanahi nitaji ho Tito nahirebiji ho taji to ho anya abwonitere ne niho te. ¹⁷ Obu ngete iruk nahilelia hojie hama ce bu obwon fa ngete ho nahifidia to ngete. Olotu nihote to nawahan hongete. ¹⁸ Ahisulahi jie hongete lahilasi la okwame nakelesiaji fad to nahigiama hongete nihiramahinere nefanjelio. nahiramita. ¹⁹ Obu ce lora ta anya hama, nyuo hati cebu anyumuni ngete to kelesiaji nilojiere hojie nihigiamari anya higiama ho ongidari noho nakwatan ho Lohobu to nakwan hongete cebu nihitetelehinere nawahan hojie nihilwahari. ²⁰ Ohititihito jie nahisiarahiso ojo lobo nahigugungwa to jie to nahiram ho lwaha na ohigiama jie. ²¹ Ohibwon ijie ho nagianyan nihigiamari nasinge na ongida,obu lora nihatemeni ho Lohobu hama, nyuo hati cebu nihatemeni ho lati. ²² Ohisulahiso ce bu jie lobo lahilasi ofwe hosing. Ohitemito jie ngete tihitik, ahihorihijie ojo ogol ngete nihigemita huja olwaji. Obwon ngete tahanya ho nakwama , nyuo hati to nahiruk hongete na obolo to te. ²³ To Tito, ora ngete amorite ho ne ce bu ahaleteni ho hote to nahigiama . Tohilasira hojie,nakelesiaji losulahini sing. Ora hi sing ahabayangak ho Kristo. ²⁴ Itelehisi sing nakwama hote, cebu itelehisi nakelesiaji nahiram na isiarahi ijie ohitadara to te.