¹ Hilasira, toho ohibwonitere jie ho hunya ngatita ikie ijie ohitinyilaj nakwanite hojie niho nareji fad huja ohisieri ijie ohibot nikwanite ho jie ce bu nilohailong. Ejifitete nanyilaji niho nabayangi ho Najyok. ² Ihuhumahisi nahaji nihojie! Obu jie ohipalaya niho lobo. Obu jie ohilum lobo kuya ohitumumun lobo. ³ Obu lora to nangotohiso nihote ojo ateny ne anya. Ateny ne ojo ibwanatate nitajio hojie, ojo ongida ohiye harabito cebu ohisu harabito. ⁴ Abwon ne ho nahiruk na obolo bebe nihote , cebu apufa ne to te. Abwon ne ho nahirebiji ho taji. Itihita nakwama nitaji ho ne niho nemejita fad. ⁵ Lofa nahifwonu jie Makedonia, obu nakwanite ho jie owirari. Nyuo hati, ohitegiame fa ijie nimanyita fad to nangalasu niger cebu nabayangi nihotwa. ⁶ Nyuo hati Najyok, la itotoso lati hula alitari nahigigilita, ho nahitotos ijie to na lotiniso ho Tito, ⁷ obu lara to nahisiahita hongete hama,nyuo hati cebu tanahitotoso na ohihorihi ngete nihote, lo fa neramahi ngete niho ne nakwama hote na obolo, nayo hote, ho nahihuyasu hote to ne; akwama ne bebe. ⁸ Dobu isiarahi nahigiero ho ne ite ilongojitati, abu ne esawud. Nyuo hati esawud ne natel ne lomo nesiarahi nahigiero ho ne ite ilongojitati. Nyuo hati itolongojitati fa te kai. ⁹ Tahanya akwama ne, obu lora to najiman igigilete fa te, nyuo hati to najiman ojo nahilongojita hote eyeno ite nihiwaha. Etelusute nahilongojita niho nangidarita, ihorihisite nahitegiama tojie. ¹⁰ Nahilongojita ho Najyok iyeno nahiwaha na ohiyaru iji nihitalahino nebe hisawud. Nahilongojita hofok, iyeno nayeyi. ¹¹ Nanyuo anya wahan na obolo nemanyita ho Najyok ihisiarahi nihote- ani wahan lobwon nihote na itelehi ojo obu te ipalasi, ani hilongojita, ani bayangi, ani wahan, ani golon, cebu ani wahan nitialari ojo ongida nachihita igemi!Nereji fad itetelehisi nakwanite hote ahula obengi nepalita nihanya hiram. ¹² Dobu egierehi ne nihote,obu ne egierehi to laharohojani, kuya to latwani la itegiame to nahihwana na orohojaya nyuo hati ojo ongida te ijianata cebu Najyok ojien nahiruk hote nihojie. ¹³ Ohitotosi ijie tanya. Niho nahitotoso hojie, ohikwama cebu jie bebe to nakwama ho Tito, to nahitelengejuk hojie fad nolohailong hongete. ¹⁴ Hetadara ne niho ngete tote, habu ne eloriri. Nyuo hati,toho ahiramahinere ne ite nareji fad huja otiri, nahitadara hojie tote niho Tito etelihi narahan tarihe. ¹⁵ Nakwama ho ngete nihote obolo bebe, toho ihuyanitere ngete nabayangi hote fad, nahifwotiniso hote ngete to nabayangi ho nahihihirahino. ¹⁶ Akwama ne ojo abwon ne ho nahiruk na ifut nihote.