¹ Ne, Paulo, to nakwan ho ne lelelia nihote, to nabayangi ce bu to nariajan ho Kristo. Arie ne nabwon ne nihatemeni hote nyuo hati egere ne nihote nomo nalama ne to hiji hote. ² Amojo ne ojo, nomo nabwon ne hote, obu ne awak hingereji to nawahan ho kwan. Nyuo hati egigilo ne awak ne hingereji nomo netiresa ne lati hula ojimi ohimanya ijie to nakwan. ³ Dobu ohidaha ijie to nakwanite, obu jie ohingalasu narem to nakwan. ⁴ Naremita huja ohiremere jie obu lora noho kwan. Nyuo hati, obwoni sing ho nagolon nihitasarajiere namasik. Onieni sing nifok nerisita huja itilitarite. ⁵ Ohipalaya ce bu jie nareji huja odetine nihide nihitihire najianan ho Najyok. Ohiyaru ijie nahigigilita huja orohoji fad iruhi niho Kristo. ⁶ Ahihuhumahino jie nihidayajiere nahigemita fad huja orohoji, nomo neruhotote tuhohino na hiruk kerem. ⁷ Totiale angida nanyuo lobwon nihatemeni ho ji. Neruk lobo ojo ngete lo ho Kristo, ikie ngete iramahi nakwan ho ngete ojo ngete lo ho Kristo, to ho ohirahitere jie. ⁸ Dobu hetadara ne bebe to nabolori hojie na isiarahi Lohobu niho jie nihitobolorinere ite ce bu nibiangan hipalajiere ite iji, obu ba ne abwon ho nariri. ⁹ Abu ne awak ngete oleyo najiman ojo ahitabayanga ne ite to nahigierita ho ne. ¹⁰ Ojimi lati hilihe, ''Orohoji nahigierita hongete ce bu ogoli,nyuo hati nikwan onyal. Netenyita hongete obu ongidari to na hitiyira.'' ¹¹ Ikie hula ti ojieni ojo nareji hulo fa ohigierehi jie niwaraga nofa ohibwonitere jie niger, okialare to ho hahigem dwo jie nomo nahibwon ijie da. ¹² Obu jie ohifwo nimaji na olama nihifurohinere nakwanite hojie kuya ohite kialarahi jie nakwanite hojie niho ehule ito kwate nakwanite ho sing. Nyuo hati nomo natiami sing nakwanite obu sing obwoni ho nangidari. ¹³ Obu jie ohitum ohipufa ohilihi. Nyuo hati, ohigem hadi ijie nimaji na ohisiarahi ijie Najyok namaji na nisiahita many nihote. ¹⁴ Obu jie ohifunahi nakwanite hojie lofa nahisiahita jie nihote. Ijie fa lolochifot nihisiahiterenefanjelio ho Kristo nihote . ¹⁵ Obu jie ohipufa ilany, to nahigiama ho lati hilihe. Nyuo hati ogigilo jie ojo toho abolojere nahiruk hote ojo olalata hadi nahigiama hojie, cebu obwon nimaji nilohichungi na ongida. ¹⁶ Ohigigilo jie anya, ojo ongida ijie ohitotoso nefanjelio dobu nimasik huja olamaji nihote. Obu be jie ohitadara to nahigiama na ihoni nihangite. ¹⁷ ''Nyuo hati ikie la opufatito, opufa niho Lohobu.'' ¹⁸ Obu lora ngete lonyumu nakwan la onyumuni. Nyuo hati, ngete laja la onyumu Lohobu.