¹ Niho anya ihoi, ite huja irahat angorwo ongida ite ifwasi niho habiehini hote. Ihwanata anya nyuo hati ora dobu ipapale laliawa hilihe tonatianya, otum sing ilanyine tonahiningo, to nehoiha huja obwoniterete nangorwo ho sing. ² Toho ateli jafatia sing natarihe hehoi homanya hoji tonabayangi. ³ Ikie obu itingidari ngete teger: tohonafofi huja ikadahini, nafangati, kuya toho nangejuk hobongo. ⁴ Nyuo hati atum, ikie ihoni ngete tonohotwa hotaji ho twani, ho tona nangidari na osio niho lahangulani honolohailong, ngete na imedek nahatemeni ho Jyok. ⁵ Toho nahanyilajak hongorwo ehuhumahini fa sing nakwanite ho sing harabito niho anya ihoi. Abwoniterete sing nagolon hotaji niho Najyok cebu iruhisi niho habiehini hosing. ⁶ Niho anya hoi obayang fa Sara Abramo ho na ongialan ngete ahobu hongete. Erahatate tahanya emusak hongete nara ite ihuanata nasinge nongigda ho cebu nabe hadi ite ibayangata nahitegiama. ⁷ Niho nehoi na okialare, ite laliawa ongida imanyiati hona ngorwo hote tona hitiyirahino, toho nahatunani na oniama, ngete nangorite. Ongida ite isiarahisi sing nabayangi toho lati hula olunyohini namanya na isiarahini. Ihuanata anya ojo ongida nemojita hote obu olitari. ⁸ Nolohichungi, ite fad, tobwanata ho negigil abito, to kwamati ahilasira , natajio huja okwame lati, ho nariajan. ⁹ Hetudumati nerohojita noho arohojiak kuya napacha honipacha. Nitodo ohibuchuta, itiringati juaha, nyuo to anya ahingele fa ite, ojo ilunyohisi hadi ite najuaha. ¹⁰ ''Ngete la owahatito kwama namanya cebu otel nangidari hoholongi ongida itobwoj nangadief hongete niho nareji huja iboti hona hutuk hongete nitianyari negesemi. ¹¹ Ikie ngete ibielo niho nasinge na oroho cebu ihon nasinge na ongida. Ikie ngete otahito nayomo nihihuhumahinere ngete. ¹² Otiale nohonyiehite ho Hobu napitan ho manya, hona johe hosing iyire nahilelia hosing. Nyuo hati obu nohohom ho Hobu owak ehule ihwane nasinge na ibot.'' ¹³ Ngai ngete la lahatum ohiriafu ite nara ite imanusu nasinge na ongida? ¹⁴ Nyuo hati nemehinetete tonapitan ho manya, ohijok ite Najyok. Hebayangata nasinge na obayangi sing. Hebiangata mehino. ¹⁵ Hati hobu otum nahisarahiso, ihwanahisi Lohobu Kristo nitajio hote ala onyila. Noholongi fad ihuhumahinete nihitarangari lati abito abito hula ifiase ite ojo nanyuo ite ibwanata honatarihe hojiana ho Jyok. Ihwanata anya tonariajan ho nabayangi. ¹⁶ Tobwanata honahigigilita hohosi angida ojo ongida lati hula opachie nangidari homanya hote to Kristo many onyahini hadi nariri nyuo otianyie sing ahilongo nihote toho irahata fete aharohojiak. ¹⁷ Ongida ngete, nara Nara Najyok limanu, ojo imehinetete tona higiama hongidari ilany nahigiama nohorohoji. ¹⁸ Amehino fa cebu Kristo nahabito niho nepalita. Ngete la opit namanya omehino tojie, hula fa obu nemanyita opiti, ojo ongida ngete hadi ohiyieno ijie niho Najyok. ¹⁹ Ihwanahini fa ngete niyeyi nikwan, nyuo hati itusujini fa ngete tonolohailong. Tonolohailong, olo fa ngete itotoso to nolohailongi hehule obwoni nihotwa ho lotwarari. ²⁰ Obu fabu sing orieji lofa nabwon nariajan ho Jyok hoitilasere noholongi ho Nowa, niholongi hohifahari natigol, cebu italahu fa Najyok lati kai___nolohailongi metoohutik__hara ni hari. ²¹ Ngete anya nakialare ho batisimo na ohitalahineretete tahany__obu nahilalariso heboti tokwan, nyuo hati tanayo ho higigilita na ongida niho Najyok_tonahibuhuniso ho Yesu Kristo. ²² Obwon Kristo niteten hehene hojyok. Olo fangete nihide. Anjelo, nahinefita, ho nahifirang ongida ifwotohini niho ngete.