¹ Hilasira, heruhoto nolohailongi fad, nyuo hati totiama nolohailongi ongida itel kuya orahi sing loho Najyok, tananyuo olwaji laheramahitak ho hiramita lahangesemok hula afwe niger nafok. ² Tanya otum iji ijien nolohailong ho Najyok - ³ nolohailong ene ojien ojo Yesu Kristo olotu tonakwan ora Najyok, cebu nolohailongi ehuwe obe ojieni Yesu obu ora noho Najyok. Ngete anya nolohailong nora amereni ho Kristo, eneje itiyiruji ojo olotiniso, cebu tahanya ngete inyi nifok. ⁴ Ite irahatete loho Najyok, ite lemusak, cebu elanyusute sing tananyuo ngete la ilanyuo ehwe lohailongi obolo ilany la obwon nifok. ⁵ Orahi sing noho nifok, cebu nafok itiyira niho sing. ⁶ Ohira ijie loho Najyok. Ngete la ojien Najyok itiyire nihojie. Ngete la obu ora loho Najyok obu itiyira nihojie. Tanya ohijien ijie nolohailong ho tarihe cebu nolohailong ho rohoji. ⁷ Nakwama nobolo, iko ije ohikwama nakwanite hoje, nakwama ora noho Najyok, cebu lati fad hula okwame oyisini niho Najyok hocebu ojieni Najyok. ⁸ Latwani la obu okwama obu ojien Najyok, Najyok ngete nakwama. ⁹ Nihanya, nakwama niho Najyok etelehini fa nihiji hojie, ojo asulu fa Najyok Iha langete abito inyi nifok ojo ongida ijie ohisu to ngete. ¹⁰ Nihanya ngete nakwama,obu ojo ohikwama jie Najyok, nyuo hati ngete lohikwama ijie, ho nasuluniso Iha langete ongida olotu iduhariso nepalita hojie. . ¹¹ Hilasira, nakwam Najyok ijie bebe, ongida cebu ije ohikwama nakwanite hoje. ¹² Hobe lobo otel Najyok many fatiadi. Nomo nayikwameje nakwanite hoje, Najyok otong nihoje hocebu ngete obwon nonyila nihoje. ¹³ Tanya ohijien ijie ojo oyitong je niho ngete cebu ngete nihoje, nuyo ngete isiarahi nihojie Nolohailong hongete Na-onyila. ¹⁴ Ahitel ijie cebu ohira ahapiahak asulu Lamonye Lonyi ongida ora ahetalahani ho fok. ¹⁵ Latwani la ojien ojo ora Yesu Eha ho Nayok, otong Najyok nihote ho cebu ngete otong Nijyok. ¹⁶ Cebu ojien ijie ohiruk cebu nakwama na obwonitere Najyok nihojie. Najyok ngete nakwama, cebu ngeten lotong hanakwama otong cebu Nijyok, Najyok cebu otong niho ngete. ¹⁷ Nihanya kwama ihuhumi angida nihiji hojie, ojo ongida ijie ohiruk niholong hongoto, nyuo to ngete, toho ije hula ohibwon nihanya fok. ¹⁸ Obu jie ohibwon hanabayangi niho nakwama. nyuo hati nakwama nongida ipiroyo nabayangi niger, nyuo nabanyangi iyeno ha nahitegemita. Ati abito lobayang obe nakwama niho ngete. . ¹⁹ Ohikwama jie tananyuo ohikwama ijie Najyok berien. ²⁰ Labwon lobo abito lotianya, ''akwama ne Najyok'' nyuo hati ngete idaya hilasi, ngete ora agesemeni. Eleje obu okwama hilasi hongete, eleje otel ngete, obu okwama Najyok, eneje nobu ngete otel. ²¹ Ccebu ngete anya necihit nobwonitere je niho ngete: Eleje okwama Najyok ongida cebu ngete okwama hilasi.