¹ To nareji huja igierusute niho ne: Obwoni noholongi hinihe na ongida laleye obu otum ogete ho ngore. ² Nyuo hati tonanyuo to nahissusuta hegemita huja iboti, ongida laleye obwon ho ngorite ho ngete, cebu nagorite ongida obwon ho laleye ho ngete. ³ Ongida laleye isiarahi na ngorite newahita ho kwan hongete, nangorite cebu ongida isiarahi habi newahita ho kwan hongete. ⁴ Obu nangorite lotiala nakwan hongete, laleye lotiala. Obu cebu laleye lotiala nakwan ho ngete , nyuo hati na ngorite. ⁵ Hetongotihisi nakwanite hote to nabiangan igeto harabito, mayak to nahiruhohino to noholongi hinihe. Igiamati anya ongida te isiarahisi nakwanite hote nimojo. Cebu ongida te ifwosu harabito hari, ongida lahisuswani obu ohitem ite to nabiangan hote ituna nakwanite. ⁶ Nyuo hati atianya ne hunya reji nihote olwe to nahisinga obu to naroso. ⁷ Egigilo ne hari lati fad to ho ne. Nyuo hati ohibwon ijie fad ho neyalita hama hama huja isiarahi Najyok. Obwon lobo hanya iyalita cebu lobo obwon hene iyalita. ⁹ Niho hula/huja obu oyame/oyemi cebu niho na ngorwo ho aferok ajo ne ongida nihosing natwenge sing obe oyame/oyemi, toho ne. ⁸ Nyuo hati nabu sing otuni nakwanite, ikie sing oyame. Ongida sing loyame ilany nahidworo ho nawahan ho kwan. ¹⁰ Tahanya niho lati hula ayame esiarahi ne anya tianya-obu ne, nyuo hati Lohobu: ''Ikie ngorite obu opiaharu niho habila nangete.'' ¹¹ Nyuo hati napiaharu ngete niho habi, ikie itwongo nebe leye nabe ikie oyitehi niho habi. Cebu, ''Ikie habi obu orohoyo ngore .'' ¹² Nyuo hati niho hilihe ojo ne-Ne, obu Lohobu-ojo nabwon hilasi ho lobo ho na ngorite na obu eheruhoni,neruk owak ngete nahitwongo ho ngete, ongida ngete obu orohoyo. ¹³ Nabwon nangorite ho laleye lo obu ora aheruhoni, nyuo hati ngete owak itwongo ho ngete, ikie ngete obu orohoyo ngete. ¹⁴ Onyumuni la leye obu ora aheruhoni to nahiruk ho ngore. Nabe te itialata angida orahi hadi lemusak/namusak hote ahebwatak, nyuo hati tarihe ewalari sing niger. ¹⁵ Nyuo hati nalo ile twani la obu ora a kristiani, ikie ngete olo. Niho anya tenyita, hilasi kuya hinasi obu otori to nahitina hosing. Ahingeleu ijie Najyok ojo ongida ohitwongo to nayomo. ¹⁶ Tatali ji ijien ngorite ojo itum ji italahu abila iji? Kuya iji laleye, tatali ji ijien, ojo itum ji italahu nguru ji? ¹⁷ Ikie latwani itwongo to nahisu na isiarahi Lohobu sing, to ho ongelenere Najyok sing. Ngete anya natianya ho ne nikenisaji fad. ¹⁸ Obwon fa lobo la onguti la holong ongelenerete ngete nehiruk? Ikie ngete obu otem iduhariso nahaforo hengotita ho kwan ho ngete. Obwon fa lobo latwani la obu ongoti laholong ongelenerete ngete ni ho nahiruk? Ikie ngete obu ongoti. ¹⁹ Obu lora nangoto kuya nabiangan ngoto owahi. Nanyuo owahi ngete nabayangi nechihita ho Najyok ²⁰ Ikie lati fad iwasihini ningeleso no fa ongelenere Najyok sing nihiruhutari. ²¹ Ira feji ahegiamani laholong ohingelenere iji Najyok?Hehuyasu to ngete. Nyuo hati netumu ji isabita, igiama. ²² Latwani la ongeleu Lohobu ahegiamani aloho Lohobu. La cebu ongeleni nihiruk ora ahegiamani hebo nepal no fa na ngelenini ho Kristo. ²³ Ahinyangini ite to nahinyangi, herahata ahegiamak ho lati. ²⁴ Hilasira ho hinasirak, niho ibwo namanya no fa ohibwonitere ijie no fa ohingelenerete ijie nihiruk, ewasihisi to hoja. ²⁵ Tahanya niho hula/huja obu oyame/oyemi, abe ne abwonitere hebwo nachihit niho Lohobu. Nyuo hati esiarahi ne negigilo ho ne toho latwani la, to namehino ho Lohobu, ngete la onyila. ²⁶ Inaha, egigilo ne ojo to nahiramita huja obwoni olwaji, ongida niho lileye nibwonitere to ho ngete . ²⁷ Itwarahino ji ningorite to nayama? Hetahito nahisabita niho ngete. Isabita ji niho nguru ji kuya hobu ji iyama? Hetahito na ngorite. ²⁸ Nyuo hati neyama ji, obu ji igem ibwo nepal. Nyuo hati nayama nangorite na obu oyemi , obu ngete ipal. Ati hula ayame obwoniterete sing ho nahiramita huja olwaji hesu ji sing, awak ne ilwahiniso ite nihosing. ²⁹ Nyuo hati anya atianya ne, hilasirak ho hinasirak: osuk noholong.To baya to nihatemeni, ikie hula obwoni ho nangorwo itwenge to ho obengi nangorwo. ³⁰ Hula oye, ongida igiame toho obu sing oye; cebu hula okwame, obu sing okwame ,hula inyange nareji,to ho obu sing obwoniterete ibwo nasinge ³¹ Hula igiamariti nafok, ikie sing itwenge to ho obu sing igiame to ngete,alotiniso nolohichungi ho higiama hanya fok. ³² Awak ne lahino niho nahihuyasu. Latwani la obu oyama igigilo ngete to nareji ho Lohobu, tatali ngete hatum itokwam ngete. ³³ Nyuo hati latwani la ayama igigilo to nareji ho nifok, tatali ngete etokwam nguru na ngete. ³⁴ Ohwara ngete. Nangorite na obu oyemi kuya nahurie na hobu ogeterete igigilo ngete nareji ho Lohobu, tatali ngete hatum abwon niger niho nakwan cebu nilohailong. Nyuo hati na ngorite na ayemi igigilo ngete nareji ho nifok, tatali ngete hetokwam to habila na ngete. ³⁵ Atianya ne anya noho nangidari hote, obu nihisiarahinere nahititihito nihote. Atianya ne anya to nasinge na ongida, ongida ite igiamati niho Lohobu obe ibwo nahiyeyala. ³⁶ Nyuo hati negigilo lobo latwani ojo habu ngete enef nguru ne nangete angida to nagolon ho wahan ho kwan hongete, ikie ngete oyem ngete toho owahihitere ngete. Obu ora epal. ³⁷ Nyuo hati na nyumu ngete nabiangan iyama, cebu obe obwonitere ho nawahan ho kwan,kuya natum dihan nahawan ho ngete, igem ba ngete angida nabu oyem ngete. ³⁸ Latwani la oyem nguru nangete hobe ihon angida, cebu la onyumu nabiangan iyama ihon hadi na ongida bebe. ³⁹ Otwarahino nangorite niho habi many nihisu hongete. Nyuo hati naye habii, obwon ngete ho napitan nihiyajiere latwani la owak ngete, nyuo hati niho Lohobu ijia. ⁴⁰ Ati ni ngoto ho ne hatum dwo ngete itwongo toho abwonitere ngete. Egigilo cebu ne ojo abwonitere ne ho Nolohailong ho Najyok.