Nengat 6

1 Labwon lobo nihote ho nahiram ho lobo, hiruk ngete naloten nilongotere hohiramita ho lati hula obu iruhi ilanya nihatemeni ho laheruhok? 2 Ibete ijianata ojo ongote hadi laheruhok nafok? Nomo nengotete nafok, ha bete itumata ihuhumata nahiramita huja orohoji? 3 Ibe te ijianata ojo ohingoto hadi jie Anjiloji? Baya hati hadi ijie, ohingoto nahiramita hanya hisu? 4 Nengotete nahiramita huja orahi noho nahisu noho tihitik, nanyuo te iyariti hunya hiramita nihatemeni ho lati hula obu obwoni ho nolobotiari nekelesia? 5 Atianya ne anya niho nariri ho hote. Obe lobo to hiji hote la ilefere la otum ihuhum nangalasu ho hilasirak ho hinasirak? 6 Nyuo hati toho obwonitere, laheruhoni abito olo nimaji ho longotere ho hiramita to hilasi ho ngete, ho nahisiarahiso nihatemeni ho langotoni la obu ora aheruhoni! 7 Nahiram nabwon narisa ni hiji ho letiyirak horihi abwon na ilannyiniso niho sing. noho anyo obe odihi nepalitak? Noho nanyuo obeji iruk nohotek hoji ho hoholi? 8 Nyuo hati hepalaya ji cebu ihohol ilihe, cebu nahilasir hoji hunja ce bu nahinasira! 9 Ibe te ijianata ojo obu lahepalani olunyohi nahang ho Najyok? Heruhoto nagesemi. Lahasomok, lati hula omoje nareji huja obu orahi Najyok, lahageterek ho nguru ho lati, lahasomok ho liawa, laliwa hula ogeterete laliawa, 10 lahahohwalak, lahehawurak, laharumak, la mwangak, lahoholisok ho lati obe lobo niho sing olunyohi nahang ho Najyok. 11 Orahi fa ilihe nihote tohosing. Nyuo hati ahitinjilaji ite, ehisieri ite niho Najyok, nyuo hati ahihuhumi ite hula ingidarita ho Najyok to nafure ho Lohobu Yesu Kristo cebu to na Nolohailong ho Najyok hojie. 12 ''Ongidari narejifad niho ne '' nyuo hati obu nareji fad ongidari. ''Ongidari nareji fad niho ne'' nyuo hati obe ba ibwo nihosing otum ohiyalaya ne. 13 ''Ora nangirang nohotwa, nohotwa ora niho nangirang'' nyuo hati Najyok ipalaya sing fad. Obu ihuhumahini nakwan nareji ho somon. Nyuo hati nakwan ora noho Lohobu, isiarahi ba Lohobu nakwan. 14 Itubuhu Najyok Lohobu cebu ohitubuhu hadi ijie to nagolon ho ngete. 15 Ibe te ijianata ojo iorahi nakwanite hote noho Kristo? Hatum ne eyaru lati ho Kristo itilahi sing ho lahasomok? Obu otum ora! 16 Ibe te ijianata ojo latwani la itilahino niho nahasomoni afwoni sing rahan abito nikwan ho ngete? To ho ojimitere nabuk, ''Ofwoni harik narahan abito nikwan.'' 17 Nyuo hati ngete la itilahino niho Lohobu, olotu ngete rahan abito ho Nolohailong. 18 Inamata niger to somon! Nepalita fad huja ipalaya latwani obwoni niger ho kwan, nyuo hati latwani lahasomoni ipalaya na orohojaya ni kwan ho ngete. 19 Ibe te ijianata ojo ora nakwan hote haji ho n-Nolohailong na Onyila, na itwongo nihote, na ihorihisite niho Najyok? Ibe te ijianata ojo obu te ibwanata ite hama? 20 Ohinyangini fa ite to nahinyangi na ogol. Inaha, itokwatati Najyok to nakwan hote.