¹ Lo fa nalotu ne nihote, hilasira ho hinasira, abu ne alotu jianan itianya kuya to lofero to ho eramahi ne natarihe ho Najyok na idimahini . ² Anyumu ne nibiangan ijianari ibwo nasinge la holong habwon ne nihiji hote mayak Yesu Kristo, cebu ngete ogurohini. ³ Cebu abwon fa ne hote niniama, nibayangi, cebu ni hihihira. ⁴ Cebu natianya ho ne cebu nihiramahita ho ne obu ora ahitunguliasu ho lofero. Nyuo hati,orahi fa ahitelehiso ho Lohailong cebu noho nagolon, ⁵ ojo ongida nahiruk hote obu obwon nilo fero ho lati, nyuo hati nigolon ho Najyok. ⁶ Tahanya ohitianye jie nolofero niho ho lati hula abolori, nyuo hati obu lofero hanya fok, kuya noho hule lolotwaha anya nga, hula adahe otuhohini. ⁷ Nyuo hati ohitianya jie nalofero ho Najyok na idimahino, natarihe na idimahino naboterehi Najyok nihatiemeni ho ngaji kwatan hojie. ⁸ Obe lobo niho hula lahatialak hanya nga ojien anya lofero, hara na ojieni sing ngete nihe ne holong, habu fa sing ogurohini Lohobu ho kwatan. ⁹ Nyuo hati toho igierehini ojo, ''Nareji huja obu nohonyek otel, obe nahijok itiyir, obe nohou itufut, nareji huja hehuhumahi Najyok niho hula okwame ngete.'' ¹⁰ Sing hunya reji huja itelihi Najyok nihojie hara niho Nolohailong. Otahito nolohailong nareji fad, dobu nareji ho Najyok. ¹¹ Ngai lojien negigil ho twani mayak nolohailong ho twani niho ngete? Cebu, obe lobo latwani ojien nareji ho ho Najyok manyi nifotiri mayak Nolohailong ho Najyok. ¹² Nyuo hayi obu jie ohifwotu nolohailong ho nafok, nyuo hati Nolohailong na olotu niho Najyok, ojo ongida ijie ohijien nareji huja isiarahi Najyok niho hojie naharus. ¹³ Ohitianya jie hunya reji to netenyita na obu nolofero ho twani otum itejien, nyuo hati Nolohailong lohitejiana ijie. Iramahita Nolohailong netenyita ho lohailong ho nolofero ho lohailong. ¹⁴ Latwani la obu obwon ho nolohailong, obu ohorihi nareji huja obwoni niho Nolohailong ho Najyok, otwenge niho ngete naharus. Obu ngete ojien sing to nanyuo obe nolohailong nihosing. ¹⁵ Latwani la obwon ho nolohailong, igegel ngete nareji fad, nyuo hati obu ngete otum iruhi nigoto helihe. ¹⁶ ''Ngai hatum ojien no hou ho Lohobu, ojo ongida ngete iramahi ngete?'' Nyuo hati ohibwon iji natula ho Kristo.