1 Paulo, la ongeleu Kristo Yesu ora ahejifiteni to nawahan ho Najyok-cebu Sosthenes helasi hojie- 2 niho nekelesia ho di Korinto, niho hula isieri niho Kristo Yesu, hula ongeleni ojo ongida orahi alati hula onyilaji. Ohigierehiso cebu jie niho lati fad hula ongelese nafure ho Lohobu Yesu Kristo nimasik fad, Lohobu ho sing cebu lohojie. 3 Ikie nangidari ce bu nayomo obwon nihote na olotu niho Najyok Monye hojie cebu niho Lohobu Yesu Kristo. 4 Esiarahita ne nawa niho Najyok ho ne, to te, nanyuo to nangidara ho Najyok na isiarahi Kristo Yesu nihote. 5 Ohsiarahi ite nasaman nihoyiha fad, nitenyita fad ce bu hono lofero fad. 6 Isiarahi ite isamata, toho itelehinerete Kristo atarihe nihiji hote. 7 Inaha ebwanatate ho neyalita holohailong, toho itilaseretete netilasu ho neramahiso ho Lohobu hojie Yesu Kristo. 8 Ohitogol be ite many nilohichungi, ojo ongida ite ibe ibwanata hebwo nepal niholong ho Lohobu hojie Yesu Kristo . 9 Najyok neruhutani, la ongeleu ite niho nahitilahino harabito ho Iha la ngete , Yesu Kristo Lohobu hojie. 10 Tahanya elelia ne nihote, hilasira ho hinasira, to nafure ho Lohobu hojie Yesu Kristo,ojo iruhotote fad, ojo ikie nahihohwara obe obwon nihiji hote. Elelia ne ojo ongida ite itilahinete harabito to nahigigilita huja okialare cebu nahigiama na okialare . 11 Nyuo hati iramahini lati ho Chloe niho ne ojo ibwanatate ho nahihohwara nihiji hote. 12 Ajo ne anya: Ojo lobo nihote, ''Ohibwon ne ho Paulo,'' Kuya ohibwon ne ho Apollo,'' Kuya ohibwon ne ho Cepha,'' Kuya ohibwon ne ho Kristo.'' 13 Ihohwara Kristo? Ogurohini fa Paulo tote? Ohijuhi fa ite to nafure ho Paulo? 14 Ajo ne awa niho Najyok ojo obu ne ejuk lobo nihote, mayak Crispus cebu Gaius. 15 Ora fa anya ojo ongida lobo obe ojo ijuhi fa ngete to nafure ho ne. 16 (Ejuk cebu ne lati/nati to hang ho Stephana. Abu ne ajien kuya ejuku ne hilihe.) 17 Obu Kristo ohisula ne ojo ongida ne ejuho nyuo hati ongida ne etotoso natianya. Obu ohisula ne ojo ongida ne etotoso to netenyita ho lati, ojo ongida nahite ho Yesu na ikwala obu owat niho nehifirang. 18 Ora natianya ho hite na ikwala afajari niho hula oyeyisi. Nyuo hati nihiji ho hula olwahu Najyok, ora agolon ho Najyok. 19 Igierehini, ''Epalaya hadi ne nagunyan ho lahagunyak. Etabangaya hadi ne najianan ho lahagianyak.'' 20 Aji laheleferejiani ? aji lalwahani? Aji latwani la eken ? Aji lahatianyani hunya fok? Obu Najyok ibiel nahilefere ho nafok afajari? 21 To ho obwon nafok nilofero ho ngete na obu ojien Najyok, tokwama Najyok ta nafajari ho hitotoso nilwahari hula iruhi. 22 Ifiase Yahud nahiteleyehita ho dwaran cebu otahite nolofero. 23 Nyuo hati ohitotoso jie Kristo la ogurohini, lahetitiheni ho Yahud cebu lahafajani niho Grik. 24 Nyuo hati niho hula ongeleu Najyok, Yahud cebu Grik, ohitotoso jie toho nagolon cebu nolofero ho Najyok. 25 Nafajari ho Najyok ilefere ilany lati, cebu naniama ho Najyok ogol ilany lati. 26 Totialati ningeleso ho Najyok nihote, hilasira ho hinasira. Obu fa te fad likunyata to nangoto ho lati. Obu fa te fad ifirangata. Obu fa oyisini ite fad nahayi huja obolori . 27 Nyuo hati onyumu Najyok nareji huja ofajari niho anya fok nihisiarahinere nariri niho laheleferojok. Onyumu Najyok nasinge na oniama nihisiarahinere nariri niho lahagolok. 28 Onyumu Najok lati hula idayari nafok lati hula orieji nyuo hati idayari. Onyumu cebu ngete nareji huja obengi, iyeno nibiangan nareji huja itaraha ahuja ongidari. 29 Igem ngete anya ojo ongida lobo obe obwon ho napufa nihatemeni ho ngete. 30 To nasinge navihon Najyok, ibwanatete niho Kristo Yesu, la olotu rahan niho ijie alofero niho Najyok. Olotu ora nihojie ahangidarani, ahanyilajani, 31 ''Ta anya higiama, to ho ojo nabuk, "Ikie la opufa, opufa niho Lohobu.''