¹ Tahanya etuhuyahiso ne ite, hilasira ho hinasira, niho nafanjrlio lo fa eramahi ne nihote, na imojusu te cebu na ibotiaritite, ² cebu na ohitalahinerete ite, neniafatate angida natianya na eramahi ne ite-mayak nabu te iruhoto. ³ Esiarahi ne nihote berien to nangidari na cebu amoju ne: ojo oye Kristo to nahipalita hojie toho ojimitere nibuk, ⁴ cebu ojo anuhahini fa ngete, cebu ojo itubuhuni fa ngete niholong noho hutik to ho ojo nibuk. ⁵ Cebu ojo oleyo ngete niho Kefa, tinya niho tomon ho harik. ⁶ Tinya ho naleyeji niho hilasira ho hinasira namiya miyet harabito, nalohoi hosing fad he suji, nyuo hati hilihe ayeyi. ⁷ Tinya ngete ho naleyeji niho Juma, tinya niho lahejifitok fad. ⁸ Nilohichungi fad, ngete ho naleji niho ne, toho niho lahito la oyisini niholong na oroho. ⁹ Ara ne alohichungi ho lahejifitok, la obu osiriu ningelesere ojo lahejifiteni, tananyuo etegem ne nakelesia ho Najyok. ¹⁰ Nyuo hati tanangidari ho Najyok ne ne, ce bu na ngidari ho ngete niho ne obu naharus. Nyuo hati, egiama ne bebe ilany sing fad. Nyuo hati obu fa ne, nyuo hati na ngidari ho Najyok na obwon niho ne. ¹¹ Inaha kuya ne kuya sing, ohitejiana ijie ite iruhoto. ¹² Tahanya netokwateojo Kristo ala ibuhu to yeyi, nanyuo hati hilihe nihote otianye ojo obe nahibuhuniso ho lahayeyak? ¹³ Nyuo hati nabe nabuhuniso holahayeyak, itelehi ojo dobu Kristo obu itubuhuni. ¹⁴ Nabu itubuhuni Kristo, nahitejiana hojie ora naharus. ¹⁵ Ahitarahi ijie lahapiahak lahagesemok to Najyok; tananyuo ohitenyitito ijie to Najyok, ojo itubuhu ngete Kristo, nomo nabu ngete. ¹⁶ Nabu itubuhuni lahayeyak, dobu Kristo obu itubuhuni. ¹⁷ Nabu itubuhuni Kristo, nahiruk hote ara naharus ite hewasihisi nihipalita hote. ¹⁸ Ehule oyeyi niho Kristo ayeyi sing cebu. ¹⁹ Nara niho anya hisu ijie ohibwon ho nahiruk tanamoi noho niho Kristo, to lati fad, omehine nihojie bebe nihoje. ²⁰ Nyuo hati tahanya etubuhuni Kristo to yeyi, nolohichahi ho hangir hehule ayeyi. ²¹ Many ho lotu nayeyi, to latwani cebu olotu nahibuhuniso to yeyi. ²² To ho niho Adam fad ayeyi, cebu niho Kristo isieri ba sing fad isuji. ²³ Nyuo hati lobo nimaji hongete: Kristo, nolohichahi ho hangeri; tinya ehule orahi aloho Kristo isieri nahisu nilotiniso ho ngete. ²⁴ Tinya ara alohichungi, nesiarahi Kristo nahang niho Najyok Monye, lomo netobwoj ngete nahinefito fad cebu nabolori fad nahifirang fad. ²⁵ Ongida ngete ilohobu many nehwanahi ngete lamerok ho ngete fad nihejiaha ho ngete. ²⁶ Lamereni lolohichungi la ofwoni ipalariso ngete nayeyi. ²⁷ ''Ehwanahi ngete nareji fad nifotiri hehejiaha ho ngete.'' Nyuo hati natianya ngete ''ehwanahi ngete nareji fad,'' iramahi ojo obu itilahi hele ihwanahi nareji fad nikwan ho ngete. ²⁸ Nehwanahini nareji fad niho ngete la ihwanahi nareji fad nikwan hongete, itelehi ojo ihwanahini hadi cebu Lahito nikwan hele ihwanahi nareji fad niho ngete, ojo ongida Najyok Monye obwon fad niho fad. ²⁹ Kuya nanyuo haba igemi ehule ihoni hula ijuhi niho nayeyi? Nabu itubuhuni lahayeyak, nanyuo hati ijuhi sing? ³⁰ Cebu nanyuo hati jie ohibwon nirohoji noholongi fad? ³¹ Hilasira ho hinasira, to nahitadara ho ne nihote, na abwonitere ne niho Yesu Kristo Lohobu hojie, iramahi ne anya: ayeyita ne tihitik. ³² Nanyuo ne ahorihi, to nahigigilo ho twani, netangala ne nengiarajak ho tiyangi to Ephesus, nabu itubuhuni lahayeyak? ''Ikie ijie ohinyasu cebu ohimata, ohiye ba jie hubanyi.'' ³³ Hesiarahisi ohitonongi ite: ''Nahilihita na oroho ipalaya nahitwongo.'' ³⁴ Tokianya! Itwonge angida! Hetiringati hipalarita. Obu hilihe nihote ojieni Najyok. Atianya ne anya niho nariri hote. ³⁵ Nyuo hati ojo hadi lobo, ''Tatali itubuhuni lahayeyak? Tani kwan hadi sing ofwoni?'' ³⁶ Obu te ijianata! Nasinge na iyihi ji obu ichak obolori mayak naye. ³⁷ Nasinge na iyihi ji obu nakwan na lobwon, nyuo hati nahinyomoti-otum olotu angamari kuya atiriwati. ³⁸ Nyuo hati Najyok ba isiarahi nakwan to ho owak ngete, niho nahinyomo fad ho nakwanite hosing hama hama. ³⁹ Obu nakwanite fad okialare, nyuo hati obwon nakwan ho lati abito, cebu ibwo nakwan noho natiyangi, cebu ibwo noho nakeny, cebu ibwo noho nahayem. ⁴⁰ Obwoni cebu nakwanite ho nihide ho nakwanite ho nifok. Nyuo hati nakwatan ho kwan ho hide ora abito cebu nakwatan ho fok ibwo. ⁴¹ Obwon nangidari ho holong abito, cebu nangidari ho yafa, cebu na ngidari ho hangere, no nahangeri ibwo obwon ho nangidari hongete. ⁴² Ora cebu nebuhuniso ho lahayeyak to hoja. Nasinge na oyihini oye, cebu nasinge na itubuhuni obu oye. ⁴³ Oyihini ngete obu tanabayangi, itubuhuni to nakwatan. oyihini ni niniama, itubuhuni nihifirang. ⁴⁴ Oyihini nikwan na obieni, itubuhuni akwan na ora alolohailong. Nabwon nakwan na obieni, obwon cebu nakwan na ora alohailong. ⁴⁵ Egerehini cebu, ''Lolohichahi ho twani Adam olotu rahan alohailong la isu.'' Adam lolohichungi alotu rahan alohailong nahisirahita nolohailong ho hisu. ⁴⁶ Nyuo hati obu nareji ho lohailongi ofwoni berien nyuo hati na obieni, tinya nareji ho lohailong. ⁴⁷ Ora lolochifot ho twani aloho lifok, ihuhumuni to modie. Latwani loho harik olotu to hide. ⁴⁸ Toho la obieni to modie, ce bu ehule hula ihuhumuni to modie. Cebu latwani ho hide, cebu lati hula obwoni nihide. ⁴⁹ Toho ohibwanari jie nakialare ho latwani ho modie, ohibwon hadi cebu jie nakialare ho latwani ho nihide. ⁵⁰ Tahany ajo ne anya, hilasira ho hinasira, ojo naburuti ho nohoto obu omojini nahang ho Najyok; kuya nayeyi omoju nahisu. ⁵¹ Totialati! Ahiramahi ne ite natarihe na idimaru: obu hadi ijie fad ohiye, nyuo hati ohibieli hadi ijie. ⁵² Ohibieli hadi ijie tiye tiye, to ho namumutihita ho honyek, nilohichungi ho nangobwo. Ohuti hadi nangobwo igworita, lahayeyak ibuhuni ahula obu oyeyi, cebu ijie ohibielu. ⁵³ Niho anya nayeyi ongida ihwanahini na nihisu, cebu anya omudang ongida ihwanahini niho na obu omudang. ⁵⁴ Nyuo hati nehwanahini anya nayeyi niho na obu oye, cebu anya omudang ihwanahini niho na obu omudang, tinya alotu natianya na igierehini, ''Adileri nayeyi nihiyalariso.'' ⁵⁵ ''Nayeyi, aji nagolon hoji? Nayeyi aji nangwajan hoji?'' ⁵⁶ Nangwajan ho yeyi ngete nepal, cebu nahifirang hepal ngete nechihit. ⁵⁷ Nyuo hati awa niho Najyok, la isiarahi nihojie nagolon niho Lohobu hojie Yesu Kristo ! ⁵⁸ Inaha, hilasira ho hinasira ho ne, to bwanata angida, hedadahitete, iwasihisi nihigiama ho Lohobu, tananyuo ijianatate ojo nahigiama hote niho Lohobu obu naharus.