¹ Toho nesiarita ho reji hunya onyilaji, hilasira ho hinasira, abu ne awak ite obu ijianata. ² Ijianatate ojo lo fa herahatate apaganoji, ijifitete fa te nareji huja iboti, dobu ohiyarite fa sing ite. ³ Inaha, awak ne ite ijianata ojo obe lobo la otianya to Nolohailong ho Najyok ojo, ''Epitari Yesu., ''Cebu ikie lobo obu ojo, " Yesu Lohobu,'' mayak to Nolohailong Na-Onyila. ⁴ Tahanya obwoni neyalita hama hama, nyuo hati to Nolohailong abito. ⁵ Cebu obwoni nahigemita hama hama, nyuo hati Lohobu abito. ⁶ Cebu obwoni nahigemita hama hama, nyuo hati ngete Najyok lisiarahi sing niho lati fad. ⁷ Tahanya isieri lati naleyejita hama hama noho Nolohailong noho nangidarita fad. ⁸ Niho lobo isieri to Nolohailong nahiramita ho lofero, cebu niho lobo nahiramita ho jianan to Nolohailong. ⁹ Niho lobo ngete isiarahi nahiruk to Nolohailong, niho lobo neyalita ho hitingidara to Nolohailong, ¹⁰ cebu niho lobo nahigiama ho hohifirang, cebu lobo isiarahi nahiramahita netenyita ho Najyok, niho lobo isiarahi na golon najianan nolohailongi, niho lobo natianya to ngadefo huja olwaji, cebu niho lobo isiarahi na golon ho jianan iramahita natianya ho ngadefo. ¹¹ Nyuo hati Lohailong abito ligiama niho hunya fad, nihisiarahinere neyalita niho lati hama hama, to ho onyumu ngete. ¹² Toho ora nakwan abito cebu obwonitere namasik olwaji sing fad orahi amasik ho kwan abito, obwoni niho Kristo. ¹³ Niho Nolohailong abito ohijuhi fa ijie fad nikwan abito, kuya Yahud kuya Grik, kuya otori kuya obu otori, cebu ihuhumuni sing fad ongida omate Nolohailong abito. ¹⁴ Obu nakwan ora abito, nyuo hati olwaji. ¹⁵ Najo neheju, ''Toho abu ne ara ehene, obu ne ara angati ho akwan,'' obu ngete omuta nikwan. ¹⁶ Cebu najo nahijok, ''To ho obu ne ara ahonyek, abu ne ara angati ho kwan,''obu ngete omuta nikwan. ¹⁷ Hara ora nakwan fad ahonyek, aji hati dwo nolotialari? Kuya hara nakwan fad ahijok, aji hati dwo nolohingwadari aji? ¹⁸ Nyuo hati Najyok ihuhumahi namasik ho kwan to ho owahitere ngete. ¹⁹ Cebu hara na okialare sing fad nangati abito, aji dwo nakwan habwon? ²⁰ Tahanya olwaji namasik , nakwan abito. ²¹ Habu nohonyek ojo niho nehene, ''Abu ne awak iji.'' Kuya ojo nohou niho neheju, ''Abu ne awak iji.'' ²² Nyuo hati namasik ho kwan huja obu obayang ongidari. ²³ Namasik ho kwan huja ohigigilo jie ojo obu ongidari, ohisiarahi sing nabayangi na obolo, cebu namasik huja obu ojieni obwoni ho nahitwongo na ongida. ²⁴ Tahanya lati hula ohibayangi ijie obu owahi ongida itamanye sing angida, nyuo hati Najyok otutubahi lati harabito, cebu isiarahi nabayangi niho hula obu obwoniterete ngete. ²⁵ Igem ngete anya ojo ongida nahwara obe nihiji ho kwan, nyuo hati ojo ongida lati olwahe nakwanite to nakwama abito. ²⁶ Napadata abito twani, lati fad ipadate harabito. Kuya nabayangi latwani abito, lati fad akwame harabito. ²⁷ Tahanya ite nakwan ho Kristo cebu lati hongati ho ngete. ²⁸ Anyumu Najyok nekelesia lolochifot ho lahejifitok, laheramahitak ho hiramita loho harik, lahetejianak noho hutik, hehule hula igiame nahigemita huja ogoli, neyalita ho hitingidara, ho hula isiarahite nilwahita, hula igiame nahigiama ho hinefito, cebu hula obwoni ho na nangadiefo hama hama. ²⁹ Ohira ijie fad ahejifitok? Ohira ijie fad aheramahitak ho hiramita ho Najyok? Ohira ijie fad ahetejianak? Ohigiama jie fad nahigemita huja ogoli? ³⁰ Ohibwon ijie fad ho neyalita ho hitingidara? Ohitianya jie fad to na ngadefo?Ohijien ijie nahiramihita nafotirok hetenyita huja otianye to nangadefo? ³¹ Otahito nahayini neyalita huja obolori. Ahitelehi ba ne ite nehoi na ongida bebe.