¹ Torahata ahetetiamak ho ne, toho arahitere ne ahetetiamani ho Kristo. ² Tahanya akwama ne ite tananyuo ihuyasu te ne nireji fad cebu iwasihi nimanyita ho berien toho isiarahinere ne sing nihote. ³ Tahanya awak ne ite ijianata ojo ora Kristo ahenefitini lati fad, cebu laleye ngete lahenefiteni ho ngorite, cebu Najyok ora ahenefiteni ho Kristo. ⁴ Lobo latwani la omojito kuya otenyito nahiramita ho Najyok tonohou ho ngete emuhohi nariri nihou hongete. ⁵ Nyuo hati ibwo nangorite na omojito kuya otenyito na hiramita ho Najyok obu imuk nohou ho ngete inyor nohou hongete. Ora abito to ho dwo hangitari nohou hongete. ⁶ Nabu nangorite imuk nohou ho ngete, ikie ngete onger nafofi hongete osuhi. Niteliangata niho nangorite nihisusubari kuya ningitajiere nafofi hongete, ikie ngete imuk nohou hongete. ⁷ Ongida laleya obu imuk nohou ho ngete, toho ora ngete akialare cebu nangidari ho Najyok. Nyuo hati ora nangorite angidari ho leye. ⁸ Obu fa obieni laleye tongorite, nyuo hati nangorite to leye. ⁹ Obu fa cebu obieni laleye noho na ngorite, nyuo hati nangorite noho laleye. ¹⁰ Ngete anya lobwonitere na ngorite nakialare ho hinefito nihou ho ngete, ta anjiloji. ¹¹ Niho Lohobu, obu nangorite itwongo hama niho laleye, kuya laleye itwongo hama niho nangorite. ¹² Toho olotu na ngorite niho laleye, alotu cebu laleye niho nangorite. Ofwoni nareji fad niho Najyok. ¹³ Tongototo nakwanite hote: Ongida namojo nangorite niho Najyok na obu nohou imuho? ¹⁴ Obe dobu nareji huja obieni itejiana ite ojo nahadori nafofi ho leye, ora ariri niho ngete, ¹⁵ nyuo hati ojo nidahi nangorite nafofi ohadori,ora a ngidari niho ngete? Isieri nafofi niho ngete amuhi. ¹⁶ Nyuo hati la bwon lobo la orisa anya, ohibe ijie ohibwon hebwo nahigiama, kuya obwoniterete nakelesiaji ho Najyok. ¹⁷ Niho hunya tenyita, abu ne ahitokwata ite, tananyuo lomo nefwosu te harabito, obu lora noho ngidari nyuo hati noho rohoji. ¹⁸ Tolochifot, etiyiri ne ojo nefwosu te harabito nikelesia, obwon nahihohwara nihiji hote, cebu eruk ne ngete. ¹⁹ Otum cebu nolohilihitari obwoni nihiji hote, ojo ongida hula anyumuni ojieni nihiji hote. ²⁰ Nomo nefwosu te harabito, obu ora nangirang ho Lohobu na inyesetete. ²¹ Nenyasetete, ikie lobo onyasu nangirang ho ngete hobe hilihe onye noho sing. Onyasu nahure lobo, cebu lobo oruma. ²² Ibe te ibwonata ho nahai honyasu ho no matari? Inywaratite nakelesia ho Najyok ce bu iteliangarahitati hula obu obwoni hebwo nasinge? Nanyuo ne heramahi nihote? Hatum ne ahitokwata ite? Habu ne ahitokwata ite niho anya! ²³ Ahorihi ne niho Lohobu na eramahi ne nihote, ojo Lohobu Yesu, tanaharie lo fa netenyangari ngete, ho nahiduhuniso nebune, ²⁴ lo fa nesiarahi nawa, ho na bunyon ngete ho najiman, ''Ngete anya nakwan ho ne, na isiarahini nihote; ihwanati anya nihihuyanitere ne.'' ²⁵ Niho anya hoi otingu ngete necholi nihalu ho nyasu, ho najiman, ''Anya choli ora nayomo nangejuk niho nohoto ho ne. tomatitete tihitik to ho otumatate ngete, nihuyanitere ne.'' ²⁶ Noholong fad nenyesetete anya nebune cebu imatati anya choli, itokwatatite nayeyi ho Lohobu many olotu ngete. ²⁷ Latwani, inaha, la onya nebune kuya omat necholi ho Lohobu to nehoi na oroho, ipalaya ba tanakwan ho nohoto ho Lohobu. ²⁸ Ikie latwani atel nakwan hongete soni, tanya hoi ikie ngete onya nebune cebu omat tanecholi. ²⁹ Ngete la onyasu cebu omata obe otel nakwan hongete, onyau cebu omati nayeyi nikwan hongete. ³⁰ Ngete naja lolwaji lati hula odiahe nihiji hote, cebu uilihe nihote ayeyi. ³¹ Nyuo hati nahitel ijie nakwanite hojie obu ba ohingoti ijie. ³² Nyuo hati nahingot ijie Lohobu, hohire jie, ongida obe ohifadari ijie harabito ho nafok. ³³ Inaha,, hilasira ho hinasira, nefwosu te harabito inyasu, itilasete nakwanite hote. ³⁴ Naniama lobo nahure, ikie ngete onyano to hang, ongida nefwosu te harabito obu ba ora noho ngoto.To nareji hinihe huja igierehisite, esiarahi ba ne nehoyiha nalotu ne.