¹ Awak ne ite ijianata, hilasira ho hinasira, ojo obwoni fa monyie hojie fad nihotwa hidis cebu iruyori hara nihari. ² Ijuhi fa sing fad to Muse tedis cebu nihari, ³ cebu onye sing fad nangirang ho lohailong na okialare, ⁴ cebu omati nemati huja okialare. Omoti sing to morwo holohailong na ijifaru sing, ene morwo ngete Kristo. ⁵ Nyuo hati obu fa Najyok okwama niho sing fad, cebu nakwanite ho sing hepireri niwaha. ⁶ Tahany hunya reji orahi ahitetelehita nihojie, obu be jie ohiruk nareji huja iboti toho igiamariti sing. ⁷ Hetwongete ahamojok ho reji, toho orahiterete fa hilihe niho sing-toho egerehini, ''Itwonge lati nifok onyasu cebu omata, ho nadetino nikia ho niwahita ho somon.'' ⁸ Ikie ijie obe ohigiama nareji huja iboti, to ho ihwanariti lalohoi ho sing , namiya nehejek harik ho hutik hula oyeyi niholong abito to ngete. ⁹ Ongida ijie obu ohihwanahi Kristo nitiama, toho igemi lalohoi nihosing, nahiriahuji ho nahipalariso. ¹⁰ Hemomwodete, toho igiamariti fa nalohoi ho sing, anjilo ho nahifadariso sing fad. ¹¹ Tahanya idwongi hunya reji nihosing ahitetelehiso nihojie, cebu igierehini fa nihiramahinere ijie-nihojie hula alotu nolohichungi henga. ¹² Inaha, ikie lobo la igigilo ojo abotia ngete obwon ojo ongida ngete obu ohuya. ¹³ Obe nahisuswa ohiyaru ite na obe ibas; nyuo hati Najyok iruhuta: obu isiarahi ohitemi ite ilany nagolon hote, nyuo hati netemita isiarahi ba cebu ngete nehoi noho iluyajiere ojo ongida ite idihusu ngete. ¹⁴ Inaha, hilasira ho hinasira, inamata niger ho lamojok ho reji. ¹⁵ Atianya ne nihote toho lati hula igigile, ongida ite ingototo nanyuo ne atianya. ¹⁶ Nicholi hejohita na ohijok ijie, obe ora naharari hohoto ho Kristo? Ne bune na ohihohor ijie, obe ora nahwara nikwan ho Kristo? ¹⁷ Tananyuo obwon nebune abito, ijie huja ohilwa ohira nakwan abito, ijie fad ohinya nebune abito harabito. ¹⁸ Totialati niho lati ho Isarayil: hobe hula onyese nahihuhumuta orahi ahegiamak ho altario? ¹⁹ Nanyuo hati ne atianya? Ajo ne nakiala ngete ibwo nasinge? kuya nangirang na isieri niho nakialare ora ebwo nasinge? ²⁰ Nyuo hati ajo ne, ojo nareji huja isiarahita paganoji, isiarahite sing hunya reji niho namininga huja obu niho Najyok. Abu ne awak ite giamati ho naminingaji! ²¹ Habu te imatati necholi ho Lohobu cebu necholi ho mininga. Habu te itilati nilonyesere ho Lohobu cebu nilonyesere ho mininga. ²² Kuya ohitolongojita ijie Lohobu niho nihiyini? Ohigol ijie ohilany ngete? ²³ ''Narji fad obwoni nichihita,'' nyuo hati obu nareji fad ongidari. ''Nareji fad obwoni nichihita,'' nyuo hati obu nareji fad litobolorini lati. ²⁴ Ikie lobo obu otahito na ngidari ho ngete. Nyuo hati, lati fad ikie otahite na ngidari ho niho lati hula omanye niger hosing. ²⁵ Itumatate inyiasete nareji fad huja itenyianga, nebe hifiasu. ²⁶ Ora ''nafok anoho Lohobu, cebu nahifut ho ngete.'' ²⁷ Nahingeleu iji latwani la obu iruk niho Najyok ningirang, nyuo hati iji iwak loten, tonya nasinge na iyene nihatiemeni ho ji na obu ifiasu nohou ho ji. ²⁸ Nyuo hati najo lobo niho ji, ''Ora anya girang nahihuhumi ho paganoji, ''henya ngete. Ora anya to nangidari ho la ohiramahi iji, ce bu noho nangidari ho igigilita. ²⁹ Abu ne ajo nahigigilita ho ji, nyuo hati nahigigilita ho lobo latwani. Nanyuo ongote nahisabita ho ne tanahigigilita ho lobo? ³⁰ Nanyasu ne nangirang tanabayangi, nanyuo otianye ne nesiarahi ne na awa? ³¹ Inaha, kuya inyesetete kuya imatati, kuya nanyuo te igiamati, igiamati fad to nakwatan ho Najyok. ³² Hetolongijitati lati ho Yahud kuya lati ho Grik, kuya nikelesia ho Najyok, ³³ toho atiamari ne nihitokwamari lati fad niho nareji fad, na abu atahito nangidari ho ne, nyuo hati noho hula olwaji, ojo ongida sing italahini.