¹ Maxehimu madana, mapurisita babakuru bakushangana paxiki babakuru wushicaba indi bañoli indi shukwata shama MaJuda. Bakumushimina Jeso. Bakumutwara koku Pirato. ² Pirato akumumbuza, "Iwe ndi Shikati a ma Juda?'' Akurataba akutikya, "Mahweti.'' ³ Ma Purisita babakuru balyi kumuhambereza izuto zizinji Jeso. ⁴ Pirato akumuwuza hape, "Yemwa ukurataba? Kamwana mirandu yibatilyeta puwuso we!'' ⁵ Nanga ndipakyo Jeso amarataba Pirato, matabbemuka nabbi. ⁶ Mwinako yumukiti, Pirato kalyi kubarukulyera muxiki yana mwintorongo, yibalyikuringira. ⁷ Kuzifosi zopa, kwarana imatapatuwa imata mbura umutu mwinako yokufetura ikanda, kalyi Bbarabbasi. ⁸ Ilyinji lyabato pubalyukushangana bakutyeya Pirato atikya abarasi mwasina kubarasaminanga kwitanzi. ⁹ Pirato akubarataba akutikya, "Natishaka atikya ndinipe Shikati uywa ma Juda?'' ¹⁰ Shukutikya matabatowuha shumunawo babakuru ba ma Purisita batamulyetiza Jeso. ¹¹ Mapurisita babakuru balyi kususuweza ilyinji atikya bashupure atikya batishaka Bbarabbasi; abe inje yibakurukurura. ¹² Pirato akubarataba akutikya, "Shikya ndakurasi koku Shikati uywa ma Juda?'' ¹³ Balyikushupura ahuru bakutikya, "Numukokotere!" ¹⁴ Pirato akutikya, "'Shikya shamatafosa?'' Balyukushupura ahuru tota, "Numukokotere. ¹⁵ Pirato kalyikushaka kutabisa ilyinji, akubarukulyera Bbarabbasi. Akuzipa Jeso zichipa akubapaye akya bakamukokotyere. ¹⁶ Masore bakumutwara mwi khuta {Mwi khuta yi nkuru}, balyi kushanganisa chutwapa shamasore. ¹⁷ Balyi kumufuka inguwo yixwa Jeso, bakumupanjira ituru yimyiya bakumubikayo. ¹⁸ Bakukalyisa kumukambira bakutikya, "Wosho, ''Shikati uywa ma Juda.'' ¹⁹ Bakumurakyamu kumushoro shurutaka bakumutsera matswe bakuwa shamadzi bakumukubamera. ²⁰ Pubalyikumana kumuswaura bakumushutura shiraro shishixwa bakuralyika ziraro zakye balyikumutwara kukamukokotyera. ²¹ Balyikuhambereza umutu ikalyiku kadzwa mulyuvu ilyimwe atikya asekye shifapano sha Jeso, munyana yopa kyelyi Simoni uywako Sirene, bashe Alexandere indi Rufusi. ²² Masore bakulyeta Jeso ko Gorongota, {Shibaka shaka Tendere}. ²³ Balyikumulyetiza iwaine yi shanganisa indi mira, yemwa ayinwe. ²⁴ Balyikumukokotyera bakuliyabera ziraro zake shukumwana zimbe akya umutu nu mutu shikakuyisa ichire. ²⁵ Inako yuwutatu bakumukokotyera. Pushusupo shake batañwara wubbi wakye,'' ²⁶ Shikati uywa ma Juda.'' ²⁷ Balyikukokotyera zisinyi zelyi tuu shichumwe kumakhamu akye shichumwe kumamosho akye. ^{28 29} Ibalyi kukita mwinjira bakumushwaura bakunyunga mishoro awo bakutikya, "Ahaa! Yewe ikolyuku wusa i kereki indu kuyiradxini mumayiba atatu. ³⁰ Lyipalyisa suka pusifapano!" ³¹ Mapurisita babakuru balyikumusheka indi babamwe, indi bañoli, bakutikya, "Lyipalyisa matapalyisa babenji, yewe matishitira kulyipalyisa. ³² Keresite, Shikatyi a Isiraere, suka kushifapano ndutyikya tyityishire." Indi batakokotyerwa nake balyikumushwaura akyopa. ³³ Inako yamaxuhumu ka 6 lyififi lyakuyira mulyuvu kyolyo kutwara inako yaka 9. ³⁴ Inako yaka 9 puyalyikukwana Jeso akushupura shilyiyi lyelyikuru atikya, "Eroi, Eroi, rama sabakatani Kutyikya?" Urezja nga, Urezja nga, shikya mandisiri?" ³⁵ Babamwe pubalyikuyuvwa mayiingapa bakutyikya, ''Lyaya, matyibera Eliya.'' ³⁶ Umutu yuyumwe a kuwonduka, akubika iwaine yimbi purutaka akumupa atikya anwe. Munyana yopa akutikya, "Tumwene hali Eliya mbwayekukungusapo." ³⁷ Jeso akushupura shilyiyii lyelyukuru akumyenwa mupupo. ³⁸ Lyidzira lyamwi kerekyi lyalyu kuqhatuka kudzwa kulyiro kwenda papeshi. ³⁹ Muyendisi akuyima akulyaya Jeso akumumwana atikya mafu, "Akutikya injahamu Imwana Urezja." ⁴⁰ Kwarana bakazi ibalyikumwana shiresana. Mwikyo lyawo mwarana Maria Magdarena, indi Maria nyina Jakowo yomudana indi Jose indi Salome. ⁴¹ Pukarana mo Galileya balyukuraqhama mi matabapwelisa. Bakazi babenji batamuraqhama ko Jerusarema. ⁴² Pukwalyikuba maxuhumu, shukutyikya kalyi lyiba lya wuitukiso, lyopa indi lyiba ilyatichera i Sabata. ⁴³ Josefa iywa ko Arimateya akuya. Kalyi umutu ikalyi kukutyeha mwi khuta, Ikalyi kulyindira muwuso Urezja. Kalyi kulyindira kwenda koku Pirato akaringire shutupu sha Jeso. ⁴⁴ Pirato matabbemuka pukalyukuyuvwa atikya Jeso matafwa; Akubera muyendisi akuya kumuwuza atikya Jeso matafwa. ⁴⁵ Pirato pukalyi kuyuvwa ku muyendisi atikya Jeso matafwa, Akupa Josefa Shutupu. ⁴⁶ Josefa akuwura lidzira . Akumungusa pushifapano, Akumuputira mulyidzira lyopa, Akamubika murudzwa lyata tsuruwa pulyuwe. Akubika pumumbero lyuwe. ⁴⁷ Maria Magdarena indi Maria nyina Jose batamwana shibaka mwa matabikuwa Jeso.