1 Kwaranishina mayiba abiri akya kube nu mukyiti ipasaseka undu wichira womunjemwa mumyena. Ma Purisita babakuru indi bañoli balikushaka shibakupata Jeso shuwutali, indi ku mubbura. 2 Kakuli batatikya, "Yisiye kuba inako iyu mukyiti, shikutikya wuzuwo wusiye kubako mwikyo lya bato." 3 Pu Jeso karana mo Betania mwijuwo a Simoni iywi shishenda, mikarasise pwi tafure, pukwalikunjena murakazi yamatayisa ipoto iyi alabastera, iyara yire amazi i sende.kalikulyeta ipoto, indu kutyera mumushoro akye. 4 Kono babamwe balikumyenga. balikuhwitizana balikutikya, "Shilibaka lishikya pukwati lishinyehero? 5 Kakuli amazi ngapa nishinga wurusuwe mashereñi ingatipanga mianda yitatu indukubbara, indukungapa babahungwe." Baliku bbiraera kumukazi yopa. 6 Jeso kalikutikya, "Numusiye yekye. Shikya punatu kataza? Mandipanjiri zezinaqxa. 7 Kakuli babahungwe nina nawo, inako koyo yinashashiri nina nawo, yemye kamunishenibe namye. 8 Hapye matapanga zikali kukwana kupanga: mandixa amazi mubbiri anga, shulibaka lyukuzukuwa kwanga. 9 Ndatinizira injahamu akya, liyi pushelya kurutiwa mulyubu kolyo, zumurwakazi yopa zamatandipanjira shezuhwetuwa, muwuparo wakye.'' 10 Judasi Isikaliyoti, muxhiki uywabamana manja abbiri indi myine ibbiri, kalikwenda ku Ma Purisita babakuru, akya amutwere kuwo. 11 Ma Purisita babakuru pubulikuyubwa akyopa, balikudze induku musepisa mashereñi. Kakukalisa kushaka injira yukumulyeta shawo kuwo. 12 Mulyiba lyitadzi ilyumurero uwichira, pubaliku bbura ingu iyi Paseka, barutuwa balikutikya kukye, "Ikure matishaka akya tika rukise, akya ukalyireko zulyuwa izi paseka?" 13 Kalikutumina barutuwa bakye babiri akutikya kokuwo, "Nakwenda murenyeñi, mbuti nikalishangane indu mutu ya mayisa ami mwichiba. Nikamwiqhama. 14 Pukakanjena mwijuwo, numwiqhama shinikazire umunu ijuwo yopa akya, ' Muruti matikya, "Ikurure rupati rwa mwijuwo mukakalyira ipaseka induba rutuwa bakye?"' 15 Mbwa kaniqhe kurupati rurumwe urwijuwo iruna kulyiro iruna naqha. Shinikapangamo naqha akya tikapanjiremo." 16 Barutiwa balikudzwa balika kyita mu Murenyeñi. Balyika shangana ngaha shamatabazira, balikakalisa kukalitukiseza izi izilyuwa zi paseka. 17 Puma maxhumu, kalikuya indi balyukuma lyanja indu tune tubiri. 18 Pubarasise pwitafure kabatyilya, Jeso kalikutikya, "Shiniti ndatinizira atikya, muxhiki kokunwe yamatilya namye shandibyetyekye." 19 Bataswaba nabbi, induku kalisa kuhweta atikya kokukye, wuxhiki wuxhiki bali kutikya kukye, "Shinjahamu qha yemye?" 20 Jeso kali kutikya kowo, "Kubapa ibatyimana manja abiri inditune tubiri, kuna muqhiki ndisiteni kulya nakye ichira mumbenga. 21 Mwana Mutu shayendye ngaha lyuñoro shilyati hweta zizakye. Wubbi Ngaha Mwana Mutu shamata byetikwa! Kaliwuqha atikya Mwana Mutu shiba yemwa apakuwe." 22 Pubalikulya, Jeso kalikuyisa ichira, indukushu fuyora, induku shichamara. Kalikubapa sho hapye kalikutikya, "Niyise shopani. Shopa mubbiri anga." 23 Kalikuyisa ikomoki, kali kulyu kutumera, indukubapa yo, kowo balikunwa mo. 24 Kalikutikya kokuwo, "Ngapa marwapa anga tishanganisa, marwapa ingashe ngatyeshurwa babyenji. 25 Shinjahamu ndatihweta kunwe, kamuni shindunwe kuzunwe zizi zyambira zi veyine tana shiliba lishe ndikazinwa mumuwuso uwu Urezya." 26 Pubali kuyimba ruyimbo, balikwenda kulirundu lyi Olive. 27 Jeso kali kutikya kokuwo, "Kwenu shenuwe, ' Kakuli kuñolyuwa, 'Shendi rwenise mulisani indi zungu shezikawuhane.' 28 Pushenda kutambuka, shindiyendye kokunwe mo Galileya." 29 Pitorosi kalikutyikya kokukye, "Nanga hati kutikya kowo sheba tsukane, yemye kamuni shendi tsukane." 30 Jeso kali kutikya kukye, "Ndati zira injahamu, akya Mukombwe kawuchire kulira kabiri, shundishapure katatu." 31 Kono Pitorosi kali kutikya, "Hati kufwa shendi fwe nawe, kamuni shendikushapure." Kowo balikusepisa isepiso iyatifwana. 32 Balikuya kushibaka ishishatiberuwa Getisimani, ndupu Jeso kalikutikya kuba rutiwa bakye, "Nisikamye pundishi rapyera." 33 Kalikuyisa Pitorosi, Jakobo, indi Johani nakye hapye kaliku kalisa kuhaliyubwa naqha indi kukatazeha. 34 Kalikuhweta kuwo, "Mupupo anga wuna mumaswabi ngamakuru, poshifupi nurufu. Nikare papa nakulyaya." 35 Jeso kalikwenda shire kaqxenine, kalikuwulya papyeshi, kali kurapyera atikya hati kwatyi kwanahara, inako yopa niyakyityiri kurupatyi rwakye. 36 Kalikutyikya, "Abba, Tatye, izutukozo zatyi kwanahara kokuwe. Zyisa ikomukoki kokumye. Shukuhashaka kwanga, shukushaka kwe." 37 Kali kashuka indi kubashangana batikwama, kali kutikya koku Pitorosi, "Simoni, matikwama? Yemwa kukwana kuqhe shina nako ixhiki? 38 Nilyaye indu kurapyera atikya nisiye kunjena mu milyiko. Mupupo watishaka, mubiri yemwa wakukwana." 39 Hapye kalikudzwa indu kukarapyera, hapye kali kusebelisa mayi ingatifwana. 40 Hapye kalikuya indi kuya kubashanga barazyire, a mesho awo kali maremu hapye kabarayizire atikya shikya bakuhweta kukye. 41 Kalikuya ruwutatu hapye kalikutikya kukuwo, "Nishirazyeri indu kupumura? Kwakonu! Inako kaliyaya. Nilyaye! Mwana Mutu kalimabyetikwa mumanja aba pangi uzuzi bye. 42 Ni tambukye; takwenda. Nilyaye, muxhiki yamatindibyeteka ana shufupi namye." 43 Pukalyu kushuhweta, Judasi, muxhiki iywa batimana manja abbiri indi tune tubiri, kalikuya, ilyinji lyarana nakye, lyatapatira mafuro ngamakuru indi miramu, Ma Purisita babakuru indi bañoli, indi babakuru. 44 Papa mubyetiki akye kali kupa zusupo, kali kutikya, "Kwekye yindaka xhupita, nduyopa. Numupatye indu kumutwara kutupaso." 45 Pukali kuya Judasi, ndipapa ngaho kalikuya koku Jeso indi kutikya, "Rabbi! "Induku muxhupita. 46 Balikuya kumubika manja indumupata . 47 Muxhiki iywakokuwo kali kuyima indu kudzisa lyufuro indi kuxhaka mubuya Umu Purisita yo mukuru indi kutsura lityi lyakye. 48 Jeso kali kutikya kokuwo, "Shikya punatiya, nukutikya natiya kuyu muzi, shi zufuro indi miramu kuya kundipata? 49 Ndarana nanwe mayiba kongo ndalikuruta mwi kerikyi, yemwa nindi shimine. Kono kwatapanguwa atikya ishata ñoruwa mumañoro sheshiyizirizwe." 50 Ibarana indi Jeso balikumusiya indu ywapa. 51 Murumbwana yomudana, yamata dzata lizyira lyamatali zunguruza shalyo, kali mwiqhama Jeso. Munyana pubali kutikya a mupatye. 52 Kali kutiya indi muzyumbiri indu kusiya lizyira lyopa. 53 Baliku twara Jeso ku Mu Purisita yo mukuru. bakopanera nakye mu Ma Purisita, ba bakuru, indi bañoli. 54 Cware Pitorosi akubaraqhama koshire, indimutara u Mu Purisita yo mukuru. Kalika sikama mwikyo lya mapwelisa, ibarana kurupati rumunduro katitukutura. 55 Cware Ma Purisita indi ma Juda balikushaka wupaki iwatishimina Jeso akya bamubbure. Kono kunjemwa shibata shangana. 56 Uwungi balikulyeta wupaki wimbuzi kumuhambereza, kono wupaki yemwa wutishirwe. 57 Babamwe balikuyima indu kulyeta wupaki wimbuzi kukwe; bali kutikya, 58 "Tamuyubu pwamatikya, 'Shashinye ikyereki iyata panguwa shimanja, mi mumayiba ngatatu shendi raxhini yiyimwe iyaha ta panguwa shimanja." 59 Indi papa wupaki wawo yemwa wutishuruwe. 60 Mu Purita kalikuyima mwikyo lyawo indu kumuwuza Jeso, "Umunjemwa ikarawo? Kubanyana bapa zibatukuhambereza?" 61 Kono matatupo kunjemwa zatarataba. Hapye Mu Purisita kalikumuwuza ipuzo indi kutikya, "We ndi Keresite, umwana yo Mufuyorwa?" 62 Jeso kali kutikya, "Imye. Hapye shenumwene Mwana Mutu pwamati sikama kulyanja likhamu shamataa indi kuya shilizudzo liliruro." 63 Mu Purisita kalikukyara ziraro zakye kalikuti kya," Tishishaka zipaki? 64 Nayubu zamahweti iziku shwawura. Murero enu iwure?" Kowo balikukalisa kumushwawura akya ndimatalyeta rufu. 65 Babamwe balikukalisa kumutsera balikufuka kushifateho shakye indi kukalisa kupanga mifirifiri, "Muporofita! "Babberiki balikumuyisa indi kumuzipa. 66 Pu Pitorosi pukarana mwikyo lyu mutara, muxhiki murwakazi uywa babuya iba Mu Purisita kali kuya kukye. 67 Kalikumwana Pitorosi ayimine pumunduro katilitukutiza, kaliku mulyayisisa. Kaliku tikya, "Indiwe korana indi Nazareta, Jeso." 68 Kono kalikushapura, kali kutikya, "Yemwa ndakuyubwa zumatu hweta shazo." Cware kalikudzwa mumutara. 69 Mubuya iyumurwakazi kalikumumwana hapye kalikukalisa kutikya kubapa ibayimine kopa, "Umutu uyopa iyo muxhiki kokuwo!" 70 Kalishapura hapye. Shinako yiche bapa ibarayimine balikutikya koku Pitorosi, "Shinjaha umuxhiki uywa bapa, yewe umu Galileya." 71 Kali kukalisa kusharapura atikya, "Yeye umutu yopa yibatihweta kamuyizire." 72 Papangaho mukombwe wakulira iruwubiri. Petorosi kalikuyanakana mayi ngamata hweta Jeso kokye: "Mukombwe kawuchire kulira kabiri, shundishapure katatu." Kakulyubwa wubbi.