¹ Jeso pukalyukwenda monikereke,murutuwa akye akumumbuza, "Muruti, lyaya mawe ngamaqha indi miyaho yemiqha!'' ² Akutikya kokuwo, ''Matumwana miyaho yemiqha? Kunjemwa lyixiki lyuwe lyishelyikara pwilyiro alyilyumwe lyishelyutsurumuka pyeshi.'' ³ Pukarana pwi kambamo yumuti wa Olive ukalyumupwishira ikereke, Pitorosi, Jokowo, Johani, indi Andiriasi balyukumuwuza kurupati, ⁴ ''Tizira, indini zopani shezipangahara? Zupono kya puzopa kwozo ishezirasisini?'' ⁵ Jeso kalyu kukalyisa kuhweta kuwo, "Nimamere atikya kuku ishe banikitaka. ⁶ Uwunji shebaye shilyina lyanga ndukutikya, 'Mye ndiye,' shebanikitakye. ⁷ Pushena kuyubwa indwa indi mahulyihulyi wi ndwa, nise kubbirayera; izuto zopani shezipangahare, nanga ndipakyo mamyenisizi kangachire kuya. ⁸ Lyisinga shelyu rwenise lyisinga, indu munso shewurwenise wuwumwe munso. Shekube ni zikinyeho muzibaka zizinji, indi zi mpopo. Ngapa makalyero ngukuyubuswa wubbi wukupakuwa. ⁹ Ube umugateri aye. Shebanutwere muzu khuta, shenuzupuwe moma Sinagoge. Sheniyimye nduku toruwa puwuso babakuru indi mashikati shilyibaka lyayemye, nukahwetye wupaki kokuwo. ¹⁰ Nanga ndipakyo lyiyii lyuhwetuwe mulyubu kwolyo. ¹¹ Pushe bakunipata indukunutwara kwi khuta, nishe kubbirayera shina kuhweta. Mwinako yopa, shina kuhweta kutishipyewe kunwe; paqhanwe nakuhweta, mupupo omuchena. ¹² Mukura mutu mbwa betyekye Mukura mutu akya abburuwe, indi she mutu kumwanakye. Bapundu shebapwemye niba shemi bawo indi kubatwara kurufu. ¹³ Shenutoyuwe kumutu kwekye shina lyanga. Kwekye ishatundamyena kutwara mamyenisizi shapalyusuwe. ¹⁴ Pushena kumwana wubbi watishandawura wuyiminye puwahatuswanera [yamati bara aremuhe], nisiye bapa ibana mo Judeya bawurushire kulyurundu. ¹⁵ Nisiye yana pushutuwo shinjiwo ashekutsurumushira pyeshi mwinjuwo kukayisa ichuto , ¹⁶ yana mwifuba ashekushuka kukayisa inguwo. ¹⁷ Bashe baba nuwumayi ibana bapundi indi batinxamisa mulyiba lyopa! ¹⁸ Nirapyere nanyina akya lyishe kuba lyiba lyishi pyepo. ¹⁹ Popa shekube nuwuzuwo wowukuru, indi kumakalyero kayichire kumonuwa, Urezya yamata wumba lyubu, tana papani hapye kamuni shelyibekwo. ²⁰ Nakana Urezya pukalyutsura kumayiba, kunjemwa shuwumbuwa isheshi palyusuwa. Shayemye mukyetwa, akutsura kumayiba. ²¹ Kwekye ikakuhweta kunwe, 'Lyaya, Keresite yini!' 'Lyaya, yina kuna!' shakutishira. ²² Shaba Keresite wibbuzi indi bakutazi wubbuzi, shebabyekwo indi zuponiso indi zimakazo, akya bakitakye, atikwatukwanahara. ²³ Nitokomyere! Ndaniziri zopa shinako. ²⁴ Mayiba nguwuzuwo pungalyu kutsura, lyiba lya kulyeta karema, umwezi kawushumwenika, ²⁵ Zinyata shezuwe kulyiro, indi qhumu yamulyiro yakunyangasa. ²⁶ Balyukumwana Mwana Mutu mumadzudzo shiqhumu indi kumwenika. ²⁷ Shakatumye manyiroyi akye ngaya kushangana paxiki ndi ngatakyetuwa kumipupo inye, kumamyenisizi mwi lyubu indi mbimbiru. ²⁸ Kulyututa shichumwe pumuti wa feyiga. Papani puzutobe zishilyizunywu indi kubika mapapa, imbumbi yina shufupi. ²⁹ Hapye pushena kumwana zopa zatipangahara, shelyi ana shufupi, pumumbero. ³⁰ Injahumu ndatuhweta kunwe, lyisinga lyinako yopani yukukutsura nakana zopa kozo sheza kwisisini. ³¹ Lyiro indu lyubu shezimanye, lyiyii lyanga lyuku kumana. ³² Kuku yayizire zi lyiba lyopa indi nako ateni, nanga manyiroyi ngamulyiro, nanga Umwana, tana She. ³³ Nilyiindire! Nilyaye, shukutikya kaniyizire inako. ³⁴ Tandu mutu yana mumusipiri--indukusiya injuwo akye ndukubika shukwombwa kumamyera injuwo, kwekye mubbereko, akurayera shukombwa akya shimamere. ³⁵ Lyiberera, shukutikya kwoyizire inako yamatiya yomukuru umuni injuwo enu maxuhumu, masuku, mukombwe pushewakulyira, papamwe tyema maxehimu. ³⁶ Akuya papani asekuya kushangana matukwama. ³⁷ Shindatuhweta kunwe, ndashuhweti kwokwo: Nilyaye!"