¹ Rwi Sabata pulyalyi kuya, Maria Magadalena, indi Maria nyina Jakowo, indi Solomoni, balyi kuwura amanga nga qha, atikya bakara xa shitupu sha Jeso. ² Maxehu madana, liiba pulyalyi kuca bakwenda kulidzwa. ³ Bakuhwetizana balyi kutyikya, "I yani kakudzwisa lyuwe lyelyi yaziya pumumbero ulidzwa?" ⁴ Pubali kulyaya, balyukumwana lyuwe lyazjwusuwa pulidzwa, lyelikuru. ⁵ Pubalyi kunjena mulidzwa, bali kumwana murumbwana, murara ziraro zizihwe, usise kurupatyi rwaqhamu, barukuywapa. ⁶ Alikutikya kukuwo, "Nisiye kuywapa. Natishaka Jeso uywa Nazareta ya matakokoterwa. Matatambuka! kunjemwaye pani. Nimwene mo shibaka mobata mubika. ⁷ Ukwenda, Ukazire barutuwa bake indi Pitrosi atikya malitangizi ko Galireya. Kopa mboni kamushangane tandi shamatanityeya." ⁸ Bakwenda kwinje ndi kutiyamo mulidzwa; Balikucacalyika indi kumbyemuka. Kuku shi batahweta kumutu kweke balikuywapa. ⁹ Maxehumu madana iviki yamakalyelo, palikutambuka, akulimwanahaza intanzi ko ku Maria Mgadalena, I kokuyani matadzwitsa mipupo imibbi. ¹⁰ Akwenda akazira ibararana nake shukutikya barana mushururo bali kulira. ¹¹ Batayubwa atikya matipara matamwanuwa kuke, ema batishire. ¹² Akuya kulyimwanahaza mushiwupeho shwurwezi kuba babiri, pubali kwenda mulyubu lyirozi. ¹³ Balikwenda ndi kazira barutuwa kowo, Yemwa bakabatishire. ¹⁴ Jeso akuyakulimwahaza kuba bamanalyanja indi muxiki barasise shikwenda pwitafure, akabanyaza shikwahatishira kwawo indi wukukutu wimyeyo awo, Shikutikya ema batishire bata mumwana pukali kutambuka kubafu. ¹⁵ Akutikya kuwo, "Nakwenda mulyubu, kukutaza lyii lyanga kwa batu kowo. Ibatitishira bati korobezwa shebapalisiwe, ¹⁶ Ibahatitishira shebapewe murandu. ¹⁷ Zusupo zopa shiziraqhama ibatitishira: shilyiina lyanga mbubahindike mipupo yemibbi. Shabahwete mishowo yemipiya. ¹⁸ Shebapatye zunywaka shamanja awo, ati shabanwe shifanu shatibbura, Kamuni shashibabbure. Shababike manjawo pulyiro lya ibatimashirira shebapweliswe." ¹⁹ Shikati pukarukumana kuhweta kokuwo, matayisizwa muliro akasikama kulyanja lya maqhamu lyu Urezja. ²⁰ Barutuwa balikudzwa indikwenda kukutaza muzubaka kozo, U Shikati pokali kusebeza nawo indi kugisa lyii mulyibu lyatyenda ndi zusupo zalyo.