¹ Mwao mazyuba, ka kwina ecinalyanga cinene kame ka baazya zo kulya. Jesu aku kuwa abazyiyiswa bakwe noku bata ye , ² ''Ndi fwila ecinalyanga enshe, kakuli bazwilile habuso ni ba kele neme amazyuba otatwe ni baazya zo kulya. ³ Kuti ndiba booze kumunzi kabanali, nanga bazilikire munjila. Bamwi kure kaba kazwa.'' ⁴ Abazyiyiswa bakwe boku mutaba, ''Kwi tuwora okuwana ezinkwa ziwora kukwana bantu mucibaka ca bulyena ye bakute?'' ⁵ Paho shabuza Bazyiiswa ye, ''zinkwa zoti mukwesi?'' Bo kutaye , ''Tukwesi ezinkwa zeanja ni zobile.'' ⁶ Akuraera ecinalyanga oku kara hanshi. Nahinda zinkwa ze anja ni zobire, akulitumera, noku zicamauna. Akuziha a bazyiyiswa bakwe ye bazibatahire, mi bokuzi tahira ecinalyanga eco. ⁷ Kabakwesi tuswi tuchenya, aha shamana kulitumera kazo, na raera a bazyiyiswa bakwe ye bazitahe nezo. ⁸ Niba lya no kukuta hawa. Mi nibatora tora ho ezi kazisiyalire zicamausi, zeanja ni zobire ezi zuma. ⁹ Kabali bantu balikana ezikiti zo ne. Akuba ta ye baliyendere. ¹⁰ Haho bulyo a kukwera muci sepe na bazyiyiswa bakwe, bokuyenda muciraro ca Dalmanuta. ¹¹ Paho shibakezya aba Falisi noku tatika kukakana neye. Bo kumukumbira ecisupo cizwa kuwiru, ku mulika. ¹² Na tontora mumuzy'a wakwe nokuta ye, '' Oru rusika cinji aha rushaka ecisupo? Zahawa cinu ndimisumwina, kwazya ecisupo eci shaka cihewe koru rusika.'' ¹³ Mi nabareka, aku kabira mucisepe kame, nibakaya kushilya limwi ¹⁴ Haho bazyiyiswa nibazibara kulihindira e nkoko. Kali kabakwesi eci citanta ecinkwa conke. ¹⁵ Aku ba kalimera nokuta ye, ''Mumamere mi mulibabarere kumumeno wa ba Falisi ne Heroda. ¹⁶ Abazyiyiswa boku zuminzana, ''Ye kakuli twazya enkoko.'' ¹⁷ Jesu naazyiba, akuba ta ye ''Cinji aha muli ambauza zokushahinda enkoko? Kamuremuhi? Kamushuwi? Myozyo yenu shiya sihilwa? ¹⁸ Mukwesi mensho, kame kamuboni? Mukwesi matwi, kame kamushuwi? Kamuazyali? ¹⁹ Aha ndika camauna ezinkwa ze anja kubantu bezikiti ze anja, zoti zi zuma ezi nizazyura ezi bbema ze zinkwa ezi nimwa hinda?'' Bokumuta ye, ''Ndi kumi nizo bire''. ²⁰ ''Na ha ndi ka camauna e zinkwa ze anja nizo bire ku bantu balikana e zikiti zo ne, zoti zi zuma zizywire nimwahinda?'' Bokumuta ye, ''Ndi anja nizo bire,'' ²¹ Akuta ye ''Nahanu mushini kushuwisisa?'' ²² Ni bakezya kwa Betesaida. Kuko bantu bo kumuretera omukwame omofu no ku kumbira Jesu ye amukwate. ²³ Jesu akukwata omofu ku anja nokuzwa neye mu munzi. Aha shamusuhira ha mensho no kumukambika maanja, akumubuza ye, ''Kwina eco bwene?'' ²⁴ Akutonda kuwiru, nokuta ye, ''Ndiwene bantu bafwana ezikuni zi yenda.'' ²⁵ Kame aku mukambika maanja ha mensho akwe, paha shaalura mensho akwe mi paha shatatika okubona kame, mi na bona zintu zonshe nenja. ²⁶ Jesu aku mu rukurura ye ayende kunjuwo nokuta ye, ''Wa sha kabili mu munzi.'' ²⁷ Jesu akuyenda na bazyiyiswa bakwe mu minzi ya Sisaria Filipi. Munjira akubuza abazyiyiswa bakwe, ''Abantu bata ye ndime ni?'' ²⁸ Bokumutaba ye, ''Johani Mukorobezi. Bamwi bata ye 'Elia,' bamwi ye 'Olizyumwi waba porofita.'' ²⁹ Akuba buza ye, ''Enwe mbuti muta ye ndime ni?'' Pitorosi akumuta ye '' Ndiwe Keresite.'' ³⁰ Jesu akuba kanisa oku sumwina bantu ka zakwe. ³¹ Paha shatatika kubasumwina ye Mwana wo Muntu nara shandiswa munjira e zingi, nara kaniwa ku bakuru no ku ba Prisita bakuru, no kubañoli, mi nara yayiwa, mumashara amazyuba otatwe nara buka. ³² Naziamba kokushuwahara. Paha Pitorosi shamu kokera kumbali noka mukalimela. ³³ Jesu paha sha tonda kuba bazyiyiswa bakwe no ku lwisa Pitorosi ye, '' Zwe kwangu Satani, kobikite ziazyara zako kuza Nyambe, kono muzintu za bantu.'' ³⁴ Paha shakuwa ecinalyanga na ba bazyiyiswa bakwe bulyaho, akubata ye, ''Haiba kwina ozyu ashaka okundi cilila, ali shampure ye mwini, ahinde cifapano cakwe, nokundi chilila.'' ³⁵ Kakuli ozyo ashaka okahaza obuharo bwakwe nara buzyawa, mi yenshe ozyu nazyawe obuharo bwakwe ke baka lyangu ne zywi, nara buhaza. ³⁶ Cinji awana omuntu muku muna efasi lyonshe no ku sinyeherwa obuharo bwake? ³⁷ Cinji awora kujoboza omuntu no buharo bwakwe? ³⁸ Yenshe ozyu andiswabera ne zywi lyangu murusika rwa bantu bashayi na batenda zibi, Mwana wo Muntu nara muswabera shaka nakezye mu tubo li Beshi na mangeloi acenete.''