¹ Jesu aku zwa nakaya ku mukuro wa Judea ne zibaka zina shilya lyo rwizyi rwa Jorodani, a dxhandiya lya bantu lyo kezya kwakwe hape. kenaho aba ruta hape, shina ho kachili kizo chakwe oku tenda bulyaho. ² Aba Falisi bo kezya kwakwe okezya kumu yereka noku mu buza, '' Nga nji swanero okutiye omukwame a kauhane ne mukaziwakwe?'' ³ Aku batabe ye, '' Mushe zinji na miraera?'' ⁴ Boku ta ye, '' Mushe na zuminiza omukwame okuñore ñoro lye nkauhano noku mu rukurura.'' ⁵ Ndi baka lye myozyo yenu emi kukutu mpaho nami ñorero owo murao, '' Jesu aku ba sumwina.'' ⁶ Kono okuzwa kwi ntazi ye mpupo, ' Nyambe na bumba o mukwame no mukentu.' ⁷ Ke baka lya bulyaho o mukwame nara reka beshi niba nyina noku xhangatira kwa mukentu wakwe, ⁸ Mi bobire boku ba e nyama yonke.' kaba shili bobire, kono she nyama yonke. ⁹ Ka bulyaho echo na shanganyi Nyambe, kureko kuba no mutu ozyo achi bbatura.' ¹⁰ Aho ka bena mwi njuo, aba zyiizwa boku mu buza hape oku amana nechi. ¹¹ Aku bata ye, '' yenshe ozyo a rukurura mukentu wakwe noka shesha ungi a panga obushayi kufosekeza mukentu wakwe we ntazi. ¹² Ati o mukentu na rukurura mu kwame wakwe noka sheshwa kwa ungi, mbushayi a tenda.'' ¹³ Hape boka reta banche ba dana kwakwe ye ezya ba kwate, kono abazyiizwa boku ba kanina. ¹⁴ Kono Jesu aha sha remuha bulyaho, kali na tabela aku ba sumwina ye, '' mureke a banche ba dana ba kezye kwangu, mureke oku ba kanisa, kakuli o mubuso wa Nyambe ngwa bantu ba fwana shina mbabo. ¹⁵ Ke niti ndimi sumwina ye, yensho zyo kali na tambure o mubuso wa Nyambe shina mwanche omu dana kali naka u kabire''. ¹⁶ Mpaho sha hinda banche muma boko akwe noku ba fwiyaura na bikite a maanja habo. ¹⁷ Mi aho sha tatika oruyendo rwakwe, o mukwame aku mu butukira noka tongama ha buso bwa kwe, koku buza ye, '' We muluti mulotu, chinji ndi oro ku tenda ye ndi wane o buharo obo ka bumani?'' ¹⁸ Jesu aku muta ye, '' Chinji aho ndi kuwa ye o murotu? Kwaazyo murotu, mbita Nyambe ye nke. ¹⁹ Ozyi mirao: Oreko ku yaya, oreko ku shaintika, oreko ku hiba, oreke oku paka obusawana, oreko ku homa, okutike esho ne nyoko.'' ²⁰ O mukwame akuta ye, '' Muruti, zonshe zo zintu ndazi mamera okuzwa ku bwanche bwangu. '' ²¹ Jesu aku mutonda noku mutabera. Aku muta ye, '' Chintu chonke chi bulisikite kwako. O botero ka ulisa zonshe zo kwesi noka ha aba botana, noraba ne chibono ku wiru. nga okezye, ondi chilire.'' ²² Keyo ntaba kali na lishuwa nenja aku nanuka na kaya no mozyo u chokete, kakuli ka kwesi chibono chinene hawa. ²³ Jesu aku tonda tonda noku sukurwira bazyiizwa bakwe ye, mbu kababu hawa ku nfumu oka kabira mu mubuso wa Nyambe!'' ²⁴ A bazyiizwa bakwe boku komokwa kao mazywi akwe. kono Jesu aku ba taruseza hape ye, '' banche, mbuti kuli ku kukutu oku kabira mu mubuso wa Nyambe! ²⁵ Mbu tore ye a kamere in kabire mu linsho lye ndonga, ku hito nfumu ye aka kabire mu mubuso wa Nyambe. ²⁶ Niba komokwa hawa noku libuza bo beni ye, '' Cware ndini shaka na hazwe?'' ²⁷ Jesu mpaho sha batonda noku ta ye, '' Ko buntu mbu kababu, kali kwa Nyambe. E zintu zonshe zi oreseka kwa Nyambe.'' ²⁸ Pitorosi aku tatika oku amba kwakwe, '' ko tonde, nitwa ka reka e zintu zonshe noku ku chilira.'' ²⁹ Jesu aku ta ye, '' Ke niti ndimi sukurwira ye, kwaazya ozyo naka reka e njuo yakwe, na banche bakwe kapa mukurwe we chi chikwame ni we chikentu, kapa ba nyina, kapa beshi, kapa bane, kapa e vuu ke baka lyangu nilyo burumiwa, ³⁰ Ozyo kali na amuhere myanda ne myanda mwe linu fasi: A mazyuo, na banche bako kapa ba mukuro be chikwame nibe chi chikentu, kapa nyoko, kapa mwano, kape vuu ne nyandiso, nomwi fasi li kezya, buharo ka bumani. ³¹ Kono obu na bungi bwabo bena ku buso bara ba ku mashara, mi abo bena ku mashara bara ba ku buso.'' ³² Ka bena mwi njira, oku ya kwa Jerusalema, Jesu kali tangize ha buso bwabo. A bazyiizwa niba komokwa, nabo kaba chilire mu rushara kaba tiite. Jesu mpaho sha hinda ekumi ni bobire ku mbali hape aku tatika oku ba sumwina ezo she zina hafwihi noku tendahara kwakwe. ³³ ''Mubwene, kwa Jerusalema tuya, oko mwana wo muntu nara ka tambikwa kuba purisita ba kuru noku bañoli bo murao. Bara mu aturera efu noku mutambika ku machaba. ³⁴ Bara mushwahura, noku mu suhira, noku mu shwatira, noku mu yaya. Kono mu rushara rwa mazyuba wo tatwe nara buka.'' ³⁵ Jakobo ne Joani, a bana ba Zebedea, bo kezya kwakwe noku muta ye, ''Muruti, tu shaka ye otu tendere chonshe cho katu ku kumbire.'' ³⁶ Aku bata ye, '' Zinji ezo mu shaka ye ndimi tendere?'' ³⁷ Boku ta ye, '' Otu zuminize okezya ku kara newe mwi nkanya, zyumwi ku malyo zyumwi kuma monsho.'' ³⁸ Kono Jesu aku ba taba ye, '' Kamu zyi zo mu kumbira. Mu ora oku nywinsa e nkomoki eyo nendi nywe kapa oku hita mwi nkorobezo eyo nendi korobezwe?'' ³⁹ Boku ta ye, '' Tu ora.'' Jesu aku bata ye, '' E nkomoki eyo nendi nywe, mwara inywa. Ne nkolobezo eyo nendi korobezwe, nenwe mura korobezwa kayo. ⁴⁰ Kono kozyo naka ndi kare ku malyo kapa ku mamonsho kali ndime ndi ora kumi ha, kono kuya kabo niba rukisezwa bulyaho.'' ⁴¹ Ba mwimya a bazyiizwa aho shiba shuwa bulyaho, boku nyeererwa Jakobo ne Joani. ⁴² Jesu mpaho sha ba kuwa koku bata ye, '' Muzyi abo ba hindiwa kuba ba eteleli ba machaba baba lyatilire, naba yendesi aba kuru bene nkamaiso ha wiru lyabo. ⁴³ Kono kali nekube bulyaho mu kati kenu. Yenshe ozyo ashaka okuba o munene mu kati kenu a botere okuba omutanga wenu, ⁴⁴ Mi yenshe ozyo a shaka okuba we ntazi mu kati kenu a botere oku ba e chikombwa cha bonshe. ⁴⁵ Kakuli omwana wo muntu kali na kezya kuku berekezwa, kono kezya ku bereka, no ku reta empuruso ku bantu bangi ko buharo bwa kwe.'' ⁴⁶ Bo kezya kwa Jeriko. Aho areka Jeriko na bazyiizwa bakwe ne dxhandiya lya bantu, mwana Timea, ozyo azwa mwa Bartimea, we chi bofu echo kachi kumbiranga, kwi mbali ye njira. ⁴⁷ Aha shechi shuwa ye ndi Jesu wa Nazareta, choku tatika oku shumpura ne chita ye, '' Jesu, mwana Davida, ondi shuwire oku kubaza!'' ⁴⁸ Buna bungi boku mu kanisa, noku mu sumwina ye a tontore. Kono aku lyongora oku tantilira, mwana Davida, ondi shuwire oku kubaza!'' ⁴⁹ Jesu mpaho sha zyimana noku ba raera ye ba mukuwe. Boku kuwa echi bofu ye, oli gorese, zyimane kakuli aku kuwa.'' ⁵⁰ Aku shohera kwina ngubo ya kwe, noku zyimana oku shotoka, no kezya kwa Jesu. ⁵¹ Jesu aku mu taba ye, '' Chinji oshaka ye ndiku tendere?'' Echibofu choku ta ye, Muruti, ndi shaka oku teye ndi bone.'' ⁵² Jesu aku mu taba ye, '' Yende. Entumero yako yaku hozi.'' Haho bulyo aku tatika oku bona hape, noku mu chilira mwi njira.