¹ Na kuwa hantu honke be kumi ni bobire noku baha manta ne ntukero hawiru lya madimona noku hoza matuku. ² Na batuma bayende ku ku kutaza zo mubuso wa Mulimu noku hoza bo ba rwara. ³ A kuba ta ye, ''Mwasha hindi chintu mu ruyendo rwenu - kwaazy o rutaya, kwaazye chikwama, kwaazya mali mi kwaazya e chizyabaro chaha mbali. ⁴ Yonshe njuo muka kabire, muka kare mo mani nemu ka zwe mo. ⁵ Konshoko kali niba mi tambure, hamusi zwa mowo munzi muli zukure ruli ku matende enu mbo bupaki bwenu kuamana nabo.'' ⁶ Boku nanuka no kuhita muminzi, kuya bu sukurura entaba e ndotu nokuya buhoza mu zibaka zonshe. ⁷ Cware Heroda o mu etereli wo rusika rumwi aku shuwa ezo zi pangahara, mi aku lyangana, kakuli kai ambwa kubamwi ye joani mukorobezi naa kabuka ku bafu, ⁸ mi nikwa ambwa ye Elia na bonahara, mi bamwi kaba shita ye mu porofita wa kare na buka. ⁹ Heroda a kuta ye, '' Ninda mu koshora o mutwi Joani, cware ndinuzyu ndi shuwire kezi zintu?'' Cware a kulika kuteye a mubone. ¹⁰ Aho shiba ka boora ba Apositora, boku sumwina Jesu zonshezo niba katenda. Cware aku bahinda, niba kaya ruyendo rure kachenya mu munzi wa Besisaida. ¹¹ Kono e chinalyanga aha chi shuwezo, choku muchilira. Aku ba tambura no ku amba kwabo zo mubuso wa Nyambe, a kuhoza bo kaba shaka kuhozwa. ¹² Cware e zyuba kaliya ku kumina, mi abo be kumi ni bobire bokezya kwakwe noku muta ye, '' Tume chinalyanga okute chi yende mu minzi yi tu zimburukite no ku rubazu zumwi rwe naha muka shakeko mararo ne zilyo, kakuli twina mwechinu chibaka chi likungwire.'' ¹³ Kono aku bata ye, '' Mu bahe zo kulya, ''Boku muta ye, '' Twaazye zinkwa zi tanta e yanja ne nswi zobire - kunje yo kute ye tuyende tuka wure zabo bantu boshe.'' ¹⁴ (Kabali bantu ba kwana e zikiti ze yanja). Na amba ku bazyiizwa bakwe ye, ''Muba kalike mu zikwata zi likana makumi e anja.'' ¹⁵ Bo kutenda bulyaho, noku kalika bantu hanshi. ¹⁶ Mu kuhinda e zinkwa ze yanja ne nswi zobire, na tonda muwiru kwi wiru, akuzi fuyaura noku zi chamauna muzi bbema, aku ziha bazyiizwa bakwe ye bazi tahire chinalyanga. ¹⁷ Bo kulya bonshe no ku kuta, mi ezo niza siyalira boku zi tora-tora- o bu buurusi nibwa zyura e zizuma ze kumi ni zobire. ¹⁸ Mwa yimwi nako eyo Jesu ka rapera yenke, a bazyiizwa kabena neye. A kuba buzaura kuta ye, '' E chinalyanga chita ye ndime ni?'' ¹⁹ Boku taba ye, ''Joani mukolobezi. Kono bamwi bata ye ndi Elia, bamwi bata ye ngwa zyumwi wa ba porofita ba kare na kabuka. ²⁰ A kubata ye, '' Cware enwe muta ye ndime ni?'' Pitorosi aku taba ye, ''Mu keresite wa Mulimu.'' ²¹ Kono akuba kalimela chaha ye basiye kuzi amba kubantu, ²² na amba ye, '' O Mwana o Muntu nara shandiswa mi a ba kurwana na ba pulisita bakuru na bañoli bo murao nibara mukana, nara yayiwa mi mwi zyuba lyo butatu nara buswa.'' ²³ A kubata bonshe ye, '' Haiba kwinozyo ashaka kundi chilira, a rukere kuli kana noku hinda e chifapano chakwe e zyuba ne zyuba noku ndi chilira. ²⁴ Ozyo ka haze buharo bwakwe mbwa buzyawe, kono zyo ka zyawe buharo bwakwe ke baka lyangu mbwa buhaze. ²⁵ Mburotu nji bwinaho kute ye o muntu a mune e fasi lyonshe, no kuzyawa kapa oku lishwahura we mwini. ²⁶ Yenshozyo na ndi swabere na mazywi angu, Mwana wo Muntu neye narezya ku muswabera shaka nakezye mwi tubo lyakwe, mi nomwi tubo li Beshi na mangeroi a chenete. ²⁷ Kono ndimi sumwine niti ye, kwinabo bena hanu abo kali ni bafwe niba shini kubona mubuso wa Nyambe. ²⁸ O kuzwa ku mazyuba a likana e yanja ni otatwe Jesu shana ambi awo mazywi, na hinda Pitorosi ne Joani ne Jakobo niba kaya hawiru lye rundu ku kurapera. ²⁹ Aho kakwesi a rapera, e chibupeho chakwe cho kuchincha, mi e zizyabaro zakwe zo ku tuba chaha-chaha. ³⁰ Mubone, a bakwame bobire kaba amba neye, Mushe ne Elia, ³¹ abo niba bonahala mwi tubo e nene lichena chawa. Niba ambaura ha musipili wakwe, owo kawu kezya ku zyuzilizwa mwa Jerusalema. ³² Cware Pitorosi nabo kabena neye kabena mwi ñonzi, kono aho shiba kabuka, bo kubona e tubo na bakwame bobire bazyimene neye. ³³ Aho shika ba kayenda kure ne Jesu, Pitorosi aku muta ye, '' Nfumu, mburotu kute ye tube hanu. Tuzyake zi tuntururu zo tatwe, cimwi nchako, chimwi ncha Mushe, chimwi ncha Elia''(kali kazyi zo kakwesi a amba) ³⁴ Aho ka ambe zi, e zyoba lyokezya kuba wumbiliza, mi kaba tiite aho kaba kabira mu zyoba. ³⁵ Ezywi lyo kuzwa mu zyoba, nelita ye, ''Ozyu ndi mwanangu, ozyo a ketetwa, mu muteeze.'' ³⁶ Ezywi aho limana kuambwa, Jesu a ku waniwa azyimene yenke. Boku tontora mi kali niba sumwina bantu kuamana nezo niba bona. ³⁷ Mu zyuba li chilira, aho shiba kaboora kwi rundu,e chinalyanga chinene choku mushangana. ³⁸ Mi hape, o Mukwame kena mu chinalyanga aku shumpura ye, Muruti, ndiku kumbira ye nditondere Mwanangu, kakuli ndeye yenke ndikwesi. ³⁹ Obwene, o moya mubbi umu yendesa, mi a kutakuma haho. I mubulisa manta noku muzwisa e furo ku muromo. kachi mureki, mi chimu zimbisa chaha. ⁴⁰ Nda kumbili bazyiizwa bako ye bachi zwise kono bana kangwa. ⁴¹ Jesu a kutaba ye, enwe mu rusika karu zumini nenwe mu shinyehete, nji nako ikuma kwi shaka ndibe nenwe noku zuminiza mikwa yenu? rete kunu mwano.'' ⁴² Aho kakezya mwanche, e dimona lyoku mushohera hanshi noku munyunga ku mubulisa manta. Kono Jesu aku tanda o muzya waazya kuchenete noku muhoza noku mubooza kubeshi. ⁴³ Cware bonshe niba komokwa maanta a Nyambe. Aho kabashi komoketwe bulyaho kezo ka panga, akuta bazyiizwa bakwe ye, '' ⁴⁴ Aa mazywi akabire mukati ka matwi enu: O Mwana wo Muntu nara betekwa mu maanja a bantu.'' ⁴⁵ Kono kali niba shuwisisa ezi ziambo. Kazi zikitwa kwabo shira kali kaba shuwa e ntaruso yazo. Mi hape kaba tiite oku buza yezi ziambo. ⁴⁶ Cware enkani zokuba mukati kabo kuamana nozyo nabe munene. ⁴⁷ Kono Jesu ko kuzyiba e ziambo zabo mu myozyo, aku hinda mwanche mudana noku mubika ha mbali yakwe, ⁴⁸ noku bata ye, ''Yenshe ozyo na tambure ozyu mwanche mwi zina lyangu, ndime na tambuli; mi yenshe ozyo andi tambura, na tambuli nozyo na ka ndituma. Yenshe o muchenya mukati kenu mwenshe ndo munene.'' ⁴⁹ Joani a kutaba, ''Nfumu, nitwa bona o muntu akwesi a tanda madimona mwi zina lyako mi twamu kanisi, kakuli katu chilili.'' ⁵⁰ Jesu aku bata ye, ''Mwasha mu kanisi, kakuli ozyo kami kananisi ngwa kwenu.'' ⁵¹ A mazyuba ho shia hura hafwihi okute ye bamu hinde, a ku liketera kuya kwa Jerusalema. ⁵² Naa tuma batumiwa habuso bwakwe, mi boku yenda ka kabira mu munzi wa ma Samaria kamu rukiseza ezintu zonshe. ⁵³ Kono bantu bechina chibaka kali niba ka mutambura kakuli shika liketere kuya kwa Jerusalema. ⁵⁴ Cware a bazyiizwa ba Jakobo ne Joani aho shiba bonezo, bokuta ye, ''Nfumu, tu raere mulilo uzwa ku wiru u kezye hanshi uba sinye?'' ⁵⁵ Kono a kuzoka noku ba kanisa. ⁵⁶ mi bokuya kwa umwi munzi. ⁵⁷ Aha kabaya buyenda mwinjira, zyumwi aku muta ye, ''Mbondi ku chilire konshoko koye.'' ⁵⁸ Jesu aku muta ye, ''Aba Mbwe ba kwesi marambo, ne zizyuni zikwesi zi zyuo zazo, kono o Mwana wo Muntu aazya oko a kambika mutwi.'' ⁵⁹ A kuta zyumwinya ye, ''Ndi chilire''. Kono akuta ye, ''Nfumu,ndisiye ndiyende ndi kazike ba Tata.'' ⁶⁰ Kono aku muta ye, '' Reke bafu ba zike bafu babo. Kono ewe, yende ka hasanye kure nomu bumwa o mubuso wa Nyambe.'' ⁶¹ Cware zyumwi akuta ye, ''Mbondi ku chilire,Nfumu, kono pili ndika raane bamwi njuo yangu.'' ⁶² Jesu aku mutaba ye, ''Kwaazya ozyo a tanga kulima noku tonda mu mashara a swanera ku kabira mu mubuso wa Nyambe.