¹ Cware aha sheku mane zi zintu, o Nfumu aku keta ba makumi e anja ni obire, mi akuba tuma bobire ka bobire, kubuso bwakwe kuya ku munzi no munzi nomwi zibaka shikaya yemwini. ² Aku bata ye, '' Oku shinja nkungi chaha, kono a babereki mbache. Cware mu kumbire o Nfumu wa bashinji a tume ba bereki ku kumu shinjira. ³ Muyende munjira yenu. Mubone, ndi mituma mbwe nzi ngu mukati ka bantuu. ⁴ Mwasha hindi mikotana ya mali, kwaazya e mikotana ye zizwato, kwaazya zishangu mi mwasha rumeresi muntu munjira. ⁵ Yonshe njuo muka kabire, che ntanzi mukate ye, 'E nkozo ibe mweyi njuo!' ⁶ Haiba mwina o muntu we nkozo, E nkozo mboibe hawiru lyakwe, kono haiba kwaazya, mboi boore kwako. ⁷ Mukare mweyo njuo iswana, kulya no kunywa ezo ba miha, kakuli nzezo zi boozera o musebezi owo ba panga. Mureke ka yendaura kuzwa mweyi njuo kuya mwa yimwi. ⁸ Wonshe munzi muka kabire, mi boku mi tambura, mulye zo ba mi tahira, ⁹ mi muhoze abo ba rwara bena mo. Mubate ye, O mubuso wa Nyambe wa kezyi hafwihi nenwe.' ¹⁰ Hamushi kabira mu munzi mi kaba mi tambuli, muye mu mazyira ne muta ye, ¹¹ 'Nanga e mbundu yo mu munzi wenu li kakatire ku matende etu tuli mi singwira! Kono muzyibe zi: O mubuso wa Mulimu shiwa kezyi hafwihi.' ¹² Ndimi sumwina kute ye mwi zyuba lye nkatulo mwara aturwa bubbi kuhita muatwiro wa mwa Sodoma. ¹³ O bushomani mbwenu ma Korazini! O bushomani mbwenu, ma Besisaida! Nali e misebezi niya tendwa kwenu niya tendwa mwa Tire ne Sidoni, ne niba baka kare kare, kukara niba zwesi zizyabaro ze zisaka ne twe. ¹⁴ Kono kura fwanikiza kuma Tire noku ma Sidoni kutanta yenu. ¹⁵ Enwe, ma Kapenauma, mu hupura ye mwara ya kuwiru? Kure-kure, nimwara retwa hanshi mwi here. ¹⁶ Ozyo a teeza kwenu kwenu a teeza ni kwangu, mi ozyo a mikana ndime na kani, mi ozyo andi kana a kana nozyo nandi tumi.'' ¹⁷ Ba makumi a likana e yanja ni obire boka boora ne ntabo, nibata ye, ''Nfumu, nanga madimona nia lineera kwetu mwi zina yako.'' ¹⁸ Jesu aku bata ye, ''Ndaku buhite Satan a wa kuzwa ku wiru mbwe muni. ¹⁹ Mubone, ndamihi manta oku lyata ma zyoka ne nge, ni hawiru lya manta wonshe e zira noku zi koma, mi noku bure cho chiora kumi horofaza. ²⁰ Nanga hakube bulyaho mwasha tabi kezi bulyo, ye e myoya e mibbi ya lineeli kwenu, kono mutabe chaha chaha ye a mazina enu a ñoretwe ku wiru.'' ²¹ Mweyina e nako iswana aku nyanguruka mu Muzya u Chenete, nokuta ye, ''Ndi kutemba,Tata,Nfumu we wiru ne fasi, kakuli kamu zikite zi zintu kwabo ba talifite nabo ba shuwisisa, mi nimwa zi zukwira kwa bena baazya o ku rutitwe, mbwee mbanche badana. Ee, Tata, kakuli ezo kazi tabisa mumensho ako.'' ²² E zintu zonshe ninda zihewa ku ba Tata, mi no kubure ozyo azyi o Mwana mbita Beshi, mi no kubure ozyo azyi Beshi mbita Mwane mi yenshe ozyo aliketera Mwane ku lisunda kwakwe.'' ²³ A kuzokera ku bazyiizwa noku bata kumbali ye, '' E nfuyauzi nzabo babona e zintu ezo mubwene. ²⁴ Ndimi sumwina ye, bungi bwa ba porofita na barena kaba lakaza kubone zi zintu mubwene, kono kali niba zibona noku shuwa e zintu ezo mu shuwa, kali niba zi shuwa.'' ²⁵ Mubone, o muzyiizi zyumwi we mirao ya ma Juda a ku zyimana kute ye a mulike, nata ye, ''Muzyiizi, nchinji kandi tende okute ye nendibe mubuso kau mani? ²⁶ Jesu aku muta ye, ''Nchinji chi ñoretwa mu murao? Mbuti mu chibara?'' ²⁷ Mu kuha e nkarabo a kuta ye, ''Nora shaka Nfumu Nyambe no mozyo wako wonshe, no muzya wako, ni ka manta ako onshe, mi ne ngana zako zonshe,nabo o zyakite nabo shina mbulyaho o lishakira.'' ²⁸ Jesu aku muta ye, No tabi nenja. Pange zizi, mi niwara hara.'' ²⁹ Kono o muzyiizi, mu kushilira oku li chenesa, a kuta Jesu ye, ''Ndini ndi bambene neye?'' ³⁰ Mu kuha e nkarabo Jesu akutaba ye, ''O mukwame zyumwi kazwa mwa Jerusalema naya kwa Jeriko. A ku wana a basa, abo niba mutapa e zibya zakwe, noku mudama, noku mureka a zirikite. ³¹ Ke ntohonolo omu pulisita zyumwi kahita mweyo njira, mi aho sha mubona, aku hitilira kuya mwina shilya. ³² Bulyaho hape o muLivi, aho ahura hecho chibaka noku mubona, aku hitilira kuya mwelina shilya. ³³ Kono o muSamaria, aho kena mu ruyendo, a kezya kuhura ho kena. Aho shika mubona, Na mufwira enshe. ³⁴ Na mukezyera noku sanza ha zirabi zakwe kusintiraho oli ne waine, noku zingaiza ho. Aku mubika ha chipau chakwe, mi aku mutwara mwi hotera omo ka babarerwa. ³⁵ Eli she lizwa masikusiku akuhinda ma sixpensi obire, no kuha mwini we hotela, nokuta ye, 'Omu ba barere mi za hawiru ezo o sebelise, shaka nendi ka boore, ndarezya ndii kulife.' ³⁶ Ndini kwaba botatwe, ozyo mu hupula ye, ndo mukwakwe wozyu na takaralwa?'' ³⁷ O muzyiizi aku ta ye, Ndozywina na mufwira e nshe.'' Jesu aku muta ye, ''Yende mi oka tende bulyaho.'' ³⁸ Cware aha kabaya buyenda, aku kabira mo wumwi munzi, mi o mukentu a kuiwa Mareta aku mu tambwira mu njuo yakwe. ³⁹ Kakwesi mwanchu wakwe we zina lya Maria, ozyo na kara ku matende o Nfumu noku shuwa ezywi lyakwe. ⁴⁰ Kono Mareta ka patehete oku rukisa o kutahura e zilyo. A kezya kwa Jesu, nokuta ye, ''Nfumu, waazya ku biraere ye mwanchu wangu nandi siyi nendi sebeza ndenke? O mute a kezye andi tuse.'' ⁴¹ Kono o Nfumu aku mutaba noku muta ye, ''Mareta, Mareta, o biraere ke zintu zingi, ⁴² kono nchintu chonke cho butokwa. Maria na liketeli cho butokwa, echo kali nechi hindwe kwakwe.''