1 येशुय तोबो कीष्तील या पुलुओ, र हुफीन्त याबाओ, र याय सहरल याकेओ । 2 नोरय या लेउङ तानल अस्यादे ओलेउ, तोबो पक्षघातीलाई या रहयो । नोराई विश्वास रहङदे येशुय नो पक्षघात ताो मीलाई हैयालेओ, लुजा आनन्दीत ताच्यो । जेय पाप क्षेमा तादे लीज्या ।” 3 नला कोही शास्त्रीरय नोराई कार्ल इतानो हैलेकेर, “आउ मीरय ईश्वर नीन्दा दोदे लीज्या ।” 4 येशुय नोराई विचाररलाई थाहा सन्केर र हैयालेओ, “कतान्या जेर जेय युङल दुष्त विचार दोदे जे लीज्या ? 5 सु पाङ चाही हैलेन्या सजीलो लीज्या, “जे पापर क्षेमा तादे लीज्या हैलेन्या सै सोचीके र बारिच्यो हैलेन्या ?” 6 तर मीराई जालाई पृथ्वील पाप क्षमा दोन्या अधिकार ले हैलेन्या पाङ जेरय सन्या धुच्यो ।” याय नो पक्षघातीलाई हैयालेओ, “सोन्के, न तानर सोचैके र न झीम बान्के ।” 7 नो छिन्ङ नो मी ओ सोओ र ओ झिमदे ओबाओ । 8 जब भीडरय आउ ओ रहङो, नोर छक्क ताकेर र मीरलाई इतानो अधीकार योन्या परमेश्वरलो प्रशंसा दोकेर । 9 येशु नङाई याबाकाई याय मत्ती ओमीन दोसीउ मीलाई या रहङो, जो कर सोचैन्या पोल चुसीदे ओ नैज्याउ याय नोलाई हैयालेओ, ङालाई पछैच्यो । “नो मत्ती सोओदे याय छिन्ल लागीकेर । 10 जब येशु ज्याउ ज्यान्या झीमल या चुसीउ, भ्या कर सोचैन्यार सन पापी मीरय येशु सन याय चेलार सका बोलोङज ज्याउ या ज्योओ । 11 जब फरीसीरय आउ रहङकेर, नोरय याय चेलारलाई हैलेकेर, “कतान्या जेराई गुरु कर सोचैन्यार सन पापीर सका चुसीदे ज्योर ?” 12 जब येशुय आउ या थयो, याय हैयालेओ, “क्याङल बल्या ताओरलाई डाक्टरलो खाँचो मा परि, केबल नोरलाई याज खाँचो ताई जो ज्वरो हाईसीउ लेर ।” 13 बाच्यो र आउलो अर्थ कता हो हैलेदे पैसीच्यो, “ङा दया ङा चाही, तर बलीदान ताच्यो ।” कतान्याकी ङा, धर्मीरलाई पश्चताप दोन्या लागीत खुल्न्या लेदे हुसीउ माहङक, तर पापीरला लागी ङा हुओ हो । 14 नो छिन्ङ वप्तिसमा योन्या यूहन्नाला चेलार या लेउङ हुकेर, र हैलेकेर, कतान्याकी गेर सन फरीसीर प्राय: उपवास गे चुसीई, तर जेय चेलार उपवास माचुसीर ?” 15 येशुय नोरलाइ हैयालेओ, “कता व्याहाल हुसिउर, ब्याउला नोर सका बोलङज ताकाइ पनि दुखी तारदा ? तर नो छा हुन्या ले, जब ब्याउला नोर लेउङाई टाढा लाङसीन्या ले, र नोर उपवास चुसीन्या लेर । 16 कोहीरय पनि पुरानो ताो क्वाल नयाँ क्वालो टुक्रा माजोरी, कतान्याकी नो टुक्रा क्वाङाई चीसीन्या ले, र नल झन माचाउ कुङ तान्या ले । 17 नता कोही दोङका मद्यलो जाल नयाँ दाखमद्य नैर । नोरय नीतानो जैकेर भन्या, नो जा पान्या ले र पार दाखमद्य पोखीसीन्या ले, र मद्यलो जा नास तान्या ले नोलो सत्ताल, नोरय नयाँ दाखमद्यलाई नयाँ मद्यलाई नयाँ मद्यलो जाल नैर, र नेहेबोलोज सुरक्षीत तार । 18 जब येशुय नोरलाई आउ पाङर हैलेदे या लीज्याउ, “तोबो अधिकारी ओहुओ र येशुलाई दण्डवत ओदोओ । होय ओ हैयालेउ, ङा मेमा जा भर्खज सीदे ले, तर बादे जेय नोलो ओ क्याङ तरल कुई नैदे योच्यो र नो फरी बहोरिन्या ले ।” 19 नो छिन्ङ येशु या सोओ र होलो छिन्त याबाओ र याय चेलार पनि या छीन्ङ लागिकेर । 20 बाह्र वर्षङाई भ्या झी बगीन्या तोबो मेमा येशुलो छिन्ङ ओहुओ, र याय क्वालो छेउ ओ छुईउ । 21 कतान्याकी नोय ओल्लाई इतानो हैलेदे ओल्लो, “ङाय यालो क्वा याज ङा छुईके भन्या पनि ङा समन्या ङाले ।” 22 तर येशु छिन्दे ओल्दे या रहङो र नो मेमालाई या रहङो, र हैयालेओ, “मेमा जा, साहास दोच्यो । जेय विश्वासय जेय सम्दे जेले ।” होकाई नो मेमा होपाईनाज सम्दुके । 23 जब येशु नो अधिकारीलो झीमल या केओ, याय बासीली तपन्यार सन भीडय घेओ होहल्ला दोसीउ या रहङो । 24 याय हैयालेओ, “होदे बाच्यो, कतान्याकी आउ मेमा सीदे मालेर तर आउ ङ हल्दे लीज्यार ।” तर नोर यालाइ गील्ला दोदे साहाकेर ।” 25 जब भीडरलाई पाखाङ परिङसीउ ओलेउ, या कोठा भीत्रल याबाओ र याय नोलो ओ कुइ या केहेओ, र नो मेमा ओसोओ । 26 आउ खबर नो छेत्रलो चारै लेउदे ओ फैलीउ । 27 जब येशु नङाई तादे याबाज्याउ, नेहेबोलो मीलुङ मा रहङन्यारय यालाई पछैकेर । नोर घेओ स्वरय कीहीन्या लागीकेर र इतानो हैलेकेर, “दाऊदला जा, गे तरल दया दोच्यो ।” 28 जब येशु झीम भित्रल याबाओ, नो मीलुङ मा रहङन्या मीर या लेउङ हुकेर । येशुय नोरलाई हैयालेओ, “ङा आउ दोन्या ङा धुय लेदे कता जेर विश्वास जेदोय ?” नोरय यालाई हैलेकेर, “ज्यु हजुर प्रभु ।” 29 नो छिन्ङ येशुय नोराई मीलुङ छुइदे हैयालेओ, “जेरय विश्वास दोसीउ अनुसार जेराई लागित आउ गदोसीक ।” 30 होकाई नोराई मीलुङ ओ फैसीउ । नो छिन्ङ येशुय नोरलाई हैयालेओ, “ख्याल दोच्यो की आउ पाङ बारे सुलाई पनि थाहा गमाताक ।” 31 तर नो नेहेबोलो मी पाखाङ या पुलुओ र आउ खबर नो यरिया भरिज ओ फैलीउ । 32 जब नो नेहेबोलो मी या बारीज्याउ, त जना झ्या लगीसीउ पाङन्या माधुन्या मीलाई येशु लेउङ या रहयो । 33 जब नो झ्या आत्मा ओ घपैसीउ, तब नो मी नो पाङो र भीडर छक्क ताकेर र हैलेकेर, ईस्रायलल इतानो खर्कज रहङसीदे ओमालेओ । 34 तर फरिसीरय इतानो हैयालीज्या, “आउय भ्याराई मालिक लेउङाई जीमो झ्यार पुलैज्या ।” 35 येशु पार सहरल सन नाङखार्ल याबाओ । याय राज्यलो सुसमाचारलो प्रचार दोदे सन पार कीसीमला रोग सन ज्वरो हाईसीउरलाई समैदे नोराई सभाझीमल याय या पयो । 36 जब याय भीडरलाई या रहङो, या नोराई लागीत दयाय या बरिउ, कतान्याभन्या नोर बिचलीत सन निराश यालेउ । नोर ग्वाला बिनालो भेडार मितानो यालेउ । 37 याय चेलारलाई हैयालेओ, “फसल के प्रशस्त लीज्या, तर खेतालार कम ताकेर । 38 आउकारण फसललो प्रभुलाई चानोज प्रार्थना दोच्यो, ताकी याय या फसललो लागित खेतालार चानो परिङच्यो ।”