1 जब येशु डाँडाङाई मेल झरिदे हुकेर, घेओ भीडय यालाई ओपछयो । 2 रहङच्यो तोबो कुहुरी याय छेउल ओहुो र याय ङाहाक घोप्टो ओ परिउ, र नोय हैओलेओ, “हे प्रभु, जेय इच्छा जेदो के भन्या ङालाई माहार समैन्या जेधुय ।” 3 येशुय या कुइय होलाई या छुओ र हैयालेओ, “ङाय ङा चाही जे चाउ ताच्यो ।” तब होपाईनाज ओ कुहीरीङाई हो शुद्ध तादुके । 4 येशुय होलाई हैयालेओ, “रहङच्यो सु मीरलाई कताज हैतालेच्यो जे यम लागीच्यो; हेलाईज पुजाहारीर लेउङ सतन्च्यो र नोराई ङाहाक गवाही गताक हैलेदे मोशाय आज्ञा दोसीउ अनुसार भेटी चढैच्यो ।” 5 जब येशु कर्फन हुमल बादे यालेउ, तोबो कप्तान या लेउङ हुदे यालाई या गीनो । 6 हे प्रभु, ङामी त जना नौकर पक्षघातीय तादे झीमल गो लोङदे लीज्या, र हो भ्या समस्याल ले । 7 येशुय नोलाई हैयालेओ, “ङा हुदे होलाई समैन्या ङाले ।” 8 कप्तानय हैओलेओ, “प्रभु, जेय ङालो झीमलो छाना मेल हुन्यालो लागीत ङा योग्यला ङामाले, जेय केवल वचन याज पाङदे योच्यो के र ङामी नौकर समन्या ले । 9 कतान्याकी ङा पनि तोबो इतानो मी हो, जो अधिकारलो मेल नैसिउ ङाले, र ङा मेले पनि सीपाहीर लेर । ङा तोबोलाई “बान्के, हैङाले र हो बाय, र छुत्तोलाई हुन्के हैङाले हो हुय, होकाई ङामी नौकररलाई नो दोके हैङाल नो दोय ? 10 जब येशुय आउ या थयो, या अचम्म ताकेर र यालाई पछैन्यारलाई हैयालेओ, “साँचोज ङा जेरलाई हैङाले, ईस्रायलल पनि ङाय इतानो विश्वास लेउ सुज दैदे ङामालेउ । 11 ङा जेरलाई हैङालेय, भ्या जनार पुर्व सन पच्छेउङाई हुन्या लेर । होका नोर अब्राहाम, इसाहाक सन याकुब सका स्वर्गीय राज्यलो ज्याउल चुसीन्या लेर । 12 तर राज्यला जार पाखाङ अन्धकारल ख्यासीन्या लेर, जोङ रुवावासी सन हार कैन्या तान्या लेर ।” 13 येशु नो कप्तानलाइ हैयालेओ, “बाच्यो । जेय विश्वास दोसीउ मीतानोज गताक ।” होकाई नो घरीलज नोलो नौकर ओ समो । 14 जब येशु पत्रुसलो झीमल याहुो, याय पत्रुसलो माइजु ज्वरो ताला परिसिउ या रहङो । 15 येशुय नोलो कुइत या छुईउ, होकाई ज्वरो नोलाई ओ राहाओ नो छिन्ङ नोर सोदे या सेवा दोन्या लागीकेर । 16 जब ओदेक ओ परिउ, मीरय झ्या लागीसीउ भ्या मीरलाई येशु लेउङ यारहयो । याय तोबो वचनङाई झ्यालो आत्मारलाई, 17 यैजैदे यशैया अगमवक्ता लेउङाई हैलेसीउ इतानो वा पुरा ओताओ, यायज गेराई बिरामर या लाङो र गेचन रोगर या धपयो ।” 18 जब येशुय भीडरलाई याय यैदे होदे या रहङो, याय गालील समुन्द्ररलो छुत्तो लेउदे बान्यालो लागीत हैयालेओ । 19 नो छिन्ङ त जना शास्त्री हुदे यालाई हैलेकेर, “गुरुज्यु, जे जोङ जे बाय ङा जेलाई नैजैदे पछैन्या ङाले ।” 20 येशुय नोलाई हैयालेओ, “स्यालरलो कुङ लीज्या, र आकासल भुर्न्या चराराई घोल लीज्या, तर मीराई जालो के ओङई नैन्या पो कताङज माले ।” 21 चेलार मध्ये त जनाय यालाई हैलेकेर, “प्रभु, ङाहादे ङालाई बादे ङा बाबुलाई गाडीन्या योच्यो ।” 22 तर येशुय नोलाई हैयालेओ, “ङालाई पछैच्यो, र मुर्दारय मुर्दालाई गाडीर नीतानोज राहाच्यो ।” 23 जब जेशु नाउल पुलुदे यालेउ, याय चेलारय पनि नाउलज चुसीकेर । 24 होकाई समुन्द्रल बाकाई घेओ हुरी बतास ओ चलीउ, होकाई नो किस्तील समुन्द्ररलो हल्काय कपन्या ओ पानो । नो बेलाल येशु अस्यादे यालेउ । 25 चेलारय यालाई इतानो हैलेदे सोचैन्या लागीकेर, “हे प्रभु, गेलाई बचैच्यो, गेर सीन्या गे पान्ज्या ।” 26 येशुय नोरलाई हैओलेओ, “ए अल्प विश्वासीर हो, जेराई विश्वास कताङ ओबाओ ? नो छिन्ङ या सोकेर होकाई हुरी बतास सन समुन्द्ररलाई या हप्कयो । नो छिन्ङ नो पार सन्त ताके । 27 नो चेलार छक्क ताकेर र हैलेकेर, आउर खीतानो मीर लेर सुन्द्रर सन बतासय पनि याय आज्ञा खीर ?” 28 जब येशु समुन्द्ररलो हुफीन्त गदरिनीराई देशल केदे यालेउ । नल नेहेबोलो झ्या लागीसीउ मीरय यालाई दैकेर । नोर खादरङाई पुलुदे हुदे यालीज्याउ र भ्या खतर्नाक या लीज्याउ । नोकारण, नो यम तादे सु मीर बान्या यामाधुज्याउ । 29 रहच्यो नोरय घेओ स्वरल कीहीकेर र हैलेकेर, “हे परमेश्वरला जा, जे सका गेलो कता सरोकार ? कता टोकीसिउ समय भन्दाा ङाहादेज जे आङ गेरलाई दुख योन्या जे हुओ हो ? 30 नल नो छेउलज भ्या गलरलो तोबो बथान या छाज्याउ, 31 नो झ्यालो आत्माय यालाई बीन्तती दोदे हैलेकेर, यदी जेय गेलाई पाखाङ जे पुलै भन्या, गेरलाई गललो बथानल परिङच्यो ।” 32 येशुय नोरलाई हैयालेओ, “बान्के !” नो झ्या आत्मार पाखाङ पुलुदे गलराई भीत्ररल पसीकेर । होकाई पार गलर नो भीरालो नामल मेल जोकेर सन समुन्द्ररल तेहेकेर होकाई नोर रिहील डुबीदे सीकेर । 33 गलर छान्य मीर नङा जोदे बाकेर । होकाई जब नोर सहरल बाकेर, नोरय पार पाङ हैलेकेर, र नो झ्या आत्मा लगीउ मीलाई कता तादे ओलेउ ना पार हैलेकेर । 34 होकाई पार सहरला मीर येशुलाई रहङन्या ओहुओ जब नोरय यालाई रहङकेर, नोरयय यालाई नोराई इलाका राहादे आङाई बाच्यो हैलेदे हैलेकेर ।