¹ इन्साफ तादोच्यो, र जेराई पनि इन्साफ तान्या ले । ² कतन्याकी जो इन्साफय जेरय इन्साफ जेदोय, नो इन्साफय जेरलो पनि इन्साफ जेरलो पनि इन्साफ तान्या ले । जो नापय जेरय जे नापीसीई, नो नापय जेर पनि नापीसीन्या जेलेय । ³ कतान्याकी जेरय जे भाइलो मीलुङल लेउ पराललो जीमो टुक्रालाई जे रहङे, तर जेय या मीलुङल ताओ मोहोदालाई जेर ख्याल जेमा दोय ? ⁴ जेय जे भाइलाई, “ङालाई जेय मीलुङल ताओ पराललो टुक्रालाई पुलैन्या योच्यो” हैलेदे कैलेदे हैलेन्या जे धुय, जब की मोहोदा चाही जेला जेय मीलुङलज लीज्या ? ⁵ ए कपती, ङाहादे जेलो जे मीलुङल ताओ मोहोदालाई पुलैच्यो, र जेय जे भाइलो मीलुङल ताओ पराललो टुक्रा पुलैन्या जेय चाउ सका रहङन्या जेले । ⁶ जो पाङ पवित्र ले, नो काडारलाई तायोच्यो, र जेय मोतीर गलराई ङाहाक ता ख्याच्यो । मनीके नोरय नोलाई खङय सुयुल्न्या लेर, र ओल्दे जेरलाईज कैरयाया । ⁷ नीहीच्यो नो जेरलाई योसीन्या ले । खिम्च्यो, र जेरय दैन्या जेले । ढकढकैच्यो, र जेरलो लागीत फैसीन्या ले । ⁸ कतान्याकी नीहीन्यार पारय दैन्या लेर । र खीम्च्यो पारय ज दैन्या लेर र धकधकैच्यो जेराई लागीत तफैसीन्या ले । ⁹ जेर मध्ये इतानो मी सु लीज्या, जोय ओ जाय भरे नीहीकाई लुङ योया ? ¹⁰ अथवा होय ङाहा नीहीकाई होलाई गुल योया ? ¹¹ आउकारण, जेर दुष्त तादे पनि जेलो जारलाई कैजैदे चाओ वस्तर योन्या ताई हैलेदे जेय जे सन भन्या, जेराई स्वर्गल तान्या बाबुय या सका नीहीन्यारलाई खा भ्या जैदे योरया ? ¹² आउकारण, मीरय जेरलो लागीत जीतानो दोसीउ जे चाही, जेरय नोर सका नीतानोज दोन्या ताई । नोज व्यवस्था सन अगमवक्ताराई शिक्षा ताय । ¹³ साँघुरो झलाङाई भित्रल पसीच्यो । कतान्याभन्या विनासल केन्या झला सन यम फराकीलो ताय, र नो यमङाई बान्या मीर भ्या लेर । ¹⁴ कतान्याकी जीवनल डोरैन्या झला सन यम साँघुरो ताई र दैन्या तके याज तार । ¹⁵ धुतैन्या अगमवक्तारङाई होसीयार चुसीच्यो, जो भेडालो भेसल हुर, तर नोर करेसीउ बाउसार तार । ¹⁶ नोराई सही लेउङाई जेरय नोरलाई सरेन्या जेले । कता मीरय काँडालो घारीङाई अङगुर दुबरदा, वा काँडालो बिरुवाङाई अञ्‍जीरलो सही तीरदा ? ¹⁷ यैजैदेज पार सीङय चाओ सहीज फलयो, तर माचाउ सीङय माचाउ सहीज फलयो । ¹⁸ तोबो चाओ सीङय माचाउ सही फलैन्या माधुओ, नता माचाउ सीङय चाओ सहीज फलैन्या धुय । ¹⁹ हरेक सीङ जोय चाओ सही माफलयो, नो पल्सीन्या ले र मेहेल ख्यासीन्या ले । ²⁰ आउकारण, नोराई सही लेउङाई ज जेरय नोरलाई सरेन्या जेले । ²¹ “प्रभु, प्रभु” हैलेन्या पार स्वर्गलो राज्यल बान्या मालेर, तर स्वर्गल लेन्या ङा बाबुलो इच्छालाई पालना दोन्यालाई याज स्वर्गलो राज्यल बान्या ले । ²² नो छा भ्या मीरय ङालाई हैलेन्या लेर, “हे प्रभु, हे प्रभु, कता जेय मीनल गेय हगमवानी पाङदे गे मालेउदा ? कता जेय मीनल झ्यार गेमा धपयोदा ? र जेय मीनल भ्या शक्तीशली हेनर दोदे गेमालेओदा ?” ²³ तब ङा खुलम खुल्ला नोरलाई घोषणा दोन्या ङाले, ङाय जेरलाई कर्कज सर्दे ङा मालेउ ! ए दुष्त हेन दोन्यार हो ङा लेउङाई टाढा बाच्यो । ²⁴ नोकारण, हरेक जोय ङा वचन थयो र नो पालना दोय, नो बुद्धिमान मी मीतानो तान्या ले, जोय ओ झिम पहर तरल ओजयो । ²⁵ नम ओबाओ, खोला ओहुओ, बतास ओ चलीउ र नो झीमलाई ओ झोमो, तर नो झिम ओमा तेहेओ, कतान्याकी नो झीम पहर तरल ओलेउ । ²⁶ तर पार जोय ङा वचन थयो र पालना मादोय, नो मुर्ख मी मीतानो हो जोय ओ झीम बालुवा तरल ओजयो । ²⁷ नो नम ओबाओ, खोला ओहुओ, र बतास ओ चलीउ होकाई नो झीमलाई ओ झोमो र नो ओढलीउ र पुरा रुपल नास ओताओ । ²⁸ जब येशुय आउ वचनर हैलेदे या खेमो, भीडर याय वचन थैदे भ्या अचम्म ओताओ । ²⁹ कतान्याकी याय नोराई शास्‍त्रीरय मीतानो जैदे माहङक, तर नोरलाई अधीकार र सका या पयो ।