¹ येशुय या बाह्र जना चेलारलाई तोबो पोल या खुलो र नोरलाई माचाउ आत्मार धपैन्या अधीकार यायओ होकाई हरप्रकारला रोगर सन ज्वरो हाईसीउरलाई चाओ जैन्या अधीकार पनि यायओ । ² आउ बाह्र जना प्रेरितराई मीन आउ प्रकारला ले । ङा ङाहादे ङा सीमोन ( जोलाई याय पत्रुस पनि हैलेदे या खुल्ज्याउ ), र नोलो भाइ आन्द्रीयास; जब्दीयालो ओ जा याकुब सन नोलो भाइ यूहन्‍ना; ³ फीलीप सन बार्थालो माइ; थोमा सन कर सोचैन्या मत्ती, अल्फायसलो जा याकुब सन थेदीयस; ⁴ सिमोन कनानी सन यहुदा ईश्क्रोरियत, जोय येशुलाई क्योओ परिङन्या मीलेउ । ⁵ आउ बाह्र जनारलाई येशुय नाङ खार्दे या परिङो । याय नोरलाई निर्देशन यायओ र हैयालेओ, “गैर यहुदीर चुसीन्या कोही पोर याल ताबाच्यो, र सामरीरलो कोही पनि सहरल ताबाच्यो ।” ⁶ आउलो सत्ता, ईस्रायललो माहासीउ भेडा लेउङ बाच्यो । ⁷ होकाई जब जेर जे बाय, “स्वर्गलो रा्य छेउलज हुदे लीज्या, हैलेदे प्रचार दोच्यो ⁸ रोगीरलाई चाओ जैच्यो, सीओरलाई जीउदो जैच्यो, कोडिरलाई शुद्ध जैच्यो र झ्या आत्मारलाई धपैच्यो । जेरय हैज दैदे जे लीज्या, हैज योच्यो । ⁹ जेराई थैली कोही सुन, चाँदी सन पीतल ता घुर्यो । ¹⁰ जेराई यमलो लागीत झोला वा अबुर क्‍वार जुत्तार झुइर ता घुर्च्यो, कतान्याकी खेतालारय याज्याउ दैन्या ताय । ¹¹ जेर जो सुकै सहर सन नाङ खार्ल जे बाय, नल सु योग्यला ले लेदे पत्ता लगैच्यो र जेमा बाकाई सम्म जेर नलज चुसीच्यो । ¹² जब जेर झिमल जे पसीइ, तब नोलाई अभीवाद दोच्यो । ¹³ यदी नो झीम योग्यला ले भन्या, जेराई शान्ती नोलो तरल गहुक । तर यदी नो मी योग्यला माले भन्या जेराई शान्ती जेर लेउङज ओल्दे गहुक । ¹⁴ जोय जेरलाई ग्रहण मादोय सन जेराई वचन मा थयो, जेर नो सहरल वा नाङ खारङाई पुलुदे बाकाई, जेराई खङलो धुलो तकतकैदे बाच्यो । ¹⁵ साँचोज ङा जेरलाई हैङालेय, न्यायलो छाल नो सहरलो भन्दा सदोम सन गमोरालो इन्साफ भ्या सहीउ धुन्या ताय । ¹⁶ रहङच्यो ङा जेरलाई बाउसाराई खार्ल भेडा मीतानो ङा परिङज्या । आउकारण, गुल मीतानो चलाख सन ढुक्‍कुर मीतानो सोझओ ताच्यो । ¹⁷ मीरङाई होसीयार चुसीच्यो ! नोरय जेरलाई परिषदरल योन्या लेर र नोरय ओल्लो सभा झीमरल जेरलाई कोर्रा लगैन्या लेर । ¹⁸ होकाई शासकर सन राजार सन अबुर जातीराई लागीत गवाहीलो रुपल ङामी कारण जेर नोराई ङाहाक रैसीन्या जेले । ¹⁹ जब नोरय जेरलाई योन्या लेर, तब जेरय कैजैदे कता पाङन्या हैलेन्या बारेल फीक्री तादोच्यो, कतान्याकी जेरलाई पाङो परिन्या पाङ नो बेलालज योसीन्या ले । ²⁰ कतान्याकी पाङन्या जेर माहङक, तर जेरल पाङन्यार जेराई बाबुलो आत्मा लेर । ²¹ दाजुय भाइलाई सैन्यालो लागीत क्योओ परिङन्या ले, र बाबुय ओ जालाई जारय या बाबु आमैलो विरुद्धल सोन्या लेर र सैच्यो लेदे नोरलाई योन्या लेर । ²² ङा मीनलो खातिर जेर पारङाई घीनै सीन्या ले । तर जोय अन्तीम सम्म सही, नो मीलो उद्धार तान्या ले । ²³ जब नोरय आउ सहरल जेरलाई सतैन्या लेर, छुत्तो सहरल धोङच्यो, कतान्याकी साँचोज ङा जेरलाई हैङाले, मीलो जा यामाहुकाई सम्म जेर ईस्रायलला सहर घुमीदे खेम्‍न्या जे माले । ²⁴ चेला ओ गुरु भन्दा घेओ तान्या माले, नता नौकर ओल ओ मालीक भन्दा घेओ ताय । ²⁵ चेला ओ गुरु सन नौकर ओ मालीक मीतानो तान्याज होलो लागीत प्रयाप्‍त ताय । यदी नोरय झिमला मालीकलाई ज बाल जीबुल हैलेदे लेर भन्या, नोरय या झीमरलारलाई झन खा भ्या बदनाम दोरया । ²⁶ नोकारण, नोर सका ता छेच्यो कतान्याकी सु पाङर पनि कप्सीउ माले, जो प्रकट ताय र कोही पाङ पनि मोहोसीउ माले जो अवस्य थाहा तान्या ले । ²⁷ जो ङा जेरलाई अध्याँरोल हैलेन्या ङाले, नो उज्यालोल हैलेच्यो र जो जेरय जे नाल सुस्त रुपल़ जे थै, नो झीमलो घुरीङाई घोषणा दोच्यो । ²⁸ नोर सका ता छैच्यो जोय क्याङलाई सैर, तर आत्मालाई सैन्या माधुर । बरु, आत्मा सन क्याङलाई नरकल नास दोन्या धुन्यार सका छेच्यो । ²⁹ कता जीमो सिक्‍काल नेहेबोलो भङेरार मायसीरदा ? तर पनि जेराई बाबुलो इच्छा बीना नोर मध्ये तोबो पनि नामल मातेहेर । ³⁰ तर जेराई ङईला चेमर पनि गन्ती तादे लेर । ³¹ ताछेच्यो । जेर भ्या भगेरार भन्दा भ्या मुल्यला जेले । ³² आउकारण, जोय ङालाई मीराई ङाहाक ग्रहण दोय, ङ पनि होलाई स्वर्गल तान्या ङा बाबुलो ङाहाक ग्रहण दोन्या ङाले । ³³ तर जोय मराई ङाहाक ङालाई इन्कार दोय, ङा पनि होलाई स्वर्गल तान्या ङा बाबुलो ङाहाक इन्कार दोन्या ङाले । ³⁴ ङा पृथ्वील शान्ति रैन्या ङा हुओ हैलेदे विचार तादोच्यो । ङा शान्ती रैन्या माहङक, तर तरवारल चलैन्या ङाहुओ हो । ³⁵ कतान्याकी ङा मीलाई होय बाबुलो विरुद्ध सन मेमा जालाई होलो आमैलो विरोधल सन बुहारीलाई होय सासुलो विरोध जैन्या ङा हुओ । ³⁶ मीराई जार होलो ओ घराना भीत्ररला तान्या लेर । ³⁷ जोय ङालाई भन्दा ओ बाबु सन आमैलाई प्रेम दोय, नो ङालो लागीत योग्यलो माताय । र जोय ओ जा सन मेमा जालाई ङा भन्दा भ्या प्रेम दोय, हो ङालो लागीत योग्यलो माताय । ³⁸ जोय ओ क्रुश छेन्दे ङा छिन्ङ मा लागी, हो ङा लागीत योग्यला माताय । ³⁹ जोय ओ जीवन दयो, होय नो गुमैन्या ले । तर जोय ङा खातीर ओ जीवन गुमयो, होय जीवन दैन्या ले । ⁴⁰ जोय जेरलाई स्वागत दोय, होय ङालाई स्वागत दोय र जोय ङालाई स्वागत दोय, होय ङालाई परिङन्यारलाई पनि स्वागत दोय । ⁴¹ जोय अगमवक्ता तासीउ कारणय स्वागत दोय, होय अगमवक्तालो इनाम दैन्या ले । होका जोय धर्मी मीलाई नो धर्मी तासीउ कारणय स्वागत दोय, होय धर्मि मीलो इन्साफ दैन्या ले । ⁴² जोय आउ जीमोर मध्ये कोहीरलाई चेला तासीउ कारणय त खुरी जुरो रिही याज ओँहोन्या योया, साँचोज ङा जेरलाई हैङाले, होय कोही रितिय ओ इनाम गुमैन्या माले ।