¹ जब येशुय भीडरलाई या रहङो, यार डाँडा तरल याबाओ । यार मेल हुदे या चुसिउ छिन्ङ याय चेलार या लेउङ हुकेर । ² याय या ह्‍या या खुलीउ र नोरलाई इतानो हैलेदे या पयो, ³ धन्य आत्माल दिन तान्यार, कतान्याभन्या स्वर्गलो राज्य नोराई ज हो । ⁴ धन्य तार नोर जोय सोक दोर, कतान्याभन्या नोरय सान्त्वना दैन्या लेर । ⁵ धन्य नम्रर कतान्याभन्या नोरय पृथ्वील राज्य दोन्या लेर । ⁶ धन्य धार्मीकतालो लागीत करेन्यार सन तिर्खैन्यार, कतान्याभन्या नोर तृप्‍त पारिन्या लेर । ⁷ धन्य दयाबानर, कतान्याभन्या नोरय दया दैन्या लेर । ⁸ धन्य आत्माल शुद्ध तान्यार, कतान्याभन्या नोरय परमेश्‍वरलाई रहङन्या लेर । ⁹ धन्य मेल मीलाप दोन्यार कतान्याभन्या नोर परमेश्‍वरलो सन्तानर कहलैसीन्या लेर । ¹⁰ धन्य धार्मीकतालो लागीत सतैसीउर, कतान्याभन्या स्वर्गलो राज्य नोराईज हो । ¹¹ जेर धन्यलार जे हो, जब मीरय जेरला अपमान दोर र जेरलाई दुख कष्त योर, वा ङालो कारणय जेरलो विरुद्धल धुतैदे पार किसीमला माचाउ पाङर हैलेर । ¹² आनन्दित ताच्यो र भ्या खुसी ताच्यो, कतान्याकी स्वर्गल जेराई इनाम घेओ तान्या ले । कतान्याभन्या यैजैदेज जेर भन्दा ङाहादे ङा अगमवक्तारलाई मीरय यैजैदेज सतैदे यालेओ । ¹³ जेर आउ पृथ्वील साखी ताच्यो । तर यदी सापीय ओ स्वाद माताके भन्या, आउउलाई फरी कैजैदे नुनीलो जैन्या ? आउलाई पाखाङ ¹⁴ जेर आउ संसारलो ज्योतीर हो । डाँडा तरल सुचन्सीउ सहर खर्कज पनि मोहोसी माधुय । ¹⁵ न ता मीरय बत्ती चाङदे डालो एकपर, बरु नोलाई सामदानल नैर र झीमल तासीउ पारराई लागीत नोय उज्यालो योय । ¹⁶ मीराई खार्ल जेराई ज्योती यैजैदेज गचम्कीक, की नोरय जेराई चाओ हेनरलाई ग रहङकर र स्वर्गल तान्यारय जेराई बाबुलो प्रशंसा गदोकर । ¹⁷ ङा अगमवक्तार वा व्यवस्थाङाई नास जैन्या याहुओ हो हैलेदे तासोचीच्यो । ङा नोरलाई नास दोन्या माहङक, तर पुरा जैन्या ङा हुओ हो । ¹⁸ कतान्याकी ङा जेरलाई साँचोज हैङालेय, की स्वर्ग सन पृथ्वी माहादे मावाकाई सम्म सन पार पाङ पुरा माताकाई सम्म व्यवस्थालो तोबोज पाङ बीतिदे बान्या माले । ¹⁹ नोकारण, जोय आउ आज्ञारला जीमो भन्दा जीमो पाङरलाई भङ्ग दोय र अबुररलाई पनि नीतानो दोन्या पयो,नो स्वर्गलो राज्यल पार भन्दा माचाउ थहरैसीन्या ले । तर जोय आउ पाङरलाई खीय र नोज दोन्या पयो, हो स्वर्गलो राज्यल पार भन्दा झेनो थहरैसीन्या ले । ²⁰ कतान्याकी ङा जेरलाई हैङालेय, की जेरलो धार्मीकता फरीसी सन शास्‍त्रीरलो भन्दा भ्या माताके भन्या, जेर कोही रितिय परमेश्‍वरलो राज्यल बान्या जेमाले । ²¹ दोङका समयल नोरलाई इतानो हैलेसीउ जेरय थैदे जेले, हत्या ता जैच्यो, हत्या दोन्या इन्साफलो जोखीमल परिन्या ले । ²² तर ङा जेरलाई हैङाले, जे भाइ सका रिसीन्या जो पनि इन्साफलो जोखीमल परिन्या ले । र जो कोहीरय पनि ओ भाइलाई नङ हेन मालागीन्या मी ! हैलेदे हैलेय भन्या, नो न्यायल च्यासीन्या ले । र जो कोहीरय ‘नङ मुर्ख !’ हैलेय, नो नरकलो मेहेल परिन्या जोखिमल तान्या ले । ²³ नो कारण, यदी जेय वेदील जे भेटीर जे चढैकाई जे भाइ सका जेय विरुद्धल कता पाङर ले भन्या नो पाङ जे सम्झीके भन्या, ²⁴ जेय भेटी नो वेदीलो ङाहाक राहाच्यो र जे यम लागीच्यो र ङाहादे जे भाइ सका मीलाप दोच्यो, तब हुदे जे भेटीर चढैच्यो । ²⁵ जेलाई दोष लगैन्या सका अदालतलो यमल हो सका बान्या बेलाल ज मीलाप दोच्यो, मनीके जेलाई दोष लगैन्याय, जेलाई न्यायकर्तालो कुइल योया, र न्यायकर्ताय अधिकारीलो कुइल योरया,र जेलाई झ्यालखानाल झाया । ²⁶ साँचोज ङा जेरलाई हैङलेय जेरलो ऋणलो तोबो सिलो पनि माफोकाई सम्म जेर नङाई खर्कज पाखाङ हुन्या जेमालेय । ²⁷ जेरय यैजैदे हैलेसीउ पाङ थैदे जेले, “व्यभीचार तादोच्यो ।” ²⁸ तर ङा जेरलाई हैङाले, की यदी सुय तोबो मेमालाई माचाउ युङय रहङके भन्या, नोय ओ युङल नो सका यौन दोसीउ ताय । ²⁹ यदी जेय दाहीन्या मीलुङलो कारण जे ठक्‍कर जे ज्योय भन्या, नोलाई पुलैदे ख्याच्यो कतान्याकी पार क्याङ नरकल ख्यासीन्या भन्या जेय क्याङलो कोही तोबो भाग ख्यान्याज जेलो लागीत चाओ ताय । ³⁰ यदी जेय दाहीन्या कुइलो कारण जेज्यो भन्या, नोलाई पल्च्यो र नोलाई ख्याच्यो । कतान्याकी पार क्याङ नरकल बान्या भन्दा जेय क्याङलो तोबो भाग ख्यान्या जेलो लागीत चाओ ताय । ³¹ इतानो पनि हैलेसीउ ओलेउ, जोय ओ ज्यालाई राहाय, होय नोलाई छोतपत्रलो कागज गयोक। ³² तर ङा जेरलाई हैङालेय, की छुत्तो सका अस्यान्या पाङ बाहेक ओ ज्यालाई त्यागीन्याय नोलाई । व्यभीचारी लीज्या हैलेदे हैलेय, र नोलो छोतपत्र दोसीउ छिन्ङ फरी नो मेमा सका व्याहा दोन्याय व्यभीचार दोय । ³³ फरी, जेरय ङाहादे ङा समयल ताओरलाई इतानो हैलेसीउ थैदे जेले झै “धुतैदे कसमय ताज्यो, तर परमप्रभुल नो सफतर पुरा जैके ।” ³⁴ तर ङा जेरलाई हैङालेय, की सफत ताज्योच्यो, नता स्वर्गलो कतान्याकी नो परमेश्‍वरलो सिहासन हो; ³⁵ नता पृथ्वीलो कतान्याकी नो यालो लागीत पाउदान हो; नता यरुशलेमलो, कतान्याकी नो माहान राज्यलो सहर हो; ³⁶ नता जेय क्याङलो सफत ताज्योच्यो, कतान्याकी जेरय तोबो केसलाई पनि पलाङो वा मोलो जैन्या जेमाधुय । ³⁷ तर जेराई पाङ, होलाई होज वा माहङकलाई माहङकज हैलेन्या गताक । नो भन्दा भ्या पाङ दुष्तङाई हुसीउ हो । ³⁸ जेरय इतानो हैलेसीउ थैदे जेल, मीलुङलो सत्ताल मीलुङ सन होलो सत्ताल हो । ³⁹ तर ङा जेरलाई हैङाले, जो दुष्त लीज्या नोलाई प्रतिरोध तादोच्यो । नोलो सत्ताल, जोय जय दाहीन्या गालाल पोहोय, होलाई जेलो छुत्तो गाला पनि थाङदे योचीके । ⁴⁰ यदी कोहीरय जे सका अदालतल बान्या चाहीके भन्या सन जेय क्‍वा लाङदे बाके भन्या, नोलाई जेलो बर्की पनि योच्यो, ⁴¹ जोय जेलाई तकीलो मीटर बान्यालो लागीत बाध्य जयो, हो सका नेहेलो मीटर बाच्यो । ⁴² जेर सका नीहीन्या पारलाई योच्यो, र जेर सका सफत निहीन्यारलाई इन्कार तादोच्यो । ⁴³ जेरय इतानो हैलेसीउ थैदे जेले, “जेय छीमेकीरलाई जेरय प्रेम दोच्यो, र सत्रुरलाई घीनैच्यो ।” ⁴⁴ तर ङा जेरलाई हैङाले, जेय सत्रुरलाई प्रेम दोच्यो र जेरलाई सतैन्याराई लागीत प्रार्थना दोच्यो, “जेरलाई सरापीन्यारलाइ आशीष योच्यो, र जेरलाई घिनैन्यारलो लागीत चाओ हेन दोच्यो ।” ⁴⁵ ताकी जेर स्वर्गल तान्यार जराई बाबुलो जार हैलेसीन्या धुच्यो, कतान्याकी याय चाओ सन माचाउ नेहेबोलोलो लागीत याय घामलाई हुओ लगैर होकाई धर्मी सन अधर्मी नेहेबोलोलो लागीत नम बादे योर । ⁴⁶ कतान्याकी यदी जेलाई प्रेम दोन्यारलाई याज प्रेम जेदोय भन्या जेरय कता इनाम जेदोयादा ? कता कर उथैन्यारय पनि नीतानोज मादोरदा ? ⁴⁷ यदी जेरय जे दाजु भाइरलाई याज अभिवादन जेदोके भन्या, अबुरय भन्दा जरय कता भ्या जेदोओदा ? कता गैर यहुदीरय पनि नीतानोज मादोरदा ? ⁴⁸ नोकारण, जैलेदे जेरला स्वर्गला बाबु सीउ लेर, नैजैदेज जेर पनि शीद्ध तान्या ताय ।