¹ नो छिन्ङ सैतानङाई परिक्षाल परिन्याज ओ ताजयाउ, होकाई पवित्र आत्मा लेउङाई येशु उजाड पोल लाङसीकेर । ² होकाई चालीस लाक चालीस रि या उपवासल रहीसीउ छिन्ङ या या करेओ । ³ परिक्षा दोन्याय हुदे यालाई हैओलेओ, “यदी जे परमेश्‍वरला जा जेले भन्या, आउ लुङरलाई भरे तान्या आज्ञार योचिके । ⁴ तर येशुय हैयालेओ, “इतानो सर्सीउ लीज्या, मी केबल भरेय याज मा भाँचीई, तर परमेश्‍वरलो ह्‍याङाई पुलुसीउ हरेक वचन लेउङई बाँचीसी ।” ⁵ नो छिन्ङ सैतानय यालाफ पवित्र सहरल ओ लाङो होकाई यालाई मन्दीरलो पार भन्दा झेनो पोल ओ लाङो । ⁶ होकाई यालाई हैओलेओ, “यदी जे परमेश्‍वरला जा जे हो भन्या, मेल फाल झाच्यो, कतान्याकी इतानो सर्सीउ दोन्या लेर: होकाई जेय खङ लुङल ता बज्रीक लेदे नोरय जेलाई या कुईय रोत्तज छेन्या लेर ।” ⁷ येशुय नोलाई हैयालेओ, “इतानो सर्सीउ ले, नङय परमप्रभु न परमेश्‍वरलो परिक्षा तादो ।” ⁸ फरी, नो सेतानय यालाई तोबो झेनो पोल ओ लाङ र संसारला पार वैभव सन नला राज्यर ओ सनो । ⁹ नोय यालाई हैओलेओ, “यदी जेय घोप्‍टो परिदे ङालाई दण्डवत जे दोके भन्या, आउ पार वस्त ङा जेलाई योन्या ङाले ।” ¹⁰ नो छिन्ङ येशुय नोलाई हैयालेओ, “सैतान,आङाई बान्के ! कतान्याकी इतानो सर्सीउ लिज्या, “नङय परमप्रभु परमेश्‍वरलो याज आराधना दोन्या नल, र नङय याय याज सेवा दोन्या नले ।” ¹¹ होकाई नो दुष्त यालो ङाहाकाई ओबाओ, र रहङच्यो, स्वर्गदुतर हुदे यालो सेवा दोकेर । ¹² होकाई जब यूहन्‍ना क्योसीकेर तब येशुय या थयो, या गालील ओल्दे हुकेर । ¹³ याय नासरत याराहाओ, र या कर्फन हुमल याबाओ र नल या चुसीउ जो जबुलुन सन नप्‍तालीला यरियाल गालील समुन्द्ररलो छेउलज ओलेउ । ¹⁴ यशैया अगमवक्ता लेउङाई हैलेसीउ पाङर पुरा तान्यालो ला गित इतानो ओताउ, ¹⁵ गैर यहुदीरलो गालीललो यर्दन हुफीन्त, समुन्द्रर लेउदे, जबुलुनलो भुमी सन नप्‍तालीलो भुमील ! ¹⁶ अन्धकारल चुसीनउ मीराई माहान ज्योती रहङदे लेर, र नो यरियाल सिन्यालो छाँयाल चुसीउराई तरल तोबो ज्योती हुदे लीज्या । ¹⁷ नो समयङाई येशुय प्रचार दोन्या या थालीउ होकाई हैयालेओ, “पश्‍चाताप दोच्यो क्षमा नीहीच्यो, कतान्याकी स्वर्गलो राज्य नजीकलज हुदे लीज्या ।” ¹⁸ जब या गालीललो समुन्द्रर छेउल याबारीज्याउ, याय नेहे दाजु सन भाइ पत्रुस हैलेन्या सिमोन सन होलो भाइ अन्द्रीयासलाई जाल रहीसीज्याउ या रहङो, कतान्याकी नोर ङाहा सैन्यार या लेउ । ¹⁹ येशुय नोरलाई हैयालेओ, “हुच्यो, ङा छिन्ङ लागीच्यो, र ङा जेरलाई मिरलो ङाहा क्योन्या जैन्या ङाले ।” ²⁰ होपाईनाज नोरय जाल राहाकेर र याय छिन्ङ लागीकेर, ²¹ जब येशु नङाई याबाज्याउ याय छुत्तो नेहेबोलो दाजु भाइरलाई या रहङो । नोर जब्दीयालो जो याकुब सन होलो भाइ यूहन्‍ना यालेउ । नोर या बाबु जब्दीया सका नाउल चिशिउ जालर यारुपज्याउ । याय नोरलाई या खुलो, ²² र नोरय होपाईनाज नोरलो नाउ सन बाबुलाई राहादे यालो छिन्ङ बाकेर । ²³ येशुय गालीलला सभा झीमरल पैदे, परमेश्‍वरलो राज्यलो सुसमाचार प्रचार दोदे सन मीराई खर्ल विभीन्‍न प्रकारला रोग सन ज्वरो हाइसीउरलाई सर्मैदे गालीलला पार पोल बाकेर । ²⁴ याय बारेल ताओ समाचार खबर सीरीया भरी ओ फिजीसीउ, र याय ङाहाक मिरय नोरलाई पारलाई रैहीकेर जो ज्वरो हाइसीउर यालेउ, विभीन्‍न रोगर सन भ्या हुर्दे हैरान यालेउ, र नो झ्यारङाई बसल परिदे यालेउ र नोर जो चरी पाङ लागीदे ओलेउ र पक्षघातीर यालेउ । ²⁵ गालील, डेकापोलीस, यरुशलेम, यहुदीया, सन यर्दन हुफीन्ताङाई हुसीउ घेओ भीड याय छिन्ङ ओ लागीउ ।