1 नो समयल वप्तिसमा योन्या युहन्ना यहुदीयालो उजाड पोल इतानो हैलेदे प्रचार दोदे हुकेर, 2 “पश्चाताप दोच्यो क्षमा निहीच्यो,कतान्याभन्या स्वर्गलो राज्य छेउलज लीज्या । 3 कतान्याभन्या आउ मी नोर ज हो, जोलो बारेल यशैया अगमवक्ता लेउङाई इतानो हैलेसीउ ओलेउ, उजाड पोल त जना किहीन्यालो स्वर, परमप्रभुलो यम तयार जैच्यो, याय यमर सोझो जैच्यो । 4 अब यूहन्नाय ऊँटलो भुत्लालो क्वा सन कम्मरल छालालो पेटी याजासीउ । याय ज्यान्या वस्त सलह सन बनला महर ओलेउ । 5 नो छिन्ङ यरुशलेम, पार यहुदीया सन यर्दन खोला येदे होदेला पार यरियाला मीर या लेउङ हुकेर । 6 नोरय या या पाप स्विकार दोदे यर्दन खोलाल वप्तिसमा या लाङो ( रिहील डुबीकेर ), 7 तर जब याय भ्या फरीसीर सन सदुकीर वप्तिसमालो लागीत या लेउङ हुसीउ या रहङो, तब याय नोरलाई हैयालेओ, या गुललो सन्तानर हो, हुओ लागीउ क्रोधङाई धोङन्या जेरलो सुय चेतावनी ओयओ ? 8 पश्चतापलो लागीत सुहीन्या सै फलैच्यो । 9 र जेय खार्ल इतानो विचार तादोच्यो, “अब्राहामज गेराई बाबु लेर ।” कतान्याकी ङा जेरलाई आउ हैङाले, की अब्राहामला लागीत परमेश्वरय आउ लुङरलाई पनि या सतन जैन्या धुर । 10 सीङलो जराल खा ङाहादेज परिदे खेम्दे ले । आउकारण, चाओ फल मा फलैन्या पार सीङ पल्दे ढलैसीन्या ले, र मेहेल ख्यासीन्या ले । 11 ङा जेरलो पश्चातापलो लागीत रीहीय वप्तिसमा ङा योय । तर ङा छिन्ङ हुन्यार चाही ङा भन्दा शक्तीशाली लेर, र ङा याला चप्पललर घुर्या मीतानो पनि योग्यका ङा माले । याय जेरलाई पवित्र आत्मा सन मेहेय वप्तिसमा योन्या लेर । 12 याय रलालाई चाउ सका सफा दोन्या सन धन्सारल यालो पीमा थुप्रैन्या या सका नीफनैन्या सु पो याय कुइत लीज्या । तर याय धसरारलाई चाही खर्कज मेहे सयो माधुसीन्या मेहेय ददैन्या लेर ।” 13 नो छिन्ङ यूहन्नाङाई वप्तिसमा लाङन्यालो लागीत येशु गालीलङाई यर्दन खोलाल याहुओ । 14 तर यूहन्नाय इतानो हैलेदे यालाई छेकीन्या या पानो, ङाय ची जेलेउङाई वप्तिसमा लाङो परिन्याल कता जे चाही ङा लेउङ जे हुज्या ?” 15 येशुय जवाफ योदे नोरलाई इतानो हैयालेओ, “आर्क चाही इतानोज गताक, कतान्याकी पार धार्मीकता पुरा दोन्या गेय लागीत उपयुक्त लीज्या ।” तब यूहन्नाय यालाई वप्तिसमा लाङन्या यायओ । 16 याय वप्तिसमा ताओ छिन्ङ येशु होपाङनाज रिहीङाई पाकाङ पुलुदे याहुओ, र रहङच्यो, यालो लागीत स्वर्ग ओ फैसीउ । याय परमेश्वरला आत्मा ढुकुर मीतानो मेल भरिदे याय तरल याहुओ याय या रहङो । 17 रहङच्यो स्वर्गङाई इतानो हैलेन्या तोबो स्वर ओहुओ, “उर ङामी प्रिय ज हो । ङा आउर सका प्रशन्न ङा लीज्या ।”