1 जब छकालन्या ओताओ, पार मुख्य पुजाहारीर सन मीराई एल्डररय येशयलाई सैन्या यालो विरोधल जाल रम्केर । 2 नोरय यालाई पोदे नङाई लाङकेर, र हाकीम पीलातस लेउङ योकेर । 3 नो छीन्ङ जब यालाई धोका योन्या यहुदाय येशुलाई दण्ड योसीउ ओरहङो, नोलाई पछुतो ओताओ र मुख्य पुजाहारीर सन एल्डरलाई नो चाँदीलो तीस गोता पैसा स ओल्दे ओयओ, 4 र हैओलेओ, “ङाय निर्दोष मीलाई धोका यादे पाप दोदे ङाले ।” तर नोरय हैलेकेर, गेलाई नोलो कता सरोकार ? जेय जेज सन्च्यो । 5 होकाई नोय नो चाँदीलो सिक्कार मन्दीरल ख्यादे नङाई पाखाङ ओबाओ र झुनीसिदे ओसीओ । 6 नो मुख्य पुजाहारीरय चाँदीलो सिक्कार लाङदे हैलेकेर, “आलाई ढुकुटील नैन्या चाउ माताय, कतान्याकी आउ झीलो मोल हो ।” 7 नोरय आपासल आउ बारेल सल्लाहा दोकेर र नो पैसाय पर्देशीरलाई दफन दोन्या कुमाल्यालो हेङ लहङकेर । 8 आउकरणय नो हेङलाई आछिमलो छा सम्म पनि झीलो हेङ हैलेसी, 9 यैजैदे यर्मीया अगमवक्ताय हैलेसीउ वचन पुरा ओताओ, “ईस्रायलला मीरय यालो लागीत टोकीसीउ मुल्या चाँदीला तिस गोत सिक्का नोरय या लाङो, 10 र परमप्रभुय ङालाई हैलेसीउ कारण नोरय कुमाल्यालो हेङलो लागीत नो योकेर ।” 11 होकाई येशु नो हाकीमलो ङाहाक या च्यासीउ, र हाकीमय यालाई या गीनो कता जे यहुदीराई राजा जे हो ?” यशुय नोलाई जवाफ यायओ, “जेयज नीतानो हैजेलीज्या ?” 12 तर जब मुख्य पुजाहारीर सन एल्डरर लेउङाई यालाई दोष ओ लगैसीउ, याय कताज जवाफ यामायओ । 13 होकाई पीलातसय यालाई हैलेकेर, “कता जेय विरोधल लगैसीउ पार आरोप जेय जेमा थयो ?” 14 तर याय तोबो पनि पनि जवाफ यामायओ । नोकारण, नो हाकीम भ्या अचम्म सन चकीत ताकेर । 15 होकाई चाड पर्वलो छाल भीड लेउङाई चुनीसीउ तोबो कैदीलाई राहान्या हाकीमलो प्रथा- नीयम ओलेउ । 16 नो समयल नोर सका बारब्बा मीन दोसीउ तोबो कुख्यात कैदी ओलेउ । 17 नैतादे, जब नोर आपसल भेला ताकेर, पीलातसय नोरलाई हैलेकेर, “ङाय जेराई लागित सुलाई राहासीउ जे चाही, बारब्बा सै येशु जोलाई ख्रीष्ट हैलेसीई ?” 18 कतान्याकी होलाई था ओलेउ, नोरय यालाई नोर लेउ. रिसीदे योदे ओलेउ । 19 जब हो न्यायकर्तालो रुपल चुसीदे ओलेउ, होलो ज्याय होलाई खबर ओ परिङो र हैओलेओ, “नी निर्दोष मीलाई कताज ता जैच्यो कतान्याकी याय कारणय दोकाई आछिम ङाय ङा महङल भ्या कष्त भोगीदे ङाले ।” 20 तब मुख्य पुजाहारी सन एल्डरय बारब्बालाई राहान्या सन येशुलाई सैन्यालो लागीत भीडरलाई राजी जैकेर । 21 नो हाकीमय नोरलाई ओ गीनो, आउ नेहेबोलो मध्ये ङाय जेरलो लागीत सुलाई मुक्त दोसीउ जेर जे चाही के ? नोरय हैलेकेर बारब्बालाई । 22 पीलातसय नोरलाई हैलेकेर, “ख्रीष्ट हैलेसीन्या येशुलाई चाही ङाय कै ङा दोके ?” नोरय पारय हैलेकेर, “नोलाई क्रुशल तङगैच्यो ।” 23 र होय हैओलेओ, “कतान्या, याय कता अपराध दोदे लीज्यार तर नोर झन जोर सका किहिदे इतानो हैलेकेर, नोलाई क्रुशल तङगैच्यो ।” 24 जब पीलातसय ओलय कताज दोओ माधुन्या ओ रहङो, बरु होहल्ला मचीसीउ था ओसनो, होय रिही लाङदे भीडलो ङाहाक ओ कुइ हुर्सीदे हैओलेओ, “आउ निर्दोष मीलो झी लेउङलाई ङा निर्दोष ङाले जेर जेज सन्च्यो ।” 25 पार मीरय हैलेकेर, “होलो झी गेर सन गेराई जार तरल ग परिक, 26 होकाई होय बारब्बालाई नोराई लागीत राहादे योकेर तर होय येशुलाई कोर्रा ओ लगयो र क्रुशल झुण्डैन्यालो लागीत ओयओ । 27 होकाई नो हाकीमलो सेनारय येशुलाई महलल लाङकेर र सेनारलो पार पल्टनरलाई भेला जैकेर । 28 नोरय याय क्वा हाइकेर र यालाई घ्यामो क्वा लगैदे योकेर । 29 नोरय काँडालो तोबो मुकुट जैकेर र यालो ङईल जासीदे योकेर, र याय दाहीन्या कुइल तोबो झुई नैदे योकेर । नोरय याय ङाहाक घुँडा टेकीकेर र इतानो हैलेदे यालो गील्ला दोकेर, यहुदीराई राजालाई प्राणर !” 30 नोरय यालाई त्युल्केर, र नोरय झुई छेन्दे याय ङईल पोहोकेर । 31 नोरय यालाई गील्लैदे खेम्सीउ छिन्ङ नोय यालाई लगैसीउ क्वा फैकेर र याय या क्वा लगैदे योकेर र यालाई क्रुशल तङगैन्या हैलेदे नङाई लाङकेर । 32 जब नोर पाखाङ हुकेर, नोरय सिमोन मीन दोसीउ कुरेनीलो तोबो मीलाई दैकेर, नोलाई होर सका बान्या नोरय कर लगैकेर ताकी होय याय क्रुश गधुकर । 33 नोर गलगथा हैलेन्या पोल केकेर, जोलो अर्त ङईलो पो हो । 34 नोरय यालाई पोहोकेर बरासीउ दाखमद्य ओँआ योकेर । तर जब याय नो यादारो, याय नो यामा ओँओ । 35 जब नोरय यालाई क्रुशल तङगैकेर, नोरय चिठ्ठा झाकेर र याय क्वारलाई भाग लगैकेर । 36 होकाई नोर चुसीदे यालाई रहङकेर । 37 याय ङई तरल इतानो हैलेसीउ आरोप सर्सीउ ओलेउ, “आउर येशु लेर, यहुदीराई राजा ।” 38 नेहेबोलो कुन्या मीर यासका क्रुशल तङगैसीदे यालेउ, तोबो याय दाहीन्या लेउदे तोबो दाब्रे या लेउदे ।” 39 जो नो यम तादे याबाज्याउ, नोरय इतानो हैलेदे ङई हलैदे याय गील्ला यादोज्याउ । 40 जेय जोय मन्दीरलाई भत्कैदे सोङ छाल जैन्या याबाज्याउ जेलाईज बचैच्यो ! यदी जेर परमेश्वरलो जा जे हो भन्या, क्रुशङााई मेङ झरिच्यो !” 41 यैजेदेज मुख्य पुजाहारीरय पनि शास्त्रीर सन एल्डरर सका बोलोङज याय गील्ला दोकेर र हैलेकेर, 42 होय अबुररलाई ओ बचयो, तर ल्लाई भन्या बचैन्या माधुय । हो ईस्रायललो राजा हो । हो क्रुशङाई मेल गहुक, होकाई नो छीन्ङ गेर होलो तरल विश्वास दोन्या गेले । 43 होय परमेश्वरल विश्वास दोय । र परमेश्वरय चाहीकेर भन्या यायज होलाई ग बचैक, कतान्याकी होय इतानो हैलेदे ओलेउ, “ङा परमेश्वरलो जा हो ।” 44 र यासका क्रुशल तङगैसीउ कुन्यारय पनि नीतानोज सका गील्ला दोकेर । 45 तब दोपहरङाई सोङ बजे सम्म पार देशलाई अन्ध्याँरोय ओ कवो । 46 सोङ बजे लेउदे येशु घेओ स्वरय या किहीओ र हैयालेओ, “ईलोई, ईलोई लामा सब खृनी ?” जोलो अर्थ ताय, ङामी परमेश्वर, ङामी परमेश्वर, जेय ङालाई कतान्या त्यागीदे जेले ?” 47 जब नल च्यासीदे यालेउ र मध्ये कोहीरय आउ थैकेर, नोरय हैलेकेर, “आउय एलीयालाई ओ खुल्ज्या ।” 48 चानोज नोर मध्ये त जना जोदे ओबाओ र तोबो चम्चा ओ लाङो नोलाई सिरो दाखमद्य ओ भरिउ, नोलाई निङाला लतैदे यालाई ओँहोन्या ओयओ । 49 अबुरय चाही हैलेकेर, होलाई ओबाथङज राहादे दोच्यो । होलाई बचैन्या एलीया हुर सै माहुर गेलाई रहङन्या योच्यो । 50 नो छिन्ङ येशु फरी घेओ स्वरय या किहिओ र याय या प्राण याराहाओ । 51 होकाई मन्दीरलो पर्दा टुप्पाङाई छेउ सम्म नेहे भाग तादे ओ चीओ ।, र पृथ्वी ओ हल्लीउ र चट्टानर क्याहाकेर । 52 चिहानर फैसीकेर, र भ्या पवित्र जनरला सिओ क्याङर सोेर, जो महङल परिदे यालेउ । 53 याय पुनरुत्थान छिन्ङ नोर खादरङाई पाखाङ पुलुकेर: पवित्र सहरल प्रवेश दोकेर, र भ्याराई खार्ल सतन्सीकेर । 54 होकाई जब कप्तान सन येशुलाई रहङसीउरय भुइचालो ओबाओ सन नल ओताओ घतनार रहङकेर, नोर भ्या छेदे हैलेकेर, “साँचोज आउर के परमेश्वरलो जाज यालेउ रैछ ।” 55 गालीलङाई येशुलो हेरचाहा दोन्या सन यालाई पछैदे हुओर भ्या मेमारय टाढाङाई नो रहङदे यालेउ । 56 नोर मध्ये मरियम मग्दलीनी, याकुब सन योसेफलो आमै मरियम सन, जब्दीयारला जारलो आमै यालेउ । 57 जब रिमदयाक ओताओ, अरीमाथीयाङाई त जना धनी मी याहुओ, जोलो मीन योसेफ ओलेउ, जो येशुलो चेला यालेउ । 58 नो मी पिलातस लेउङ याबाओ र नोय येशुलो क्याङ या निहीओ । होकाई पिलातसय नो क्याङ यालाई गयोसिक हैलेदे आदेश योकेर । 59 योसेफ नो क्याङ यालाङो, र नोलाई सफा मलमललो क्वाल बेरिदे या लाङो । 60 र याय ओलयज चट्टान खोपीदे जैसीउ नयाँ चिहानल यानयो । होकाई याय चिहानलो झलाल तोबो घेओ लुङ पल्तैदे कवदे नोर नङाई बाकेर । 61 मरियम मग्दलीनी सन छुत्तो मरियम पनि नो चिहानलो तङदे चुसीदे यालेउ । 62 छुत्तो छा जो तयारीलो छालो पराती पल्त ओलेउ, मुख्य पुजाहारीर सन फरीसीर पीलातस लेउङ जम्मा तादे यालेउ । 63 नोरय हैलेकेर, “हजुर, गेरलाई सम्झना ले, की नो ठगाहा जीउदो ताकाई नोय हैलेदे ओलेउ, सोङ छा छिन्ङ ङा फरी सोन्या ङाले । 64 नोकारण सोङ छा सम्म नो चिहान चाउ सका गुन्या लागीत हुकुम दोचिके । मनी के नोलो चेलार हुज्या र होलाई कुदे लाङदे मीरलाई हैल्यार, ‘याके सिसिउङाई जीउदो तादे लेर ।’ 65 पिलातसय नोरलाई हैलेकेर, “तोबो गुन्या लाङच्यो, र बाच्यो र नोलाई जेरय धुसीउ गुदे नैच्यो ।” 66 नैतादे, नोर बाकेर र लुङल मोहर लगैदे सिपाहीर खतैदे चिहानलाई सुरक्षीत नैकेर ।