1 येशु मन्दीरङाई पाखाङ याबाओ र याय य यमल याबाज्याउ यालाई मन्दीरलो झीमर सतन्या याय चेलार या लेउङ हुकेर । 2 तर याय नोरलाई जवाफ यायओ र हैयालेओ, “कता जेरय आउ पार पाङ जे मारहङ ? साँचोज ङा जेरलाई हैङालेय, तोबो लुङ तरङ छुत्तो लुङ राहासीन्या माले, पारज भत्कैसीन्या लेर ।” 3 जब यार जैतुन डाँडाल या चुसीउ, चेलार या लेउङ खुसुक्क हुकेर होकाई हैलेकेर, गेरलाई हैलेच्यो, आउ पाङर खर्क तान्या लेर ? 4 येशुय हैुालेओ, “होसीयार ताच्यो सुयज जेरलाई ता भत्कैक ।” 5 कतान्याकी ङा मिनल भ्या जना हुन्या लेर । कतान्याकी नोरय हैलेन्या लेर, ङाज खुस्त हो । र भ्यारलाई बहकैन्या लेर । 6 जेरय लडाँइ सन लडाँइलो होहल्ला थैन्या जेले । तर जेर बिचलन ताताच्यो, कतान्याकी आउ पाङर तान्याज ताओ रिई तर अझ अन्त के हुदे माले । 7 कतान्याकी जातीलो विरोधल जातीर खडा तान्या लेर, सन राज्यलो विरोधल राज्य खडा तान्या ले, भ्या पोल अनिकाल तान्या ले, र भुइचालोर बान्या लेर । 8 तर आउ पार पाङ सुत्केरी तान्या बेलालो सुरु याज हो । 9 तब नोरय जेरलाई सङकष्तलो लागीत योन्या लेर र जेरलाई सैन्या लेर । ङा मिनलो खातीर पार जाती लेउङाई जेरलाई घीनैन्या लेर । 10 तब भ्या जनाय थेस ज्योन्या लेर, र तोबो छुत्तोलाई धोका योन्या लेर, तोबो छुत्तोलाई घीनैन्या लेर । 11 भ्या अगमवक्तार खडा तान्या लेर र भ्या जनारलाई बहकैन्या लेर । 12 कतान्याभन्या अधर्मलो विरोधल तान्या लेर; भ्या जनाराई प्रेम विश्वास आशा सेलैन्या ले । 13 तर जो छिन्ङ सम्म स्थीरल रहीई, होय उद्धार दैन्या ले । 14 राज्यलो सुसमाचार पार संसारल पार जातीरलाई साक्षीलो रुपल प्रचार दोसीन्या ले ।तब अन्त हुन्या ले । 15 नोकारण, जब जेरय दानिएल अगमवक्ताय हैलेसीउ मीतानो नो विश्वासकारी घृणीत मीलाई पवित्र पोल च्यासीउ रहङन्या जेले ( परिन्याय ओल्ज गसन्क ), 16 जो यहुदील लेर, नोर पाहार लेउदे ग धोङकर, 17 जो झीमलो छाना तरल ले, हो झीमङाई कताज मालमत्ता लाङन्या ता झरिक । 18 जो हेङ ले, होय ओ क्वा लाङन्या ताओल्क । 19 तर नो छाल नोरलाई जो जादैन्या मेमार लेर र जोय लुजारलाई नुनु सओईर । 20 हीउदला सन शवाथलो छाल जेर धोङो ता परिक लेदे प्रार्थना दोच्यो । 21 कतान्याकी नो बेला घेओ सङकत तान्या ले जो संसारलो सुरुङाई आर्क सम्म खर्कज तादे माले, न ता खर्कज फरी तान्या ले । 22 नो छाल मा घतैसीकाई सम्म कोही क्याङ सका बाँचीन्या माले । तर चुनीसीउरला लागीत नो छार घतैसीन्या लेय । 23 तब यदी कोहीरय जेरलाई ‘रहङच्यो, ख्रीष्ट आङ लेर, वा ख्रीष्ट नल लेर !’ हैलेके भन्या नोलाई विश्वास तादोच्यो । 24 कतान्याकी धुतैन्याख्रीष्टर सन धुतैन्या अगमवक्तार हुन्या लेर र ताकाई सम्म, चुनीसीउरलाई समेत बहकैन्या लागीत घेओ-घेओ चिन्हर सन चमत्कार र सतन्या लेर । 25 रहङच्यो, ङाय आउ ङाहादेज जेरलाई हैलेदे ङाले । 26 नोकारण, यदी नोर यजेरलाई ‘रहङच्यो, यार उजाड पोल लेर, हैलेदे हैलेन्या भन्या, उजाड पो लेउदे ता बाच्यो, रहङच्यो यार भीत्र कोठाल लेर, हैलेदे हैलेय भन्या नोलाई विश्वास तादोच्यो । 27 कतान्याकी जैलैदे बिजुली पुर्वङाई चम्कीदे पछिउ सम्म नोलो ज्योती केय मीलो जालो हुन्या पनि नीतानोज तान्या लेर । 28 जोङ सीना लीज्या नल गीद्धर पनि तान्या लेर । 29 तर नो छाल सङकष्त हुओ पाइनाज घाम अध्याँरो तान्या ले जुनय ओ ज्योती योन्या माले: तारार आकासङाई तेहेन्या लेर, र स्वर्गला शक्ती दगमगैन्या लेर । 30 तब मीलो जालो चिन्ह आकासल रहङसीन्या लेर, होकाई पृथ्वीला पार जातीरय विलाप दोन्या लेर । नोरय मीलो जालाई आकासलो बादलल शक्ती सन घेओ महीमा सका याहुज्याउ रहङन्या लेर । 31 या स्वर्गदुतरलाई तुरहीलो घेओ सोरलो सङल परिन्या लेर, होकाई नोरय यालो चुनीसीउरलाई आकासलो तोबो छेउ लेउङाई छुत्तो छेउ सम्म चार दिशाङाई भेला जैन्या लेर । 32 अन्जीरलो बोटङाई पाथ पैचिके । जब नोलो हाङगार कलीलो तार र ख्यार पलैर, तब मुनो समय हुज्या हैलेदे जेरय थाहा जे सन । 33 नैजैदेज, जब जेरय पनि आउ पार पाङ जे रहङ,यार छेउलज अथवा झलालो छेउलज लेर हैलेदे जेरय सन्या ताय । 34 साँचोज ङा जेरलाई हैङालेय, आउ पार पाङ माताकाई सम्म आउ पुस्ता बीतीदे बान्या माले । 35 स्वर्ग सन पृथ्वी बीतिदे बान्या ले, तर ङालो वचन बितिदे बान्या मालेर । 36 तर नो छा सन घरीलो बारेल सुलाई पनि थाहा माले, नता स्वर्गलो दुतरलाई, नजालाई, तर बाबुलाई याज थाहा लीज्या, 37 मीलो जालो हुन्या समय पनि नोआलो छालो मीतानो तान्या ले । 38 कता्न्याकी नो छारल जलप्रलय तान्या ङाहादे नो ओ जाहाज भित्रल मा पसिकाई सम्म नोर या ज्योज्याउ या ओहोज्याउ सन ब्याहा यादोज्याउ ब्याहा दोदे यायोज्याउ, 39 होकाई घेओ नम हुदे नोरलाई मा बगैकाई सम्म कताज पनि थाहा मालेउ । मीलो जालो हुन्या बेला पनि नीतानोज तान्या ले । 40 तब खेताल नेहेबोलो तान्या लेर, तोबो लाङसीन्या ले र छुत्तो नलज राहासीन्या ले । 41 नेहेबोलो मेमा चाखी पिसीउ तान्या लेर तोबो लाङसीन्या ले र छुत्तो नलज राहासीन्या ले । 42 नोकारण, जेर जागा ताच्यो कतान्याकी जेराई प्रभु सु छा हुन्या लेर हैलेन्या पाङ जेरलाई थाहा ले ! 43 तर आउ सन्च्यो की रिलो सुसमयल कुन्या मी ओ हुज्या हैलेन्या पाङ झीमलो धनीलाई ओ सन्सीउ ताकीन, हो जागा चुसीन्या ओलेउ र कुन्यालाई होय झीम कुओ योन्या ओमालेउ । 44 नोकारण, जेर पनि तयार तान्या ताय, कतान्याकी मीलो जा जेरय आशा मदोसीउ बेलाल हुन्या लेर । 45 नैतादे विश्वास योग्य सन वृद्धी लेउ नौकर सु हो, होलाई होलो मालीकय ओ झीमलो मीरलाई नोराई ज्याउ ठीक समयल नोरलाई योन्या झरना दोसीउ ले ? 46 नो नौकर धन्यला हो, जोलाई होलो मालीक हुकाई नीतानोज दोसीउ दैन्या ले । 47 साँचोज ङा जेरलाई हैङालेय, की मालीकय उचीत ताओ पार पाङलो जीम्मा होलाई यान्या ले । 48 तर यदी माचाउ नौकरय नोलो युङल, ङा मालीक घीलो तादे लेर लेदे हैलेय, 49 होकाई होय ओ नैर नौकररलाई पोहोय, र मद्य ओन्या र सका ज्योय सन ओहोय भन्या, 50 नो नौकरय आशा मादोसीउ छाल नोलाई था माताओ बेलाल नो नौकरलाई मालीक हुन्या ले । 51 नोलो मालीकय नोलाई नेहे जैदे पल्न्या लेर र नोलो दशा नो पाखण्डीर मीतानो तान्या ले, जोङ घर्न्या सन हाकैन्या बाहेक कताज तान्या माले ।