1 जब येशु सन याय चेलार यरुशलेमलो छेउल या केओ र जैतुन डाँडालो बेथफागे हैलेसीन्या पोल याकेओ, तब येशुय बेहेबोलो चेलारलाई या परिङो, 2 र इतानो हैयालेओ, जेर नो नाङखार्ल बाच्यो, र जेरय नल केन्या बेलालज पोहोदे नैसीउ तोबो गधाहा, सन नो सका तोबो बछेरा दैन्या जेले । नोरलाई पलाच्यो र ङा लेउङ रैच्यो । 3 यदी आउलो बारेल कोहीय कतार हैलेके भन्या जेरय इतानो हैलेच्यो, ‘प्रभुलाई आउलो आवशेक तादे ले’ र नो मीय होपाईनाज नोरलाई जेर सका परिङदे योन्या लेर । 4 अगमवक्ता लेउङाई हैलेसीउ पाङ पुरा तान्यालो लागीत इतानो तादे ओहुओ, याय हैयालेओ, 5 “सियोनलो मेमाजालाई हैलेच्यो, “रहङच्यो विनम्र तादे गधा तरल सवार तादे होकाई गधालो जा तोबो बछेडा तरल पुलुदे जेय राजा जे लेउङ हुज्यार ।” 6 तब चेलार बाकेर र येशुय जीतानो हैलेदे यालेउ, नीतानोज दोकेर, 7 नोरय गधा सन बछेडालाई या रहयो र नोराई तरल या क्वार तान्सीकेर र येशु नो क्वाय तरल चुसीकेर । 8 भीडल ताओर भ्यारय याक्वार यमल तान्केर, र अबुरय सीङलो डालार क्याहाकेर र नो यमल बिछैकेर । 9 येशुलो ङाहादे बाओर सन यालाई पछैसीउ पार भीडय इतानो हैलेदे कीहीकेर, “दाऊदला जालाई होसन्ना ! यार धन्यला लेर जो परमेश्वरलो मीन हुर ! उच्चल बिराजमान तान्यारलाई होसन्ना ।” 10 जब यशु यरुशलेम भीत्रल हुदे यालेओ, पार सहरल हलचल ताके र नोरय हैलेकेर, आउर सुर ?” 11 भीडय जवाफ ओयओ, “यार येशु लेर, गालीललो नासरतङाई याहुओ अगमवक्ता ।” 12 नो छिन्ङ येशु मन्दीरलो भित्रल याबाओ । याय मन्दीर भित्रल लहङन्या सन यान्या पारलाई पाखाङ या पुलुयो, र सिलो सातीन्याराई तेबुलर होकाई परेवा यन्यारला कोरकार या पल्तयो । 13 याय नोरलाई हैयालेओ, “इतानो सर्सीउ लीज्या, ङा झीम प्रार्थनालो झीम कहलैसीन्या ले; तर जेरय आउलाई कुन्याराई अड्डा जेदे जे लीज्या ।” 14 मीलुङ मारहङन्यार सन लङगडार मन्दी भित्ररल हुकेर र याय नोरलाई चाउ याजयो । 15 तर जब मुख्य पुजाहारीर सन शास्त्रीरय याय दोसीउ अचम्मलो हेनर रहङकेर, र जब नोरय मन्दीरल लुजारय “दाऊदलो जालाई होसन्ना” हैलेदे या कीहिओ थैकेर, नोर रिसीदे चुर ताकेर । 16 नोरय यालाई हैलेकेर, कता आउ मीरय जो हैलीज्यार, जेय थै्या जे धुय ?” येशुय नोरलाई हैयालेओ, “हो ! तर कता जेरय खर्कज परिदे जेमालेउ, जीमो बालक सन लुजारला ह्याङाई याय पुरा प्रशंसा लाङदे लीज्यार ?” 17 नो छीन्ङ येशु नोर लेउङाई बिदाा ताकेर, र बेथानीलो सहरल याबाओ र याय नो रि नलज कतिकेर । 18 छकालन्या जब नो सहरल या ओलो, या केरेदे यालेउ । 19 याय यमलो छेउल अन्जीरलो बोट या रहङो, या नोलो छेउल याबाओ र नो सका ख्यार बाहेक अबुर कताज यामादयो । याय नोलाई हैयालेउ, “नङङाई आबो खर्कज फरी कोही सही गमाहुक ।” र नो अन्जीरलो बोट होपाईनाज ओ थङो । 20 जब चेलारय आउ या रहङो, नोर अचम्म तादे हैलेकेर, “आदरा चानो आउ बोट कैजैदे थङदे ओबाओ ?” 21 येशुय जवाफ यायओ र नोरलाई हैयालेओ, “साँचोज ङा जेरलाई हैङाले, यदी जेरल विश्वास ले र सङका जेमादोके भन्या आउ अन्जीरलो बोटलाई जो जैसीउ ओलेउ नो याज माहङक, तर जेरय आउ पाहारलाई, आङाई भो ओसीदे समुन्द्ररल बान्के हैजेले के भन्या पनि नैज तान्या ले । 22 जेरय विश्वास दोदे जो पाङ प्रार्थनाल जे निहीय, नो जेरय दैन्या जेले। 23 जब येशु मन्दीरल हुदे यालेउ, याय या पैज्याउ बेलाल मुख्य पुजाहारी र सन मीराई अगुवार या लेउङ हुदे हैलेकेर, “जेय सु अधिकारय आउ पाङर जे दोज्या ? र जेलाई आउ अधीकार सुय ओयओ ?” 24 येुशुय जवाफ यायओ र नोरलाई हैयालेओ, “ङा पनि जरलाई तोबो प्रष्त ङा गीन । यदी जेरय ङालाई नो जे हैलेके भन्या, ङाय सु अधीकारय आउ पाङर ङादोय हैलेन्या पाङ ङा जेरलाई हैलेन्या ङाले । 25 यूहन्नालो वप्तिसमा कताङाई ओहुओ हो ? स्वर्गङाई हो सै मीर लेउङाई ?” नोरय 26 तर यदी गेय मी लेउङाई हैगेले भन्या, “गेर भीडय सका गे छेय, कतान्याकी नोर पारय यूहन्नालाई तोबो अगमवक्तालो रुपल या रहङज्याउ ।” 27 तब नोरय येशुलाई हैलेकेर, “गेलाई थाहा माले ।” याय पनि नोरलाई हैयलेओ, “ङापनि सु अधिकारय आआउ पाङर ङा दोज्या हैलेदे जेरलाई हैङामाले । 28 तर जेर कता विचार जे दोज्याउ ? तोबो मीलो नेहेबोलो जार यालेउ । होराई ङाहादे ङा सका बादे हैलेकेर, ‘जा; आछिम दाखबारील बादे हेन दोके ।’ 29 नो जाय हैओलेउ, ङा ङामाबा; तर कोही समय छिन्ङ होय ओ युङ ओ बदलीउ: तब ओबाओ । 30 र आउ मी ओ छुत्तो जा सका बादे नैज ओ हैलेउ । आउ जाय हैओलेउ, हजुर ङा बान्या ङाले; तर नो ओ माबाओ । 31 आउ नेहेबोलो जार मध्ये सु वाही जाय ओ बाबुलो इच्छा पुरा ओदोओ ?” नोरय हैलेकेर, “ङाहादे ङा चाहीय ।” येशुय नोरलाई हैयालेओ, साँचोज ङा जेरलाई हैङालेय जेर भन्दा ङाहादे कर सोचैन्यार सन यौन कर्मीर परमेश्वरलो राज्यल बान्या लेर । 32 कतान्याकी यूहन्ना जेर लेउङ धार्मीकतालो यमल हुर्केर तर जेरय होरलाई विश्वास जेमादोओ, जब की कर सोचैन्यार सन येन कर्मीरय होरलाई विश्वास दोकेर । र जेरय जब आउ ओ ताज्याउ जे रहङो, होरल विश्वास दोन्या जेरय पश्चताप पनि जेमा दोओ । 33 छुत्तो दृष्तान्त थैच्यो, तोबो मी ओलेउ, जो जग्गालो मालीक ओलेउ । होय नल दाखबारी ओ लगयो र नोलो यैदे होदे बाह्र ओझाओ, नल दाख पेलीन्या कोल याजयो नोलाई रहङन्यालो लागीत तोबो धररा याजयो; र खेतलारलाई नोलो थेक्का यायओ नो छिन्ङ या छुत्तो देशदे बाकेर । 34 जब दाखलो फसललो समय ओहुओ, याय दाखबारीला खेतालार लेउङ दाख रैन्यालो लागीत नौकर र या परिङो । 35 तर दाखबारीला खेतालारय याय नेकररलाई बासल या लाङो, र तोबो पोहोकेर छुत्तोलाई सैहीकेर र छुत्तोलाई लुङय आपकेर । 36 फरी, मालीकय ङाहादे भन्दा अज भ्या नौकरर या परिङो तर नो दाखबारील हेन दोन्यारय नोरलाई पनि नैज याजयो । 37 नो छीन्ङ मालीकय इतानो हैलेदे या जालाईज नोर लेउङ या परिङो, नोरय ङा जालाई आदरा दोन्या लेर । 38 तर जब दाखबारील हेन दोन्यारय मालीकलो जालाई रहङकेर नोरय तोबो छुत्तोलाई हैलेकेर, ‘आउ के उत्तराधीकारी ची हो, हुच्यो गेय आउलाई गे सैके, र आउलो उत्तराधीकार गे लाङ के ।’ 39 हैतादे, नोरय होलाई पनि कयोकेर, दाखबारीङाई पाखाङ ख्याकेर र होलाई सैकेर । 40 जब नो दाखबारीला मालीक हुर, याय नो दाखबारील हेन दोन्यारलाई कता दोरय ?” 41 नोरय यालाई हैलेकेर, “याय नो दुष्त मिरलाई पार भन्दा घेओ तरिकाय नास दोन्या लेर र नो दाखबारी नो मीरलाई थेक्काल योन्या लेर जोय सही मीसीन्सीउ छिन्ङ नोलो लागीत मोल फोर ।” 42 येशुय नोरलाई हैयालेओ, “कता जेरय खर्कज धर्मशास्त्रल जेमा परिसीउ । जो लुङलाई झीम जैन्यारय फादीन याजयो नो चाही कोनालो सीर लुङ ओताओ । आउ परप्रभुङाई ओताओ हो, होकाई गेय दृष्टील आउ अचम्मला ले ?” 43 आउ तादे, ङा जेरलाई हैङाले, परमेश्वरलो राज्य जेर लेउङाई टाढा लाङसीन्या ले र तोबो इतानो जातीलाई योसीन्या ले जोय ओल्लो सही फलैन्या ले । 44 जो आउ लुङल तेहेन्या ले, नो टुक्रा तान्या ले, तर जेयओ तरल तेहेय, नो सीउसीन्या ले । 45 जब मुख्य पुजाहारीर सन शास्त्रीरय यार दृष्तान्तर थैकेर नोराई बारेल याय पाङदे यालीज्याउ हैलेन्या नोरय गाल्केर । 46 नोरय यालाई क्योन्या या चाहीज्याउ, तर मीरय यालाई अगमवक्ता या मानीज्याउ नैतादे नोर भीचर सका या छेओ ।