¹ कतान्याकी परमेश्‍वरलो राज्य त जना जमीन्दारी मालीक मीतानो हो, जो दाख बारीलो लागीत बाहुरयारलाई नीमेकल लगैन्या छकालन्या ज नाङ खार्दे बाकेर । ² नो हेन दोन्यार सका त छालो तोबो दिनारल हेन दोन्या होर मन्जुरी ताओ छिन्त याय नोरलाई दाख बारिल या परिङो । ³ यार नदु बजे पाखाङ बाकेर र बजारल अबुर हेन दोन्यारलाई कताज हेन मादोदे च्याङसीउज रहङकेर । ⁴ याय नोरलाई हैलेकेर, “जेर पनि दाखबारि ले बाच्यो र जो उचीत लीज्या ङा जेरलाई योन्या ङाले ।” नोकारण नोर हेन दोन्या बाकेर । ⁵ फरी या बाह्र बजे सन सोङ बजे पाखाङ याबाओ तर पनि नीतानोज या रहङो । ⁶ फरी पाँच बजे पाखादे याबाओ र अबुररलाई कताज हेन मादोदे च्यासीउज यादयो । याय नोरलाई हैलेकेर, “जेर ला भरीज आङ कताज हेन मादोदे कतान्या चुसीदे जे लीज्या ?” ⁷ नोरय यालाफ हैलेकेर, ‘कतान्याकी सुय पनि गेलाई हेनल लगैदे माले ।’ याय नोरलाई हैलेकेर, ‘जेर पनि दाखबारील बाच्यो ।’ ⁸ जब ओदेक ओताओ, नो दाखाबारीला मालीकय याय नाई क्यालाई हैयालेओ, ‘नो हेन दोन्यारलाई खुलच्यो र अन्तीमल हुसीउङाई सुरु दोदे नोरलाई या ज्याला फोदे योच्यो ।’ ⁹ जब पाँच बजे हेनल लगैसीउ हेन दोन्यार हुकेर नोर पारय त दीनार दैकेर । ¹⁰ जब ङाहादे ङा हेन दोन्या हुकेर, नोरय भ्या दैन्या गेले हैलेदे नोरय विचार दोकेर, तर नोर पारय त दीनारज यादयो । ¹¹ जब नोरय या ज्यालार दैकेर, नोरय हेङलो मालीकलो विरोधल गन गन दोकेर । ¹² नोरय हैलेकेर, “आउर छिन्ङ हुओर हेन दोन्यारय त घन्ता याज हेनल लागिदे यालेउ, तर जेय होरलाई गे समानज जैदे जे लिझ्या, गेर जोय पार लालो बोझ सन हीप्‍न्या घामल पनि गेदोके ।” ¹³ तर नो मालीकय हैयालेओ र नोर मध्ये त जनालाई हैयालेओ, मीत्र ङाय जेरलाई कताज माचाउ दोदे ङामाले कता जे ङा सका तोबो दीनारल मन्जुर तादे जेमालेउदा । ¹⁴ जो जेलो ल नो लाङच्यो र जे यम बाच्यो । ङाय जेलाई योसीदे हादरा ङा लास्तल हेनल लगैसीउरलाई पनि ना दराज योन्या युङ तादे लीज्या । ¹⁵ कता ङाय ङालो सम्पत्तीलाई ङाय चाहाना दोसीउ मीतानो दोन्या न्याय सङगत माहङकदा ? सै ङा चाओ तासीउ कारणय जेय मिलुङ दुष्त ओताओ हो ?” ¹⁶ नैतादे छिन्ङा ङाहादे तान्या ले, ङाहादे ङा चाही छिन्ङा तान्या ले । खुल्सीउ भ्या लेर, तर चुनीसीउ तकीजा याज लीज्यार । ¹⁷ येशु यरुशलेमल लेउदे याबाज्याउ, याय नो बाहर जना चेलारलाई छुत्तोज यानयो, र यमल बान्या बेलाल याय नोरलाई हैयालेओ, ¹⁸ रहङच्यो, गेर यरुशलेम लेउदे गे बाज्या, र मीराईज मुख्य पुजाहारीर सन शास्‍त्रीरला कुइत योसीन्या लेर नोरय यालाई मृत्यु दण्डलो दोष लगैन्या लेर, ¹⁹ र याय थत्ता उडैन्या, यालाई कोर्रा लगैन्या, सन क्रुशल तङगैन्यालो लागीत नोरय यालाई गैर यहुदीराई कुइल योन्या लेर । तर होर सोङ छाल सोन्या लेर ।” ²⁰ नो छीन्ङ जब्दीयाला जालो आमै होकाई नेहेबोलो जालो सङल येशु लेउङ हुकेर नोर याय ङाहाक घोप्‍टो तादे या ङाई कोही पाङर दैन्यालो लागीत बीन्ती दोकेर । ²¹ येशुय नोलाई हैयालेओ, “जेय कता पाङलो चाहाना जेदोज्या ?” होय यालाई हैयालेओ, “जेय राज्यल आउ ङा नेहेबोलो जार मध्ये तोबो जेय दाहीन्या कुइ लेउदे सन छुत्तो दाब्रे कुइ लेउदे ग चुसीकर हैलेे आज्ञा योचीके ।” ²² तर येशुय जवाफ यायओ र हैयालेओ, “जेरय ङा खुरीङाई के ओँहोन्या ङा बाज्याउ खुरीङाई ओँहोन्या जेर सक्षम जेलेदा ?” नोरय यालाई हैलेकेर, गेर सक्षम गेले ।” ²³ याय नोरलाई हैयालेओ, “जेरय ङा खुरीङाई के ओँहोन्या जेले । तर ङालो दाहीन्या कुइ लेउदे सन ङा बाँउ कुइ लेउदे चुसीउ योन्या ङाय माहङक, तर आउ नोराई लागीत हो, जोलो लागीत ङा बाबु लेउङाई तयार जैसीउ लीज्या ।” ²⁴ जब अबुर दश जना चेलारय आउ पाङ या थयो, नोर आउ नेहेबोलो दाजु भाइ सका रिसिकेर । ²⁵ तर येशुय नोरलाई या सका या खुलो र हैयालेओ, “जेर जे सन, की गैर यहुदीराई शासकरय नोरलाई अधीनल नैर, र नोराई महत्वपुर्ण मीरय नोराई तरल अधीकार दोर ।” ²⁶ तर जेराई खार्ल इतानो माताय । माहान तान्या चाहाना दोय हो जेराई सेवक तान्या ताई । ²⁷ र जो जेराई खार्ल ङाहादे तान्या इच्छा दोय, होय जेराई दास तान्या ताय, ²⁸ जैलेदे मीराई जा सेवा दैन्या लागीत हुसीउ माहङक, तर सेवा योन्या लेदे ओहुओ हो, र भ्याराई मोल फोन्यालो लागीत याय जीवन योन्या ओहुओ हो । ²⁹ जैलेदे नोर यरिहोङाई तङदे बाकेर, तोबो घेओ भीड याय छिन्ङ ओ लगाीउ । ³⁰ र नेहेबोलो मीलुङ मा रहङन्या यमलो छेउल चुसीदे यालेउ । येशु नङाई तादे याबाज्यार हैलेन्या पाङ जब नोरय थैकेर, नोर कीहीकेर, “हे प्रभु, दाऊदला जा, गेय तरल कृपा दोच्यो ।” ³¹ नोरय चुप लागीकेर हैलेदे भीडय हप्कैकेर, तर नोर अझ भ्या कीहीदे हैलेकेर, “हे प्रभु, दाऊदला जा, गे तरल कृपा दोच्यो ।” ³² तब येशुय च्यासीदे नोरलाई खुल्दे हैयालेओ, “ङाय जेराई लागीत कता दोदे योसीउ जेर जे चाहीज्याउ ?” ³³ नोरय यालाई हैयालेउ, “प्रभु गेराई मीलुङ ग फैसीक ।” ³⁴ तब येशु दयाय भरिसीदे नोराई मीलुङ या छुईउ । नोरय नो बेलालज या मीलुङ रहङदुकेर र यालाई पछैकेर ।