¹ जब येशुय आउ पाङर हैलेदे या खेमो, यार गालीलङाई या पुलुओ र यर्दन खोलालो हुफीन्त यहुदीयालो सीमाना सम्म याहुओ । ² तोबो घेओ भीडय यालाई ओ पछयो, र याय नोरलाई या समयो । ³ फरीसीर या लेउङ हुकेर यालो जाँच दोदे यालाई हैलेकेर, “कता मीय कोही कारणय होलो ज्यालाई राहान्या होलो लागीत न्यायला पाङ ताय ?” ⁴ येशुय उत्तर यायओ, “कता जेरय पढिदे जे माले, की जोय नोरलाई याजयो, याय ङाहादेङाईज नोरलाई खेपा सन मेमा जैदे याजयो ?” ⁵ होकाई जोय नोरलाई याजयो याय इतानो पनि हैयालेओ, ‘“आउ कारणय मीय होलो बाबु सन आमैलाई राहान्या ले र होलो ज्या सका मीलीदे चुसीन्या ले र नो नेबोलो ज तोबो क्याङला तान्या लेर ।’ ⁶ आउ कारणय नोर आबो नेहेबोलो माहङक, तर तोबो क्याङला लेर नो कारणय जो परमेश्‍वरय त साथ जोरिदे लेर नोरलाई सुय पनि ता छुतैक ।” ⁷ नोरय यालाई हैयालेओ, नीतानो ताकीन मोसाय गेलाई त्याग पत्र सर्दे त्यागीन्या आज्ञा कतान्या यायओ के । ⁸ याय नोरलाई हैयालेओ, जेरलो युङलो कथोर तासीउ कारणय मोसाय जेरलाई जेय ज्यार राहान्या अनुमती यायओ, तर सुरुङाई के इतानो ओमालेउ । ⁹ ङा जेरला हैङाले, “जोय माचाउ ओ युङ ताओ सन धापार सका लागीन्या कारणय बाहेक ओ ज्यालाई राहायर छुत्तो सका व्याहा दोय, नोय व्यभीचार दोय । र जो मिय नो राहासीउ मेमा सका होय पनि व्यवभीचार दोय ।” ¹⁰ चेलारय येशुलाई हैलेकेर, “यदी रेलो ओ ज्या सका इतानो अवस्था ताय भन्या, व्याहा मादोन्याज चाओ ताय ।” ¹¹ तर येशुय नोरलाई हैयालेओ, “पार मीय आउ शिक्षालाई ग्रहण दोन्या माधुय, तर नोरय याज जोलाई आउ ग्रहण दोन्यालो लागीत योसीदे ले । ¹² कतान्याकी कोही नपुङसकर लेर जो या आमैलो गर्भङाईज नीतानोज जर्मीकेर, र कोही नपुङसकर लेर जो मीर लेउङाई नपुङसक जैसीदे ओलेउ । र कोही न पुङसकर लेर जोय स्वर्गलो राज्यलो लेउङाई ओल्लाईज नपुङसक जैकेर । जोय आउ शिक्षालाई ग्रहण दोन्या सक्षम ताय, होय ग्रहण गदोक ।” ¹³ नो छिन्ङ येशुय या कुई नैदे प्रार्थना दोदे योचीके लेदे या लेउङ जीमो ओ रैसीउ, तर चेलारय नोरलाई हप्कैकेर । ¹⁴ तर येशुय हैयालेओ, जीमो लुजारलाई परिङच्यो नोरलाई ङा लेउङ हुन्या ता छेकीच्यो कतान्याभन्या स्वर्गलो राज्या आउराईज हो । ¹⁵ होकाई याय नोराई तरल या कुई यानयो, र नो छिन्ङ नङाई या पुलुओ । ¹⁶ तोब मी येशु लेउङ ओहुओ र हैयालेओ, “गुरुज्यु, ङाय अनन्त जीवन दैन्यालो लागीत कता चाओ हेन दोन्या ताय ?” ¹⁷ येशुय होलाई हैयालेओ, “चाओ कता हो हैलेदे ङालाई कतान्या जे गीन्ज्याउ ? तोबो याज चाउ ताय, तर यदी जे जीवनल बान्या जे चाहीज्या भन्या, आज्ञार पालना दोच्यो ।” ¹⁸ नो मीय यालाई हैओलेओ, “सु आज्ञार ?” येशुय हैयालेओ, “हत्या मादोन्या व्यभीचार मादोन्या, माकुन्या, धुतैदे साँची मायोन्या, ¹⁹ जेय बाबु सन आमैलाई आदर दोन्या, सन जे छीमेकीलाई जेलाई मीतानोज प्रेम दोन्या ।” ²⁰ नो धापाय यालाई हैओलेओ, “आउ पार पाङ के ङाय पालना दोदे ङाले ङाय अझ कता दोन्या आवशेक लीज्या ?” ²¹ येशुय नोलाई हैयालेओ, “यदी जे सिद्ध तान्या युङल ले भन्या, बाच्यो, र जे सका जो सम्पत्तीर लीज्या नो योच्यो, र नो पार गरिबरलाई योच्यो र जेय स्वर्गल धन दैन्या जेले । नो छिन्ङ हुदे ङालाई पछैच्यो ।” ²² तर जब नो धापाय येशुय हैलेसीउ पाङ ओथयो, हो भ्या दुखी तादे ओबाओ कतान्याकी हो भ्या सम्पत्ती ताउ मी ओलेउ । ²³ येशुय या चेलारलाई हैयालेओ, “साँचो ज ङा जेरलाई हैङालेय, धनी मीलाई स्वर्गलो राज्यल बान्या भ्या कठीन ताय । ²⁴ ङा फरी जेरलाई हैङाले, धनी मीलाई परमेश्‍वरलो राज्यल प्रवेश दोन्या भन्दा ऊँटलाई ग्वालो नाथ्राङाई बान्या सजीलो ताय ।” ²⁵ जब चेलारय आउ या थयो, नोर अचम्म तादे हैलेकेर, “नैताकीन सु बान्या धुय के ?” ²⁶ येशुय नोरलाई या रहङो र हैयालेओ, “मीराई लागीत के आउ असम्भव ले तर परमेश्‍वरलो लागीत पार पाङ सम्भव ले ।” ²⁷ नो छिन्ङ पत्रुसय हैलेकेर, “रहङच्यो, गेरय पार वस्त त्यागीदे गेले र जेलाई पछैदे गेले । तर गेय कता दैन्या गेले ?” ²⁸ येशु नोरलाई हैयालेओ, साँचो ज ङा जेरलाई हैङालेय, जेर जोय ङालाई पछयो, नयाँ जर्मल जब मीलो जा ईस्रायलला बाह्र कुललो न्याय दोदे ओ महीमालो सिहासनल चुसीई, जेर पनि बाह्र गोता सिहासनल चुसीन्या जेले । ²⁹ प्रत्येक जोय ङा मिनलो खातीर झीमङाई दाजु-भाइ, नाना-बैनार, बाबु-आमैर, ओ जार सन देश त्यागीदे ले, होय सय गुणा दैन्या ले र अनन्त जीवनलो अधीकार दैन्या ले । ³⁰ तर भ्या जनार जो आर्क ङाहादे लेर, नोर छिन्ङ तान्या लेर र भ्या जान जो छिन्ङ परिदे लेर, नोर ङाहदे तान्या लेर ।